1 Yoˊhan 3

Konˊhk'i Eun Peucawoˊ

1Peucawoˊ Eun ciˊ pe leumeusˊ eˊ aˊneng naˊ kuit ti mhawngˊ a reuˊ. Eun lahˊ eˊ meuh konˊhk'i Eun Peucawoˊ, eˊ ku meuh a yeut. Peue bhenˊ keuteˊ naˊ unˊ yawng ce eˊ, kopti unˊ yawng ce Eun. 2Aˊmawo leumeusˊ uiˊ naˊ peˊ, maetˊmaenˊ meuh eˊ konˊhk'i Eun Peucawoˊ hawcˊ. Hk'aˊ nanggalˊ ka naˊ eˊ ciˊ kaw yeuh saˊnhawˊ naˊ, eˊ hkuinˊ yawng a. Daecti kuˊ yawng eˊ naˊ yam tang puc Eun ri lih naˊ, eˊ kaw seunˊ Heun ri. Kopti Eun lawn yeuh saˊnhawˊ koˊ, eˊ kaw nyu Eun yeuh saˊawnˊ. 3Peue keutuiˊ hpumˊ a yeuhkiˊ hk'aˊnaee Heun naˊ peue ku peue, ce kaw yeuh tuˊ ri naˊ seungaˊ chakˊ seunˊ seungaˊ chakˊ Heun naˊ.

4Peue yeuh mapˊ naˊ ce gawmˊeucˊ, yeuh ce kuˊ kleucˊ ri leukahˊ ritroe naˊ. Neumneum ka naˊ koˊ, mapˊ naˊ meuh a kuˊ yeuh kuˊ kleucˊ ri leukahˊ ritroe naˊ. 5Daecti punta kaw Eun saicˊ ri tec mapˊ eˊ naˊ Eun lih, maeeˊ hk'aˊnaee Heun naˊ a hkuinˊ kueˊ mapˊ naˊ peˊ yawng a. 6Peue utˊ hk'aˊnaee Heun naˊ ce a hkuinˊ laee kueˊ nang kawnˊ yeuh mapˊ naˊ saecˊ ti peue. Peue kawnˊ yeuh mapˊ naˊ unˊ nang pun ce ri nyu yawng Eun.

7Konˊ leumeusˊ uiˊ naˊ peˊ, pawlaee tuilˊ peue copˊ ri yeuh peˊ kleucˊ hk'aˊ ri. Peue yeuh kuˊ cawpˊ naˊ meuh ce peue leupaws seumeuˊ seunˊ leupaws seumeuˊ Heun naˊ. 8Peue yeuh mapˊ naˊ ingˊ ce neum seucaˊ naˊ, kopti tangˊ neum yamla ka naˊ seucaˊ naˊ yeuh a mapˊ naˊ. Konˊ aiˊ Eun Peucawoˊ lih Eun naˊ meuh a kop kaw Eun yeuh kanˊ ka seucaˊ naˊ lu. 9Peue keutˊ lih neum Peucawoˊ Eun naˊ ce a hkuinˊ laee kueˊ nang kawnˊ yeuh mapˊ naˊ saecˊ ti peue, kopti aˊyu hk'uˊ Eun Peucawoˊ naˊ kueˊ a hk'aˊnaee ce. Ce hkuinˊ kaw laee cang suip ri yeuh mapˊ naˊ, kopti keutˊ ce lih neum Peucawoˊ Eun naˊ. 10Meuh a kopti aenˊ a naˊ, eˊ cang yawng a aˊnhawˊ ciˊ meuh konˊhk'i Eun Peucawoˊ, aˊnhawˊ ciˊ meuh konˊhk'i ka seucaˊ naˊ. Aˊnhawˊ lawn unˊ yeuh kuˊ cawpˊ maeeˊ unˊ leumeusˊ ecˊawngˊ ri naˊ ce koˊ, unˊ meuh eun konˊhk'i Eun Peucawoˊ.

Leumeusˊ puri

11Pun peˊ ri mhawngˊ leukahˊ aenˊ na tangˊ neum yamla ri naˊ, “Kaw eˊ htukˊ ri leumeusˊ puri.” 12Pawlaee yeuh ri seunˊ Kaiˊnaˊ utˊ eun hk'aˊ seucaˊ rai naˊ, eun toh awngˊ ri naˊ eun. A ciˊ meuh kop keunhawˊ, eun vaeeˊ toh awngˊ ri naˊ eun? Meuh a kopti kuˊ yeuh eun naˊ rai ka daecti kuˊ yeuh eun awngˊ eun naˊ a leupaws seumeuˊ naˊ. 13Ecˊawngˊ naˊ peˊ, bhenˊ keuteˊ naˊ a lawn ces ri peˊ koˊ, pawlaee amˊ. 14Yawng eˊ pun eˊ ri pon vang yeum naˊ eˊ lec vang civit imˊ naˊ meuh a kopti leumeusˊ eˊ ecˊawngˊ ri naˊ ce. Aˊnhawˊ lawn unˊ kueˊ hk'aˊ leumeusˊkeus naˊ koˊ, kawnˊ utˊ eun hk'aˊnaee vang yeum naˊ. 15Aˊnhawˊ lawn ces ri ecˊawngˊ ri naˊ ce koˊ, meuh eun nang toh peue. Yawng peˊ peue toh peue naˊ unˊ kueˊ ce citˊ tip aˊyu tip cotˊcu naˊ hk'aˊnaee Peucawoˊ Eun saecˊ ti peue.

16Meuh a kopti aenˊ a naˊ, eˊ saecˊ maee yawng hk'aˊ leumeusˊkeus naˊ a ciˊ meuh keunhawˊ, meuh a kopti Yesuˊ Hkrit tan Eun aˊyu ri pun eˊ naˊ. Saecˊ eˊ ri eˊ htukˊ ri tan aˊyu ri naˊ pun ecˊawngˊ ri naˊ ce yeut. 17Aˊnhawˊ saecˊ naˊ kueˊ hk'ilˊ leumuil eun saecˊ naˊ nyu ecˊawngˊ ri naˊ hk'oˊ ce tukyak, daecti eun lawn unˊ tukyak ri ce koˊ, hk'aˊ leumeusˊkeus Eun Peucawoˊ naˊ a ciˊ kaw cang utˊ hk'aˊnaee eun yeuh saˊnhawˊ? 18Konˊ leumeusˊ uiˊ naˊ peˊ, pawlaee leumeusˊ puri ri leukahˊ maeeˊ ri moeng ri naˊ palkoe, daecti leumeusˊ puri ri kuˊ yeuh maeeˊ kuˊ leupaws seumeuˊ naˊ reuˊ. 19Meuh a kopti aenˊ a naˊ, eˊ cang yawng utˊ ri hk'aˊ leupaws seumeuˊ naˊ maeeˊ eˊ cang tangˊ hpumˊ ri cumyenˊ nanggalˊ Eun Peucawoˊ 20saecˊ meuh yam hpumˊ eˊ naˊ tangˊ a mapˊ ri tuˊ eˊ naˊ, kopti Peucawoˊ keuting Eun hk'aiˊ hpumˊ eˊ naˊ maeeˊ Eun yawng ku ceu naˊ gawmˊeucˊ.

21Aˊmawo leumeusˊ uiˊ naˊ peˊ, hpumˊ eˊ naˊ a lawn unˊ tangˊ mapˊ naˊ ri eˊ meun koˊ, eˊ kaw hpumˊ keutawnˊ ri nanggalˊ Eun Peucawoˊ. 22Eˊ kaw pun kuˊ hk'oˊ eˊ ri Heun naˊ ku ceu ka, kopti leuceng eˊ ri ti leukahˊ tuilˊ Eun naˊ maeeˊ yeuh eˊ kuˊ htukˊ hpumˊ Eun naˊ. 23Leukahˊ tuilˊ Eun naˊ koˊ meuh a kah eˊ ri yumˊ muis Eun Yesuˊ Hkrit Konˊ aiˊ Eun Peucawoˊ naˊ, maeeˊ kah eˊ leumeusˊ puri seunˊ leukahˊ tuilˊ Eun ri eˊ naˊ. 24Aˊnhawˊ lawn leuceng ri yeuh leukahˊ tuilˊ Eun naˊ koˊ, utˊ eun hk'aˊnaee Peucawoˊ Eun, Peucawoˊ Eun ku utˊ hk'aˊnaee heun. Meuh a kopti aenˊ a naˊ, eˊ cang yawng Peucawoˊ utˊ Eun hk'aˊnaee eˊ, eˊ yawng a yeuhkiˊ ri Citˊ seungaˊ tuilˊ Eun ri eˊ naˊ.

Currently Selected:

1 Yoˊhan 3: blrPL

Highlight

Copy

Compare