رۆما 3

ئێمناهیا خودێ

1مادەم هۆسایە، چ تایبەتیا جوهیان هەیە؟ یان مفایێ سونەتكرنێ چیە؟ 2ژ هەمی لایان ڤە گەلەكە، یا ئێكێ خودێ ئەو كرنە ئەمیندارێن پەیڤێن خۆ. 3ما چیە ئەگەر هندەك ژ وان بێسۆز دەركەفتبن؟ ئایا بێسۆزیا وان دێ سۆزداریا خودێ ژ كار ئێخیت؟ 4حاشا! خودێ یێ راستگۆیە، ئەگەر هەمی مرۆڤ ددرەوین بن ژی. هەروەكو هاتیە نڤیسین:

«داكو تۆ د گۆتنێن خۆ دا راستدار دەركەڤی

و د دادكرنێ دا تۆ ب سەر بكەڤی.»#3‏:4 زەبوور 51‏:4

5لێ ئەگەر نەڕاستیا مە راستداریا خودێ دیار دكەت، ئەم چ بێژین؟ ل ڤێرێ ئەز وەكو مرۆڤەكێ سادە دپرسم: ما خودێ یێ ستەمكارە دەمێ ئەو تۆڕەییا خۆ دبارینیت؟ 6حاشا! پا ئەگەر وەسا بیت، خودێ چەوا دێ جیهانێ داد كەت؟ 7لێ ئەگەر راستیا خودێ ب درەوا من ئاشكراتر لێ هات و د ئەنجام دا مەزناهیا خودێ پتر دیار بوو، ئێدی بۆچی ئەز وەك گونەهكارەكی دهێمە گونەهباركرن؟ 8ئەڤ پرسیارە ژی هەروەكو هندەك كەس بوهتانێ ل مە دكەن كو ئەم دبێژین: «بلا ئەم خرابیێ بكەین، دا باشی ژێ پەیدا ببیت.» سزادانا وان كەسان یا دادپەروەرانەیە.

كەسەك یێ راستدار نینە

9ئەڤجا چ؟ ما ئەم جوهی د چێترین؟ نەخێر، ئێكجار! چنكو مە بەری نوكە دیار كر كو جوهی و یونانی#3‏:9 مەبەست پێ نەجوهی، هەمی پێكڤە د بن هێزا گونەهێ دانە. 10هەروەكو هاتیە نڤیسین:

«كەسەكێ راستدار نینە، خۆ ئێك ژی.

11كەسەك نینە تێبگەهیت،

كەسەك نینە قەستا خودێ بكەت.

12هەمی ڤاڕێ بوون،

و پێكڤە بێوەج بوون.

كەسەك نینە قەنجیێ بكەت،

خۆ ئێك ژی نینە.#3‏:10‏-12 زەبوور 14‏:1‏-3؛ 53‏:1‏-3؛ ئاقلمەند 7‏:20

13گەوریا وان گۆڕەكێ ڤەكریە،

ب ئەزمانێ خۆ خاپاندنێ دكەن.#3‏:13 زەبوور 5‏:9

ژەهرا ماران د بن لێڤێن وان دایە.#3‏:13 زەبوور 140‏:3

14دەڤێ وان ژ نفرین و تەحلاتیێ یێ پڕە.#3‏:14 زەبوور 10‏:7

15پێیێن وان ژ بۆ خوینڕشتنێ ب لەز دكەڤن.

16د شووپا وان دا وێرانكرن و پەریشانی یا هەی،

17و ئەوان رێكا ئاشتیێ نەزانیە.#3‏:15‏-17 ئیشایا 59‏:7‏-8؛ پەند 1‏:16

18ترسا خودێ ل بەر چاڤێن وان نینە.#3‏:18 زەبوور 36‏:1»

19ئەڤجا ئەم دزانین هەر تشتێ دەستوور دبێژیت، بۆ وان مرۆڤان دبێژیت یێن كو د بن دەستهەلاتا دەستووری دا، داكو هەمی دەڤ بهێنە گرتن و جیهان هەمی بكەڤیتە د بن لێپرسینا خودێ ڤە. 20چنكو ب ئەنجامدانا دەستووری چ كەس ل بەر خودێ راستدار#3‏:20 ئانكو بێگونە‍‌ھ دەرناكەڤن، ژ بەر كو ب دەستووری گونە‍‌ھ دهێتە نیاسین.

مرۆڤ ب باوەریێ ل نك خودێ راستدار دەردكەڤیت

21لێ نوكە راستداریا خودێ، جودا ژ دەستووری، ئاشكرا بوویە، دەستوور و پەرتووكێن پێغەمبەران ژی شاهدەییێ بۆ ڤێ چەندێ ددەن. 22ئەڤ راستداریا خودێ، یا ب رێكا باوەریئینانا ب عیسایێ مەسیح دهێت، بۆ وان هەمیانە یێن باوەریێ دئینن، چنكو چ جوداهی د ناڤبەرا مرۆڤان دا نینە.#3‏:20‏-22 گالاتیا 2‏:16 23ژ بەر كو هەمیان گونە‍‌ھ كر و نەگەهشتنە مەزناهیا خودێ، 24لێ ئەوێن باوەریێ دئینن، ب كەرەما خودێ بێ بەرامبەر بێگونە‍‌ھ دهێنە هژمارتن، ب رێیا رزگاركرنا ب مەسیح عیسای هاتی. 25خودێ ئەو وەكو كەفارەتەك#3‏:25 كەفارەت: ئەو قوربانە یا تۆڕەییا خودێ ژ سەر مرۆڤی رادكەت. ب خوینا وی پێشكێش كر، بۆ ئەوێن باوەریێ پێ بینن. وی ژ بۆ دیاركرنا راستداریا خۆ ئەڤە كر، چنكو وی ب بێهنفرەهیا خۆ چاڤپووشی ژ گونەهێن بوری كر. 26وی ژ بۆ دیاركرنا راستداریا خۆ د دەمێ نوكە دا ئەڤە كر، دا ئەو یێ دادپەروەر بیت و یێ باوەریێ ب عیسای بینیت بێگونە‍‌ھ دەربئێخیت.

27ئەڤجا چ مایە ئەم شانازیێ پێ ببەین؟ چ نەما. ب چ یاسا نەما؟ ئایا ب یاسایا كریاران؟ نەخێر، لێ ب یاسایا باوەریێ. 28چنكو ئەم یێن گەهشتینە وێ پشتڕاستیێ كو مرۆڤ ب باوەریێ راستدار دەردكەڤیت، جودا ژ كریارێن دەستووری. 29ما خودێ یێ جوهیان ب تنێیە؟ ما ئەو نە یێ مللەتێن دی ژییە؟ بەلێ، ئەو یێ مللەتێن دی ژییە، 30چنكو خودێ ئێكە و ئەو دێ یێن سونەتكری#3‏:30 سونەتكری: مەبەست پێ جوهینە. ژ بەر باوەریا وان و یێن سونەتنەكری#3‏:30 سونەتنەكری: مەبەست پێ یێن نە جوهی. ژی ب باوەریێ راستدار دەرئێخیت.

31ئەگەر هۆسا بیت، ما ئەم ب باوەریێ دەستووری ژ كار دئێخین؟ حاشا! لێ ئەم دەستووری دسەلمینین.

Currently Selected:

رۆما 3: BHD

Highlight

Copy