رۆما 10
10
1گەلی خویشك و برایان، حەزا دلێ من و هیڤیا من ژ خودێ ژ پێخەمەت ئیسرائیلیان، قورتالبوونا وانە. 2ئەز ژ بۆ وان شاهدەییێ ددەم كو ئەو گەلەك ب گەرمی حەز ژ خودێ دكەن، لێ ئەڤ دلگەرمیە نە ل گۆر زانینێیە. 3چنكو ئەو دەربارەی راستداریا ژ خودێ دهێت، د نەزان بوون و بزاڤ دكر كو ئەو ب خۆ راستداریێ پێكبینن، ئەڤجا ملكەچی راستداریا خودێ نەبوون. 4چنكو ب مەسیحی ئارمانجا دەستووری ب جھ هات، داكو هەر كەسێ باوەریێ بینیت، راستداریێ وەرگریت.
قورتالبوون بۆ هەمی كەسان یا هەی
5مووسا دەربارەی راستداریا ژ دەستووری دهێت، هۆسا دنڤیسیت: «هەر كەسێ ڤان تشتان ب جھ بینیت، دێ پێ ژیت.»#10:5 پەرستن و پیرۆزی 18:5 6لێ راستداریا ژ باوەریێ دهێت ڤێ دبێژیت: «د دلێ خۆ دا نەبێژە: كی دێ سەركەڤیتە ئەسمانی؟» (ئانكو دا مەسیحی بینیتە خوارێ،) 7یان ژی: «كی دێ داكەڤیتە ناڤ چاڵا بێ بن#10:7 چاڵا بێ بن: ب یونانی دبێژنێ: ‹ئەبیسۆس›. ل فەرهەنگۆكێ بنێڕە.؟» (دا مەسیحی ژ ناڤ مریان سەربئێخیت.) 8لێ چ دبێژیت؟ «پەیڤ یا نێزیكی تەیە، ل سەر ئەزمانێ تەیە و د دلێ تە دایە» (ئانكو پەیڤا باوەریێ یا ئەم رادگەهینین.)#10:6-8 گۆتارا مووسای 30:12-14 9چنكو ئەگەر تۆ ب دەڤێ خۆ دانپێدانێ بكەی كو عیسا خودانە و ب دلێ خۆ باوەریێ بینی كو خودێ ئەو ژ ناڤ مریان راكریە، تۆ دێ قورتال بی. 10مرۆڤ ب دلی باوەریێ دئینیت و راستدار دهێتە دەرئێخستن، ب دەڤی ژی دانپێدانێ دكەت و قورتال دبیت. 11هەروەكو نڤیسارا پیرۆز دبێژیت: «هەر كەسێ باوەریێ پێ بینیت، ناهێتە شەرمزاركرن.»#10:11 ئیشایا 28:16 12ژ بەر كو چ جوداهی د ناڤبەرا یێ جوهی و یێ نەجوهی دا نینە، هەمان خودان خودانێ هەمیانە، یێ مەردە بۆ هەمیێن هەوارا خۆ دگەهیننە ناڤێ وی. 13چنكو: «هەر كەسەكێ هەوارا خۆ بگەهینیتە ناڤێ خودانی، دێ قورتال بیت.»#10:13 یۆئێل 2:32
14لێ ئەو دێ چەوا هەوارا خۆ گەهیننە وی یێ وان باوەری پێ نەئینای؟ و چەوا دێ باوەریێ ب وی ئینن، یێ دەربارەی وی چ نەبهیستی؟ و چەوا دێ بهیسن بێی كو كەس بۆ وان رابگەهینیت؟ 15و ئەو دێ چەوا راگەهاندنێ كەن، ئەگەر نەهێنە هنارتن؟ هەروەكو هاتیە نڤیسین: «پێیێن وان یێن مزگینیا خێرێ دئینن، چەند د جوانن!»#10:15 ئیشایا 52:7 16لێ هەمیان گوهداریا مزگینیێ نەكر، چنكو ئیشایا دبێژیت: «خودان، كێ باوەر ژ پەیاما مە كر؟»#10:16 ئیشایا 53:1 17ئەڤجا باوەری ژ بهیستنێ دهێت و بهیستن ژی ب رێكا پەیاما مەسیحی دهێت. 18لێ ئەز دبێژم: ما وان نەبهیست؟ بەلێ، وان بهیست، چنكو:
«دەنگێ وان ل هەمی ئەردی چوو
و ئاخفتنێن وان گەهشتنە هەر چوار كوژیێن جیهانێ.»#10:18 دەنگێ وان… ئاخفتنێن وان: دەنگ و ئاخفتنێن گەردوون و ئەسمانینە. زەبوور 19:4
19ئەز دیسان دبێژم: ما ئیسرائیل د ڤێ چەندێ نەگەهشت؟ ل بەراهیێ مووسا دبێژیت:
«ئەز دێ چاڤپێڕانەبوونا هەوە ب رێكا وان یێن كو نەمللەتن ئازرینم
و دێ هەوە ب مللەتەكێ كۆرەفام تۆڕە كەم.»#10:19 گۆتارا مووسای 32:21
20پاشی ئیشایا ب وێرەكی دبێژیت:
«ئەز ژ لایێ وان ڤە هاتمە دیتن یێن كو ل من نەدگەڕیان،
من خۆ بۆ وان دیار كر یێن پرسیارا من نەدكر.»#10:20 ئیشایا 65:1
21لێ دەربارەی ئیسرائیل ئەو دبێژیت:
«ب درێژاهیا رۆژێ من دەستێن خۆ بۆ مللەتەكێ نەگوهدار و سەرهشك درێژ كرن.»#10:21 ئیشایا 65:2
Currently Selected:
رۆما 10: BHD
Highlight
Share
Copy
Want to have your highlights saved across all your devices? Sign up or sign in
All rights reserved.
