Mataayo 28

Kifyukha kwa Yeesu

1Lyaganile kishila ilijuva lya Sabaato, kwaganile kihenga kunena pa lisiku lya Nguluvi, uMaliya uwa ku Magidala lumo nu Maliya uyunji, vaaluta kiloleela ilijooja lila. 2Loleela, kukhandi kuna ludegenkho lukhome mu nyi. Umalayikha wa Mutwa uNguluvi wáyiikha kihuma kushaanya, wáhejeela pa lijooja, wálibiilusa ilingʼanga lila palubali na kilikhalila. 3UMalayikha uyo akhandi ingʼaala ngaja wuvalafu wa lumuli lwa noonya, amenda gaakwe gakhandi mavalafu ngaja mbalavala. 4Avasulukhali vala vaganile kigaaga ago, vatiila mandu na vaava ngaja vafwile. 5Leelo uMalayikha uyo wávajovela avashimaayi vala wáaja, “Musikhatiilaji! Nimeenye kiija, muyinsile kimusakula uYeesu yuna vamukhomelelaga pa musalaaba. 6Akwasiina apa, wáfyukha ngaja shina akhandi avajoveele. Yinsi muloleele pina vakhandi vamugoniise. 7Lino lutaji nyangu muvajovele avamanyisiwa vaakwe kiija, ‘Wáfyukha, wálongola kiluta ku nyi ya Galilaya. Ukho kukwene kuna musimwaje.’ Musikhasamwaji gina navajovela!”

8Baheene avashimaayi vala vawuukha nyangu mu lijooja kwa shitiilo nu wushendeefu wukhome. Vaasiga kiluta kivajovela avamanyisiwa va Yeesu, ngaja shina umalayikha yula wávajovelaga. 9Lino uluhaavi luna viiluta, loleela, uYeesu wátangaana na vashimaayi vala, wávahunjila wáaja, “Kamwene vanyineesu!” Avashimaayi awo vamuvejeela uYeesu, vafugama na kimukhata amagulu gaakwe na kimufuunya. 10Baheene uYeesu wávajovela wáaja, “Musikhatiilaji. Lutaji muvajovele avalukholo lwangu#28:10 Avalukholo lwangu: Uluganulo lwakwe, vamanyisiwa vangu. valute ku Galilaya kuna vasinyaaje.”

Avayangalilaaji vilogola uwudehi

11Avashimaayi vala pina vali mu nsila vijenda, avasulukhali vamonga vina vakhandi viyangalila ilijooja lya Yeesu, vawuukha viiluta mu lijumbi lya Yelusalemu. Vaafikha kivataviilila avatambule avakhome, goona gina gasenjekha.

12Baheene avakhome va vatambule vala vatangaana lumo na vakhome va Vayahuudi, vapulinkhana na kilamula kivahonga ihela nyinshi avasulukhali vala. 13Vavajovela vaajova, “Nda umuunu yoyoona avapose ulwa gina gasenjekha mujovaje kiija, ‘Avamanyisiwa va Yeesu vayinsa vahiija umufimba gwakwe paashilo pina tigonile utulo.’ 14UPilaato nda apulishe ago, ose tisilogole nawo, baheene omwe musilafisiwa.” 15Avasulukhali vala vayanushila ihela sila, valogola kwa vaanu ngaja shina avakhome va Vayahuudi vavajovelaga. Imola iso sayalaliile mandu kwa Vayahuudi, mbakha iminsiyaano sipiyalaalila.

Indaji ya Yeesu iya wudugo kwa vamanyisiwa vaakwe

(Maluko 16:14-18; Luuka 24:36-49; Yohana 20:19-23; Nsengo sa Vanandeje 1:6-9)

16Avamanyisiwa va Yeesu ishumi na yumo valutaga ku Galilaya ku shidunda shina uYeesu wávalajisaaga. 17Ukho vamwaga, vamufuunya, leelo avamanyisiwa vamonga vakhandi vana muninu muninu nu Yeesu. 18UYeesu wáhejeela, wávajovela avamanyisiwa vaakwe wáaja, “UNguluvi anipeelile uwutawulilwa woona kushaanya na mu nyi. 19Lino, lutaji kwa vaanu va nyi soona na muvagahe vave vamanyisiwa vangu, na kimutwinia shila muunu, kwa litaawa lya Daada uNguluvi, lya Lusawo ni lya Numbula uMunofu. 20Muvamanyisaaje kigayinatila goona gina navalajisa omwe. One nikhava lumo noomwe uluhaavi loona, mbakha ilisiku lya wuhigo.”

Currently Selected:

Mataayo 28: Shisangu

Highlight

Copy

Compare