Mataayo 27

UYeesu itwalwa kwa Pilaato

(Maluko 15:1; Luuka 23:1-2; Yohana 18:28-32)

1Kwaganile kiisha ulwamilaawu, avatambule avakhome woona lumo na vakhome va Vayahuudi, vapulinkhana shina vasimusitaashe uYeesu kiija abudwe. 2Vamupinya, vamutwala kwa Pilaato, umunjaajila wa Shiluumi.

UYuuda ikiyikunga

(Nsengo sa Vanandeje 1:18-19)

3Lino uYuuda, yula yuna wámudolelaga uYeesu kwa valugu, wáganile kiwona kiija, uYeesu wáahigwa kibudwa, wáyipiikhaga. Wátoolile ihela sila silinje mashumi gatatu na kisiwuyiisa kwa vatambule avakhome na vakhome va Vayahuudi. 4Wávajovela wáaja, “Naagaha wunansi kimudoolela kunyeenyu umuunu yuna asinanjile lyolyona.” Leelo aveene vaajova, “Ose tisikigatuna ago, ago gaakho yuuwe.” 5Baheene uYuuda wásitaaga ihela sila mu lukeeke lwa nanda imbaagule iya kifuunyila, wáwuukha, wáaluta kiyikunga. 6Avatambule avakhome vaahola ihela sila, valogola vaajova, “Mwikho kihansa ihela isi ni sa mu nanda imbaagule iya kifuunyila, kiiva sahombwa kwa lugulumilo ulwa kiija umuunu abudwe.”#27:6 Sahombwa kwa lugulumilo ulwa kiija umuunu abudwe: Kwa Shiyunaani yiyandiikhwe, hela sa danda. 7Lino vapulinkhana na kilamula kitoola ihela sila, vagulila umugunda kwa muwumba figaana, baheene vavasiilaje avahensa umo. 8Lulwene umugunda ugo gutambulwa Mugunda gwa Danda, mbakha iminsiyaano.

9Baheene iliswi likwilane lina uNguluvi wálilogolaga kwa nsila ya mukuwamalago uYelemiya kiija, “Vatoolaga ihela silinje mashumi gatatu, sina aVaisilaheli vakhandi vapanjile kiija sisikwile kimugula umuunu uyo. 10Vagulilaga umugunda kwa muwumba figaana, ngaja shina uMutwa uNguluvi wánilajisaaga.”#27:9-10 Yimba mu litaafili lya Sekhaliya 11:12-13; Yelemiya 19:1-13; 32:6-9.

UYeesu iihigwa kwa Pilaato

(Maluko 15:2-15; Luuka 23:2-3, 18-25; Yohana 18:29–19:16)

11Baheene uYeesu wáyiima pamwandi ya munjaajila uPilaato. UPilaato wámuposa wáaja, “Wuli, owe yuuwe Mutwa wa Vayahuudi?” UYeesu wámuyankha wáaja, “Owe shiyooli wilogola.” 12Lino avatambule avakhome na vakhome va Vayahuudi vayansa kimusitaakha uYeesu, leelo umwene asikhavagomoseese lyolyona. 13Baheene uPilaato wámuposa wáaja, “Wuli, usipulikha ago goona gina vikikusitaakha?” 14Leelo uYeesu asikhavagomoseese hata liswi limo. Baheene uPilaato wáswigaga mandu.

15Shila mwakha, uluhaavi lwa shiwungo sha Pasaakha, umukhome uyo akhandi ana ngʼoma iya kivadindulila umudindilwa yumo, yuna avaanu vikimudobokha. 16Lino mu luhaavi lula, kukhandi kuna mudindilwa yumonga, ilitaawa lyakwe akhandi yu Balaaba. Umudindilwa uyo akhandi amanyiishe mandu kwa kiiva ya wunansi waakwe. 17Ndeeno avaanu vaganile kikungaana, uPilaato wávaposa wáaja, “Yu naani yuna mwisakula nivadindulile mu vadindilwa vavili ava? Wuli, mwisakula nivadindulile uBalaaba yuna akhandi amanyiishe mandu kwa wunansi waakwe, awu uYeesu yuna avaanu vikimutambula Mukulusaaji#27:17 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. ?” 18UPilaato wávaposaaga ndeeno kwa kiiva wámanyaga kiija, avakhome va Vayahuudi vaaluta nu Yeesu kunyaakwe, kwa kiiva ya jiila.

19UPilaato pina akhandi akheele pa shitengo shaakwe isha kihijila, umudala waakwe wáfilikhaga iliswi wáaja, “Usikhajelaga kimugahila lujowo loloona uluvi umuunu uyo, mugolofu. Iminsiyaano naalava mandu paashilo mu malooto kwa kiiva yaakwe.”

20Leelo avatambule avakhome na vakhome va Vayahuudi, vavabembelesaaga avaanu kiija vamulombe uPilaato, avadindulile uBalaaba na kimuhiga uYeesu, kiija abudwe. 21UPilaato wávaposa khanji wáaja, “Yu naani yuna mwisakula nivadindulile mu vadindilwa ava vavili?” Vamuyankha vaajova, “Tisakula utudindulile uBalaaba.” 22UPilaato wávaposa khanji wáaja, “Lino nimugahe shishi uYeesu yuna vikimutambula kiija, Mukulusaaji?#27:22 Mukulusaaji: Kwa Shiyunaani yiyandiikhwe Kilisito.” Avaanu woona valyova vaajova, “Umukhomeelele pa musalaaba!” 23UPilaato wávaposa khanji wáaja, “Umuunu uyu wáagaha luvi lushi?” Leelo aveene vashilile kilyova viijova, “Umukhomeelele!”

24UPilaato pina wámanyaga kiija, asikwiliile kigamena amahiiva ga vaanu vala, kiiva ilibaatu likhandi lipiyonjelela, wátoolile amalenga wáyansa kiyiyooga amawokho gaakwe paveene, wávajovela wáaja, “One nigaya wuvi ni danda ya muunu uyu umunya shiyooli, ago, gahaji yuumwe!” 25Avaanu woona vamugomosesa vaajova, “Ulujowo ulo ulwa kimubuda luve kunyeesu na vaneesu!” 26Baheene uPilaato wávadindulila uBalaaba ngaja shina vamulombile, leelo wávalajisa avasulukhali vaakwe kiija, vamutove uYeesu na majalidi na kimukhomeelela pa musalaaba.

Avasulukhali vikimubeda uYeesu

(Maluko 15:16-20; Yohana 19:2-3)

27Baheene avasulukhali vamutwalaga uYeesu mukhati mu mbalino ya munjaajila uPilaato, baheene avasulukhali woona vakungaanile na kimupilima uYeesu. 28Vamuyaawula amenda gaakwe uYeesu na kimufwasa inkhansu induuhu. 29Vanienga injoola ya mimfwa, vamufwasa ku mutwe na kiluviikha ulukwegu ku liwokho lyakwe ilya kundiilo, baheene awoneshe ngaja mutwa. Vafugama pamwene ngaja vikimufuunya na kiyansa kimubeda kwa masalo vaajova, “Aaje senga, Mutwa wa Vayahuudi!” 30Baheene vayansa kimufuunyila amata uYeesu, vatoola ulukwegu lula ku liwokho lyakwe na kimutovela ku mutwe. 31Avasulukhali awo vaganile kimubeda na kimuneenela, vamuyaawula inkhansu yila, vamufwasa khanji amenda gaakwe. Baheene vaaluta kimukhomeelela pa musalaaba.

UYeesu ikhomeelelwa pa musalaaba

(Maluko 15:21-32; Luuka 23:26-43; Yohana 19:17-27)

32Avasulukhali pina vakhandi vikimutwala uYeesu kimukhomeelela, mu nsila vatangaanaga nu muunu yumonga yuna akhandi itambulwa Simoni. Umuunu uyo akhandi mukhaaya wa lijumbi lya Kileene. Avasulukhali awo vamukhamiilisa asumule umusalaaba gwa Yeesu. 33Kuwudugo, vaafikha uluvala luna lutambulwa Goligota, uluganulo lwakwe, Lipangalasa lya Mutwe. 34Baheene vamupeela uYeesu idivaayi yina vahansiise nu mugoda umukhali, baheene asikhawonaga uwuvafi. Leelo pina wájesaaga, asikhadobweshe kiingʼwa. 35Vaganile kimukhomeelela pa musalaaba, vagavana amenda gaakwe kwa kiviikha ululagusanio, kiija yu naani atoole guli kwi [baheene likwilane iliswi lina lyajowaagwa ulwa Yeesu kwa nsila ya munyaayumo uwa wakuwamalago kiija, “Vagavanaga amenda gangu nagu mwenda gwangu vagutovelaga ikuula.”]#27:35 Amaswi aga, gakusiina mu mayandikhwa agamonga amakuulu. Yimba mu litaafili lya Sabuli 22:18. 36Baheene vaakhala pala, vamuyangalila. 37Pashaanya ya mutwe gwakwe pa musalaaba, vakhomeleelaga ishimanyilo shina shiyandiikhwe amaswi aga kimuhiga kiija,

“Uyu yu Yeesu, uMutwa wa Vayahuudi.”

38Pa luvala apo, vakhandi vakwali avaanu vavili vina vakhandi vapokhaaji. Avasulukhali vavakhomeelela avaanu awo lumo nu Yeesu, yumo ulubali lwa kundiilo na uyunji ulubali lwa kunshiji. 39Avaanu vina vakhandi viishila mu nsila vikimwaga uYeesu pa musalaaba, vakhandi videgensa amatwe gaanave na kimusala, vakhandi viijova, 40“Wuli, usili yuuwe yuna ukhandi ukiyihala kiija, hambi ukiyibomola inanda iya Nguluvi na kiyisenga khanji kwa nsiku sitatu? Lino nda uli Lusawo lwa Nguluvi, yikulusa yuuwe, yiikha pa musalaaba!” 41Shiisho ndeeno, avatambule avakhome na vamanyisaaji va ndaji sa Musa lumo na vakhome va Vayahuudi vikimubeda uYeesu viijova, 42“Uyu wávakulusaaga avanji, leelo igombola kiyikulusa yumwene! Nda umwene mutwa wa Vaisilaheli, ayiishe pa musalaaba, baheene na yuuse timuhuviilile. 43Umwene amuhuviliile uNguluvi, lino nda mugani, uNguluvi amukuluse, kwa kiiva akhandi ilogola iijova, ‘One nili Lusawo lwa Nguluvi.’” 44Avanansi vina avasulukhali vavakhomelelaga lumo nu Yeesu, woope vakhandi vikimuliga ngaja avanji shina vamuligaga.

UYeesu iifwa pa musalaaba

(Maluko 15:33-41; Luuka 23:44-49; Yohana 19:28-30)

45Kihuma ilisala ilya mutanda paminsi mbakha ilisala lya gonja, inshiisi yagubikhaga inyi yila yoona. 46Mu lisala lya gonja, uYeesu wákhosiise mandu ishawuti wáaja, “Eli! Eli! Lama sabakhitani?” Uluganulo lwakwe, “Nguluvi wangu! Nguluvi wangu! Kwashi wanilekha?”#27:46 Yimba mu litaafili lya Sabuli 22:1. 47Avaanu vamonga vina vakhandi vayiimile pala, vaganile kipulikha ulo vaajova, “Uyu ikimushemeela umukuwamalago uEliya.”#27:47 UEliya: Uyo ilogolwa apa kwa kiiva ya kiija aVayahuudi vinshi vakhandi vikimuhuviilila kiija uEliya asikhafwile kaa, leelo uNguluvi wámutoolaga mu nyi pina ali muumi na kiluta nawo kushaanya. Khanji vakhandi vaheepile kiija, uEliya asiyinse khanji mu nyi. Yimba mu litaafili lya 2 Vatwa 2:11; Malaaki 4:5. 48Umunyaayumo wa vasulukhali wásigaga nyangu, wáaluta ni hamba, wáyijabikha mu divaayi inkhali, wáyiviikha ihamba yila mu lulansi, wámupeela uYeesu angʼwe. 49Leelo avasulukhali avanji vaajova, “Lekha tiloleele nda umukuwamalago uEliya iyinsa kimukulusa!” 50Baheene uYeesu wákhoola khanji kwa shawuti nkhome, wáafwa.

51Uluhaavi luulo, umwenda#27:51 Umwenda: Umwenda ugu gugwene gwabagulaga mbali sivili mu nanda ya Nguluvi. Ulubali lumo Panofu, ulubali ulunji Panofu pa Panofu. Yimba iliswi Nanda imbaagule iya kifuunyila mu Maswi aMahensa. guna gukhandi gubagwile mbali sivili mu nanda ya Nguluvi, gwadeemukha paakhati kihuma kushaanya mbakha pansi, gwabagunkhana mbali sivili. UNguluvi wápinsaaga inyi yidegenshe, amapaama galandukha, 52amajooja gagubutukha, amavili minshi ga vabaagule va Nguluvi vina vakhandi vafwile, vafyukha. 53UYeesu wáganaga kifyukha, avaanu awo vaahuma mu majooja, vayinjila mu lijumbi ilibaagule ilya Yelusalemu, vavatwiwushilaga avaanu vinshi.

54Umuyimililaaji wa vasulukhali lumo na vala vina vakhandi vikimuyangalila uYeesu, vaganile kilwaga uludegenkho na ganji goona gina gawonekhaga, vatiilaga mandu, valogolaga vaajova, “Shiyooli umuunu uyu, akhandi Lusawo lwa Nguluvi!”

55Lino vakhandi vakwali avashimaayi vinshi pala, vina vakhandi vamufwatile uYeesu kihuma ku Galilaya na kimusunga. Avashimaayi vala vayiimile kwa kutali, viloleela goona gina gakhandi gisenjekha. 56Mu vashimaayi vala, akhandi akwali uMaliya uwa ku Magidala, uMaliya umaayi wa Yaakobo nu Yusufu, nu maayi wa vashina Sebedayo.

UYeesu iviikhwa mu lijooja

(Maluko 15:42-47; Luuka 23:50-56; Yohana 19:38-42)

57Yaganile kiiva shaamihe, wáyinsile umumanyisiwa yumonga wa Yeesu, ilitaawa lyakwe yu Yusufu. Umuunu uyo akhandi muwusi yuna wáhumile mu lijumbi lya Alimataaya. 58UYusufu wálutile kwa Pilaato na kilomba umufimba gwa Yeesu. Lino uPilaato wávalajisa avasulukhali vaakwe kiija, vamupeele umufimba gula. 59UYusufu wálutile, wágutoola umufimba gula na wáguvilinjisa na menda amavalafu. 60Wáguviikha umufimba mu lijooja#27:60 Lijooja: Ingʼoma ya Vayahuudi ya kisiila avaanu, vakhandi vikivaviikha vina vafwile mu lijooja lina likhandi lihimbe mu shidunda na kiviikha ilingʼanga pa mulyango. lyakwe ilipya, lina likhandi lihimbe nkhaani mu shidunda. Baheene wálibiilusa ilingʼanga ilikhome, wáliviikha pa mulyango gwa lijooja lila, wáwuukha. 61Mu luhaavi ulo, uMaliya uwa ku Magidala nu Maliya uyunji, vaakhala pala viloleela pa lijooja.

Avasulukhali vikiliyangalila ilijooja

62Pamulaawu njine pina likhandi lijuva lya Sabaato, avatambule avakhome na Vafalisaayo vakungaanile kwa Pilaato. 63Baheene vamujovela vaajova, “Wee mutwa, tikumbukha kiija, yula umujanjilisaaji, wálogolaga pina akhandi asinaafwe kiija, ‘Pa lisiku lya wutatu nikhafyukha.’ 64Lino tilomba uvalajise avasulukhali vaakho, valiyangalile ilijooja mbakha mu lisiku lya wutatu. Nda usiviikha ava kiliyangalila, avamanyisiwa vaakwe vakwiliile kiyinsa kihiija umufimba gwakwe na kivajanga avaanu kiija, wáfyukha kihuma kwa vina vafwile. Nda ago gakhasenjekha, uwudehi uwo wukhava wuvi mandu kishila uwa wutasi.”#27:64 Uwudehi wa wutasi: Uluganulo lwakwe kiija, avakhome va Vayahuudi vakhandi vihiiva kiija, uwudehi wa wutasi wa Yeesu wuweene wuna wáyilogolelaga mwene kiija, yu Mukulusaaji. 65UPilaato wávayankha wáaja, “Vatooli avasulukhali, lutaji ku lijooja na kiliyangalila kwa ngufu seenyu soona.” 66Baheene vaaluta ku lijooja, vaviikha ishimanyilo pa lingʼanga, baheene avaanu vagombole kilibilusa. Kuwudugo, avakhome vala vavalekha avasulukhali pala pa lijooja, kiija valiyangalile.

Currently Selected:

Mataayo 27: Shisangu

Highlight

Copy

Compare