Nsengo sa Vanandeje 16

UPawulo ikimutoola uTimoteo

1UPawulo nu Siila vaafikha ku lijumbi lya Delibe, kuunyuma vaafikha ku Lisitila. Ukho ku Lisitila akhandi iikhala umuhuvililaaji wa Yeesu yumonga, ilitaawa lyakwe wátambulwagwa Timoteo. Umaayi waakwe akhandi Muyahuudi yuna wámuhuvililaga uYeesu, leelo uwiihe asikhandi Muyahuudi. 2Avahuvililaaji vayine va ku lijumbi lya Lisitila na ku Ikoniyo vakhandi vikimusufya uTimoteo kwa lujendo lunofu. 3UPawulo akhandi isakula kiija vashuule lumo nu Timoteo. Ndeeno, uPawulo wámuyinjisa ijando. Wágahaga ndeeno kiija aVayahuudi vina vali mu majumbi gala vasikhamukhaanaga, kwa kiiva vamanyaga kiija uwiihe akhandi asili Muyahuudi. 4Wáganile kiyinjisiwa ijando uTimoteo, uPawulo na vayine pina viishila mu majumbi ga kula, vakhandi vikivajovela avahuvililaaji indaji sina savishiilwe na vanandeje na vayimililaaji va shipuga sha vahuvililaaji ava ku Yelusalemu, kiija vasiyinatile. 5Ndeeno ishipuga sha vahuvililaaji va Yeesu vayitenekha kikhangala mu lihuuvi na kiyonjelela avanji vinshi nsiku soona.

UPawulo ikigaaga amahilu

6UNumbula uMunofu wávakhaanaga uPawulo na vayine, kiija vasikhajelaga kikhoma iliswi lya Mutwa uYeesu mu nyi ya Asiya. Baheene vaashila mu nyi ya Filigiya ni nyi ya Galatiya. 7Vaganile kifikha paakhati ya nsala ya nyi ya Misiya ni ya Bitiniya, vaajesa kiyinjila mu nyi ya Bitiniya, leelo uNumbula wa Yeesu asikhavatawiile. 8Baheene vaashila mu nyi ya Misiya, vaaluta mu lijumbi lya Tulowa. 9Paashilo uPawulo wágaaga amahilu. Mu mahilu ago, wámwaga umuunu yumonga uwa ku nyi ya Makedoniya ayiimile, ikimusimila mandu iijova, “Lowokha, uyinse ku nyi ya Makedoniya, ututanje.” 10UPawulo wáganile kigaaga amahilu ago, wátujovela. Gwalimo tayipinyanga#16:10 Tayipinyanga: Apa, uLuuka umuyandikhaaji uwa litaafili ili, akhandi lumo nu Pawulo nu Siila mu lushuulo lwanave. Yimba mu litaafili lya Nsengo sa Vanandeje 16:10-17. kiluta ku nyi ya Makedoniya, kwa kiiva tamanyaga kiija uNguluvi atushemeelile kivakhoma iMola iNofu avaanu vala.

ULidiya ikimuhuviilila uYeesu

11Baheene tashuula kihuma ku Tulowa ni shipugo ishikhome, taaluta shiluta, taafikha mu shigunguli sha Samotilake. Kwaganile kiisha, tayitenekha nu lushuulo, taafikha mu lijumbi lya Neyapoli. 12Apo, tashilekha ishipugo. Tawuukha, taafikha ku Filipi lina likhandi lijumbi likhome lya ku nyi ya Makedoniya, lina aValuumi vakhandi viitema. Taakhala mu lijumbi lila nsiku nsheefu.

13Pa lijuva lya Sabaato taahuma kunja ya lijumbi, taaluta mulubali lwa mukhoga, tayihuviilila kiija, taali tipate pina aVayahuudi vikimufuunya uNguluvi. Baheene taakhala, talogola na vashimaayi vina vakungaanile pala. 14Mu vala vina vatupulisaaga, akhandi akwali uwashimaayi yumonga, ilitaawa lyakwe yu Lidiya. Uyo wáhumaga ilijumbi lya Tiyatila, akhandi ihuviilila ilihuuvi ilya Shiyahuudi. Akhandi isenga insengo ya kigusa amenda ga langi ya mwalaala. UPawulo wáganile kivajovela iMola iNofu, uLidiya wápulisaaga wunofu, uMutwa uYeesu wádindula inumbula ya Lidiya, wáhuviilila. 15Baheene wátwinisiwa lumo na vaanu va mukhaaya yaakwe, wátusimila kiija tilute kunyaakwe wáaja, “Nda mwanyaaga kiija, shiyooli namuhuviilila uMutwa uYeesu, shoshi mukhale kunyangu.” Wátuhonsa mandu.

UPawulo nu Siila vadindiilwe na kidindulilwa mu shifungo

16Ilijuva limonga, pina tiiluta pa luvala luna avaanu vakhandi vikimufuunya uNguluvi, wáyinsa umuhinja yumonga umuvanda, yuna akhandi ni lilungu. Ililungu ilyo likhandi likimupeela ingufu isa kilagula gina giyinsa kumwandi. Kishilila kwa muhinja uyo avakhome vaakwe vakhandi viipata ihela nyinshi. 17Umuhinja uyo akhandi ikitufwata ose nu Pawulo, kuno ilyova ilyowo iijova, “Avaanu ava vavanda va Nguluvi uMukhome! Vikivakhoma insila iya wukulukho!” 18Akhandi iigaha ndeeno nsiku nyinshi. Leelo ilijuva limonga uPawulo wákhalalaga mandu, wáseetukha, wálikhajila ililungu lila wáaja, “Nikikujova kwa litaawa lya Yeesu Kilisito, huma kwa muhinja uyu!” Baaho ililungu lila lyamuhuma.

19Avanya wusi va muhinja yula, vaganile kiwona kiija insila yina vakhava vipatila ihela yananjikha, vavakhata uPawulo nu Siila, vavakuluuna, vavatwala kwa vayimililaaji va lijumbi. 20Vavasitaakha vaajova, “Avaanu awo aVayahuudi, vapinsiise ilibaatu likhome mu lijumbi lyesu ili. 21Vimanyisa kiija tiyinatile ingʼoma saanave sina indaji seesu ose Valuumi sisisakulwa kisiyiitikha, hata kisiyinatila.”

22Ililugu lya vaanu lyayiima papaamo na vina vavasitaashile, lyavahalushila uPawulo nu Siila. Baheene avayimililaaji vaajova kiija, vavayaawule amenda uPawulo nu Siila, vaajova vatowe ni njambo. 23Vaganile kivatova mandu, vavadindila mu shifungo. Baheene avayimililaaji vamulajisa umuyangalilaaji kiija, avayangalile wunofu. 24Vaganile kimulajisa ndeeno, woope umuyangalilaaji wávahulusa kumwandi mukhati mandu, wávapinya amagulu gaanave mu masinkha amakhome.

25Shaganile kifikha ishilo sha paakhati, uPawulo nu Siila vakhandi vikimufuunya uNguluvi na kiyeyema kwa kimusufya. Avadindilwa vayaanave vakhandi vikivapuliisa. 26Baaho hela, uludegenkho ulukhome mandu lwashila mu nyi, lwadegensa uluutu lwa shifungo. Amalyango goona gadindukha geene hela, na manyololo goona gina vavapinyilaga avadindilwa, gayaawukha. 27Umuyangalilaaji wa shifungo wálamukha. Wáganile kiloleela kiija amalyango gadindukha, wápoosa ipanga yaakwe kiija ayibude kwa kiiva akhandi ihiiva kiija avadindilwa woona vaatula. 28Baaho uPawulo wámushemeela kwa shawuti nkhome wámujovela wáaja, “Usikhajelaga kiyibuda! Woona tikwali muno.”

29Umuyangalilaaji wálajisa kiija avavanda vamutwalile ulumuli. Wáganile kitwalilwa ulumuli, wáhuluta nyangu mu shifungo, wáagwa pa Pawulo nu Siila kuno itetema. 30Baaho wávahumya panja, wávaposa wáaja, “Omwe vakhome vangu, nigahe shishi baheene nikulusiwe?” 31Vamugomosesa vaaja, “Umuhuvililaje uMutwa uYeesu, asikukuluse lumo na vaanu va mukhaaya yaakho.” 32-34Wávatwala uPawulo nu Siila kunyaakwe, vamumanyisa iMola iNofu iya Mutwa uYeesu lumo na vaanu woona ava kukhaaya yaakwe, baaho wátwinisiwa lumo na vayine woona. Uluhaavi lulula ulwa paashilo, wávayoosa inyeeya saanave uPawulo nu Siila, wávapeela ishakiilya. Wáshendeeva mandu lumo na vala woona va mukhaaya yaakwe, kwa kiiva vamuhuvililaga uNguluvi.

35Ulwamilaawu njine palwamilaawu, avayimililaaji vafilikha avakhome va vasulukhali kwa muyangalilaaji wa shifungo, vamujovela vaaja, “Vadindulila avaanu vala.” 36Umuyangalilaaji wámujovela uPawulo wáaja, “Avayimililaaji vanifilikha kiija nivadindulile. Lino humi kunja, lutaji kwa wulindamafu.”

37Leelo uPawulo wávajovela avakhome va vasulukhali wáaja, “Avayimililaaji valajisa titowe mandu pa vaanu na kitudindila mu shifungo kusiina kitusitaakha awu kituposa, hata nda ose tili Valuumi.#16:37 Hata nda ose tili Valuumi: Indaji sa Valuumi sisikhandi sitawula kimudindila awu kimutova uMuluumi umukhaaya kusiina kiyitanga. Lino kwashi visakula kitudindulila kwa mbuusa? Yisikwiliile kiiva ndeeno, ndaali! Vayinse vaveene baheene vatudindulile.” 38Avakhome va vasulukhali vavajovela ago avayimililaaji va lijumbi. Avayimililaaji vaganile kipulikha kiija, uPawulo nu Siila Valuumi, vatungumala mandu. 39Vaaluta kivalomba vavasaajile, vavahumya mu shifungo, vakhandi vikivasimila kiija vawuushe mu lijumbi lila. 40UPawulo nu Siila, vaganile kipoola mu shifungo, vaaluta kwa Lidiya. Vatangaana umo na vahuvililaaji vayaanave, vavajinia inumbula, vawuukha.

Currently Selected:

Nsengo sa Vanandeje 16: Shisangu

Highlight

Copy

Compare