Nsengo sa Vanandeje 17

Ilibaatu ilikhome ku Tesalonike

1UPawulo nu Siila vashuulaga, vashilile mu lijumbi lya Amfipoli, ni lya Apoloniya, vaafikha mu lijumbi lya Tesalonike. Apo pakhandi ni nanda iya kifuunyila iya Vayahuudi. 2Ukho, uPawulo wáyinjila mu nanda iya kifuunyila, ngaja shina yikhandi ngʼoma yaakwe. Uluhaavi lwa majuma gatatu aga Sabaato, akhandi ikivakhoma isa Mayandikhwa aManofu. 3Akhandi ikivamanyisa na kivawonensa bahawuvalafu kiija, uMukulusaaji yuna uNguluvi wátahisaaga kimufilikha,#17:3 UMukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. wáali isakulwa kilafisiwa na kifyukha kihuma kwa vina vafwile. UPawulo wávajovela wáaja, “UYeesu uyu yuna nikimukhoma kunyeenyu, yumwene yu Mukulusaaji.” 4AVayahuudi vamonga vagahuviilila amaswi ga Pawulo. Woope vina vasili Vayahuudi vinshi vina vakhandi vihuviilila ilihuuvi ilya Shiyahuudi, lumo na vashimaayi vinshi vina vitiilwa vahuvililaga. Awo woona vaava shipuga shimo nu Pawulo nu Siila.

5Leelo ijiila yavakhata aVayahuudi avanji vina vasikhahuviliile, vaaluta mu munaada, vavatoola avaanu avakholofi, vakungaania ililugu lya vaanu. Woona vayansa kigaha ilibaatu likhome mu lijumbi lyona. Vaaluta vayiyalushila inanda ya Yasoni. Vahuviliile kivaaga umo uPawulo nu Siila, kiija vavatwale bahawuvalafu pa lilugu lya vaanu va lijumbi. 6Vaganile kivatukula, vamukhata uYasoni na vahuvililaaji vamonga, vavakuluuna mbakha kwa vakhome va lijumbi, kuno vilyova ilyowo viijova, “Avaanu ava vapinsa ilibaatu likhome mu nyi isinji soona, lino vayinsile apa pa lijumbi lyesu, 7woope uYasoni yumwene yuna wávasajisaaga mu nanda yaakwe. Ava woona viisala indaji sina uKayisaali, umutwa wa Valuumi, asiviishile viijova, ‘Ose tina Mutwa uyunji yuna itambulwa Yeesu.’” 8Ililugu lila ilya vaanu na vakhome va lijumbi vaganile kipulikha aga, vakhalala mandu. 9Vamujovela uYasoni na vayine vapoose ifiinu ifya kikhomekha, vavatawula kiija valute kunyaanave.

UPawulo nu Siila ku Beloya

10Kwaganile kiiva shilo, avahuvililaaji vala vavapavila uPawulo nu Siila kiija vawuushe valute mu lijumbi lya Beloya. Vaganile kifikha kula, vayinjila mu nanda iya kifuunyila iya Vayahuudi. 11AVayahuudi ava apo pa Beloya vakhandi vapulisaaji kishila vala ava ku Tesalonike. UPawulo pina akhandi ikivakhoma iMola iNofu isa Mutwa uYeesu, vasiposheelaga kwa numbula yoona. Vayitenekha kiyimba aMayandikhwa aManofu nsiku soona, baheene vamanye kiija amaswi gina uPawulo ilogola ga shiyooli. 12AVayahuudi vinshi vamuhuviilila uYeesu, lumo na vagoosi vina vasili Vayahuudi vinshi na vashimaayi ava lishima.

13Leelo aVayahuudi ava ku lijumbi lya Tesalonike, vaganile kimanya kiija uPawulo iikhoma iLiswi lya Nguluvi na ku lijumbi lya Beloya, koope vaaluta, vahonsa ililugu lya vaanu, vapinsa ilibaatu likhome. 14Avahuvililaaji va ku lijumbi lya Beloya vamusindihisa uPawulo, vamutwala nyangu ulubali lwa bahali. Leelo uSiila nu Timoteo vasigala mu Beloya. 15Lino vala vina vamusindihisaaga uPawulo vamufisa mu lijumbi ilya Atene. Pina viiwuya, uPawulo wávalajisa iliswi lya kivatwalila uSiila nu Timoteo kiija vasikhadiilaga, vamufwataje nyangu.

UPawulo ilogola na vaanu ava ku Atene

16UPawulo pina ikivaheepa uTimoteo nu Siila ku lijumbi lya Atene, wályajile ilijumbi lila lyona limemile isanaamu sa manguluvi, inumbula yaakwe yalumaga mandu. 17Baheene wáyansa kiyinjila mu nanda iya kifuunyila, wáava ijovana na Vayahuudi na vina vakhandi vihuviilila ilihuuvi ilya Shiyahuudi. Khanji insiku soona, akhandi ijovana bahawuvalafu na vaanu vina akhandi itangaana na woope mu manaada.

18Mu manaada umo mukhandi na vaanu vamonga vanya luhala, vina vatambulwagwa Vaepikulawo#17:18 Vaepikulawo: Avanya wumanyi ava vahuvililaga kiija kusiina ishiinu pa nyi shina shiikhala shiluta. Ndeeno avaanu vasikhayilafyaga na malava ga wiikhasi. Shiba vasakulaje kikwilana kwa nsila ya kikhala kwa kivatama, uwulindamafu nu wushendeefu. na Vasitoyiki.#17:18 Vasitoyiki: Avanya wumanyi ava vakhandi viijova kiija, shila shiinu pa nyi panu shina luganulo lwakwe. Ndeeno, avaanu vayanushilaje iliswi lyolyona mu wiikhasi waanave, bila muninu awu kilalamikha. Vayitemaje amahiiva na kiyijimfilisa. Awo woope vayansa kikhaanania nu Pawulo. Avamonga vaajova, “Isakula kilogola shishi umulyovaaji uyu?” Avanji vaajova, “Yiwonekha kiija, ilogola ulwa manguluvi gaakwe ga nyi isinji.” Vajovaga ndeeno, kwa kiiva uPawulo akhandi ikivakhoma iMola iNofu iya Yeesu nu lufyukho lwakwe. 19Baheene vamutoola uPawulo na kimutwala ku livansa lina lyatambulwagwa Aleopago.#17:19 Aleopago: Ishi shidunda pina vikungaana avanjaajila va livansa, vina vakhandi Vayunaani mu lijumbi lya Atene. Khanji, ilivansa lyapataga ilitaawa ilyo. Vaajova, “Amamanyiso amapya aga gina ukivajovela avaanu, tujovela na yuuse. 20Tagapulikha amamanyiso amapya aga kiswiga, tidobokha kiija utuganulile ago.” 21Vajovaga ndeeno, kwa kiiva avaanu va kula ku lijumbi lya Atene, lumo na vahensa va kutali vina vakhandi viikhala ukho, vakhandi vidobokha kipuliisa hela imola imya, na kisilogola.

22Baheene uPawulo wáyiima mu livansa lila ilya Aleopago, wáaja, “Vagoosi omwe va ku Atene! Niiwona kiija muyinatila mandu imola soona isa manguluvi geenyu. 23Pina niishila mu lijumbi ili, nawonaga shina mufuunya amanguluvi. Napaagaga pa luvala ulwa kihumisa ishadanda pina payandiikhwe amaswi gina giijova, Kwa linguluvi lina lisimanyikha Uyo uNguluvi yuna mukimufuunya musimumeenye, yumwene one nisakula kivakhoma.

24“UNguluvi uyu yumwene wáwumbile inyi, na fyona fina fikwali muno, khanji yu Mutwa wa kushaanya na wa mu nyi. Umwene asiikhala mu malonjelo amakhome aga kifuunyila gina gasenjiilwe na vaanu. 25Asisenjelwa na vaanu nda isakula shiinu kunyaanave. Umwene ikivapeela avaanu woona uwuumi ni muyila, khanji yumwene ikivapeela fyona. 26Kihuma kwa muunu yumo wáwumbile ifimyanja fyona fya vaanu, kiija vapalankhane mu nyi soona. Kihuma pawukuulu wávavishilaga kiija vakhava viikhala kwi, na kwa luhaavi lushi. 27UNguluvi wáagaha ago goona, kiija avaanu vamusakule, pamonga nda vamufishila kwa nsila ya kiyambaasa yambaasa. Hata ndeeno, asili kutali na yoyoona. 28Niijova ndeeno, kwa kiiva yumwene yuna atugahile kiija, tiikhala, tijenda na kiyitenekha kiiva wuumi. Ngaja shina avamonga mu vayandikhaaji veenyu va njeyemo vajovile, ‘Ose tili vanaakwe.’

29“Ose tili vaana va Nguluvi, ndeeno tisisakulwa kihiiva kiija, uNguluvi ihwanana ni sanaamu sina vatendile kwa sahaabu, awu shuuma, awu mangʼanga. Isanaamu iso sitendwa kwa luhala lwa vaanu hela. 30Apo paanyuma, avaanu pina vakhandi viigaha ago kwa wuyasu, uNguluvi akhandi ngaja asiloleela. Leelo lino ikivalajisa avaanu woona ava popoona pala kiija valambiisile. 31Visakulwa kilambiisila, kwa kiiva wáviikhaga ilisiku lina akhavahiga avaanu woona kwa shiyooli, kwa nsila ya muunu yuna amubagwile. UNguluvi avawonensiise woona ago, kwa nsila ya kimufyusa uyo umuunu kwa vina vafwile.”

32Avaanu va livansa lila, vaganile kipulikha kiija uPawulo ilogola ulwa kifyukha kwa vina vafwile, avanji vamusala. Leelo avanji vamujovela vaajova, “Tisakula kikupuliisa khanji imola iso.” 33Baheene uPawulo wáahuma mu livansa, wávalekha. 34Avaanu vamonga vamuhuviilila uYeesu, vayansa kimufwata uPawulo. Mu awo akhandi akwali uDiyonisiyo, uwa ku livansa ilya Aleopago, nu washimaayi yumonga, ilitaawa lyakwe yu Damali, lumo na vaanu avanji.

Currently Selected:

Nsengo sa Vanandeje 17: Shisangu

Highlight

Copy

Compare