Markus 6

To panangumsi dito iNasare̍t e̍ Je̍sus

Mat. 13:53-58; Luk. 4:16-30

1Ket pimanaw nge̍ Je̍sus antuni, nga nagawir ito ili nan. Ket nibulun igina dito adalan na.

2Ket ito Algew Ngilin, nangisuru ngarud nge̍ Je̍sus iya gigimungan da. Ket dito nakagicna iya panangisuru na, adu igida diya nasdaaw, nga kinunen da iya panagtetebbar da, “Ape̍ nga agten kadiyan ya kabaellan niyan nga toley? Awac kid ya namettan na iya agten iyan nga sirib? Ape̍ nga makaariman ka nakaskasdaaw? 3Di met igina to allawagi, nga anac ne̍ Marya, se̍ ya kabsat mettas de̍ Santiyagu, Huse̍, Hudas se̍ Simon? Bekken kad nga aged-edyan idi nga ili tida diya kakabsat na nga babey?” kunen da, ket inumsi da ngas met nge̍ Je̍susin.

4Ket e̍ Je̍sus, kinunen na met igida, “Mapadayawan ngarud ya isa nga mangaskasaba, malacsid iya mismu nga ili na se̍ kadiya kakabagiyan na, se̍ kadiya kabbalay na,” kunen na.

5Ket iya agten iyan, awan met nakaskasdaaw nga nabalin ne̍ Je̍sus nga inariman antuni, malacsid iya panangipatey na ngas kadiya ima na kadiya sumagpipiga nga agsakit, nga pinalaing na da. 6Ket nasdaaw nge̍ Je̍sus kadito kailiyan na, gapu ta madi da met gabay ya mamati.

To pannakaibon dito sangapulu ket duwa nga adalan

Mat. 10:5-15; Luk. 9:1-6

Ket itun, nawe̍ pinasyar ne̍ Je̍sus diya il-ili antuni, nga nangisursuru. 7Ket iya isa nga algew, pinaadenni na dito sangapulu ket duwa nga adalan na, ket sinagduduwa na da nga nibon. Nitalec na igida ya pannakabalin nga mangpatalew kadiya sairu. 8Ket binilin na da nga awan itarey da, nga orey pekkel man winno legpi, se̍ madi da agibulsa ka kuwarta. Sacgukud ngas ya mabalin da nga itarey, 9se̍ mabalin da pe̍ ya agpalloka. Ket isa ngas kanu nga badu ya pagluput da. 10Ket se̍ kinunen na pe̍ igida, “No uwed mangsangaili dakayu, ket iyan mettas nga baley ya pagdagusan nu, agingga na nga pumanaw kayu iyan nga ili. 11Ket no uwed ili nga madi dakayu rispitaren diya umili, se̍ madi da gabay ya dumngeg iya isuru nu, panawan nu ngarud yan nga ili yin. Ket no pumanaw kayun, sapuken nu ya tapuc iya saka nu, tasun ipakaemmu nu igida nga awan bibiyang nu igidan,” kunen na.

12Ket nawe̍ ngarudin dito adalan. Nikasaba da nga agbabawi kuma diya toltoley kadiya basbasul da. 13Ket adu diya sairu nga pinagtalew da kadiya naluganan, se̍ adu pe̍ diya agsasakit nga linabu da ka lana, ket pinalaing da met da.

Maipanggep ito pannakatey nito Juan nga Mammautisar

Mat. 14:1-12; Luk. 9:7-9

14Ket nadamag ngarud nito Ari He̍rude̍s ya maipanggep e̍ Je̍sus, ta nagdindinamag mettin ya maipanggep igina. Ket kinunen met diya duduma, “Igina to Juan nga Mammautisar nga nagungarin! Itu ya gapu na nga uwed iyan nga toley ya pannakabalin nga mangariman kadiya agten kadiyan,” kunen da.

15Ngem kinunen met diya duduma, “Igina to mammadtu nga E̍lyas.”

Ket diya duduma, kinunen da nga, “Isa nga mammadtu met, nga agten mettas kadito mammadtu itun,” kunen da.

16Ngem ito nagicna ne̍ Ari He̍rude̍s diyan, ket kinunen na, “Igina met to Juan nga Mammautisar, nga pinaputulac itun ya ulu na, ket nagungar mettin!” kunen na.

17Agten ngarud iyan to kinunen nito Ari He̍rude̍s, ta itun pekkem, nibon na met diya nawe̍ nangtekkem ito Juan, se̍ na pinaibalud nga sipupungu. Agten iyan to winangel nito He̍rude̍s itun, gapu ito He̍rudyas nga asawa mettas niya kabsat na nga Pe̍lipe̍, ta inasawa met pe̍ ne̍ He̍rude̍sin. 18Ta to Juan, nibagbaga na ngamin e̍ He̍rude̍s itun, nga pe̍yeng na nga kinunen nga, “Bekken ngarud nga nalinteg ya winangel mu, ta inasawam met ya asawa niya kabsat mu mettas,” kinunen na itun.

19Itu nga kinalucsew nito He̍rudyas nge̍ Juan itun, ket ginabay na no mapatey kuma ngarud to Juanin, ngem awan met mabalinan na. 20Ta e̍ asawa na nga Ari He̍rude̍s, dinayaw na met to Juan itun, ta emmu ne̍ Ari He̍rude̍s nga nalinteg se̍ nadayaw to Juan iya imatang ne̍ Apu Diyus. Itu nga nislaanan met ne̍ Ari He̍rude̍s to Juan. Ket ito naggicgicna nge̍ Ari He̍rude̍s ito kasaba nito Juan, nasikuran nga unay. Ngem nagustuwan na met latta nga dinengdengngeg dito kagkagiyen nito Juan.

21Ket ya napasamac itun, ito nadatngan to algew nga panangilagip da ito pannakaiyanac ne̍ Ari He̍rude̍s, itu win to gundaway nito He̍rudyas. Ta inawis nito Ari He̍rude̍s nga pinunsiyunan na diya uupisyal niya gubiye̍rnu, se̍ diya kumande̍r diya suldadu na, se̍ diya nadayaw nga lalaki iyan nga prubinsiya nga Galilya. 22Ket itun, ya anac ne̍ He̍rudyas nga babey, nawe̍ na met nipabuya ya panagsala na ito imatang de̍ He̍rude̍s se̍ dito makisangsangu igina, ket nagustuwan da ngarud. Ket kinunen met ne̍ Ari He̍rude̍s ito balasang, “Orey nagan na ya gabay mu, adngem mas iyaken nin, ta e̍cde̍c ngarud ikew!” kunen na. 23Ket nagsapata met pe̍ nge̍ Ari He̍rude̍s, nga kinunen na pe̍ igina, “Orey nagan na nga adngem iyaken, e̍cde̍c nga tutu ikew, orey no agpateg kuma iya kagudduwa niya pagturayac ya adngem,” kunen na met.

24Ket rinumwar ngarud to balasang nga nawe̍ nagsaludsud ito ina na, nga kinunen na, “Nagan kuma ngarud ya adngec?” kunen na.

Ket kinunen met ne̍ ina na, “Ya ulu ne̍ Juan nga Mammautisar a, ya adngem mun!” kunen na.

25Ket sigida met nga simoli to balasang nga imuneg ito edyan nito ari, ket kinunen na met, “Ya gabay ku, ket e̍cde̍m iyaken ita mettas ya ulu ne̍ Juan nga Mammautisar, nga maipay ka bande̍hadu,” kunen na.

26Ket linumdaang nga unay to ari yin. Ngem gapu ito sapata na, se̍ gapu met iya kauwed dito sangsangaili na itun, ket madi na ngarud gabay nga paayen to adeng nito balasang. 27Itu nga sigida nga nangibon to ari ka isa nga suldadu nga para patey, nga nibilin ngarud nito ari igina nga mawe̍ na alac to ulu ne̍ Juan. Ket nawe̍ ngarud to suldadu nga nangputul iya ulu nito Juan ito nakaibaludan na. 28Ket ne̍lbe̍t nito suldadu to ulu nito Juan, nga naipay ka bande̍hadu. Ket se̍ na met niyawat ito balasangin. Ket to balasang, ne̍cde̍ na met ito ina nan.

29Ket ito nadamag dito adalan nito Juan to napasamac igina, nawe̍ da inalac ya bangkay na, se̍ da nipisuc ka tamen.

To panangpakan ne̍ Je̍sus ka nasuruc nga

lima nga ribu nga toley

Mat. 14:13-21; Luk. 9:10-17; Juan 6:1-14

30Ket dito adalan ne̍ Je̍sus, ito simoli da nga gayat ito nakaibonan da, naguurnung da ito edyan ne̍ Je̍sus. Ket nipadamag da igina diya amin nga winangwangel da se̍ nisursuru da. 31Ket itun, kinunen ne̍ Je̍sus igida, “Mawe̍ tida ka lugar nga awan matagtagitoley na, tasun makaimang kayu ka e̍teng,” kunen na. Agten iyan ya kinunen na, ta adu met diya toltoley nga agsusukat nga umbe̍t ito edyan da, ket itu nga madi da met masangu orey yas manganin. 32Dikad pe̍ nagbangka ngarud de̍ Je̍sus nga awan sabali nga kinabulun da, nga nawe̍ da ka lugar nga awan matagtagitoley na.

33Ngem adu diya nakasiput ito ipapanaw da, ket nabtaan da nga de̍ Je̍sus met. Dikad pe̍ dito toltoley, nagtatagtag da ngarud nga naggayat kadito amin nga il-ili antuni, nga nawe̍ da met nga non-ona ngem kade̍ Je̍sus ito pennan da. 34Ket ito nakagacdang nge̍ Je̍susin, nasingen na dito nakad-adu nga toley. Ket naasiyan igida, ta arig da nga karne̍ru nga awan agay-aywan igida. Ket iya agten iyan, sinursuruwan na da ngarud itun ka adu nga banbanag.

35Ket ito gumidamin, imadenni dito adalan na igina, ket kinunen da, “Away met idi, ket gumidam met pe̍ yin. 36Papanawem kuma ngin diya toltoley, tasun mawe̍ da kuma ngumina ka kanen da kadiya kabangibang nga purpuruc se̍ il-ili,” kunen da.

37Ngem kinunen ne̍ Je̍sus igida, “Dakayu lugud a, ya mangpakan igida,” kunen na.

Ket kinunen da ngarud e̍ Je̍sus, “Bayay! Kayat mu kad nga kagiyen nga mawe̍ kami kuma ngumina ka tinapay nga agpateg ka rinibu nga pisus, se̍ mi e̍cde̍ nga kanen da?” kunen da.

38Ket kinunen met ne̍ Je̍sus igida, “Piga diya tinapay nga uwed dakayu? We̍ kayu man singen,” kunen na.

Ket nawe̍ da ngarud inemmu kadiya toltoley. Ket nibaga da e̍ Je̍sus, “Uwed lima nga bukel nga tinapay, se̍ duwa nga lames,” kunen da.

39Ket nibilin ne̍ Je̍sus nga agtugew kanu diya toltoley, nga maurnu-urnung da ito napaw-is nga karuutan. 40Ket nagtugew da ngarud nga naurnu-urnung ka sagsangagasut se̍ saglilima nga pulu. 41Ket nimet ne̍ Je̍sus dito lima nga bukel nga tinapay se̍ duwa nga lames. Limangad ka langit ket nagkararag nga nagyaman e̍ Apu Diyus, se̍ na pinisepisey dito tinapay. Ket ne̍cde̍ na kadito adalan na, tasun iwaras da kadito toltoley. Ket biningabingay na met pe̍ dito duwa nga lames kadito amin nga toltoley. 42Ket dito toltoley, nangan da ngarud nga amin, ket nabsug da met.

43Ket kalpasan na, inurnung da dito nabuna nga napisepisey nga tinapay se̍ lames, ket napnu met gayam ya sangapulu ket duwa nga lacba. 44Ket ya bilang ngas dito mamanacman nga lalaki nga nangan itun, ket lima nga ribu.

To pananalan ne̍ Je̍sus iya sap-ew niya danum

Mat. 14:22-23; Juan 6:15-21

45Ket bayat nito panangpaawir ne̍ Je̍sus kadito toltoley, dagus nga nipapilit na nga aglugan dito adalan na ito bangka. Pinona na da ngem igina, nga dumelmang da ito baybay, nga mawe̍ da kanu ka ili nga Be̍tsayda. 46Ket ito nagpakada nge̍ Je̍sus kadito toltoley yin, pimanaw pe̍ yin nga nanang-at ka tageytey, nga nawe̍ nagkararag.

47Ito gumicbet tin, uwed met iya tengnga nito baybayin to bangka nga lugluganan dito adalan. Ket e̍ Je̍sus, uwed pekkem nga agis-isa ito ginet. 48Ket nasingen met ne̍ Je̍sus nga marigatan da nga aggacgaud, ta masarubnga da ngamin ya belluut. Ket ito parbangunin, nawe̍ nge̍ Je̍sus ito edyan da, nga manmanalan met iya sap-ew nito baybay. Ket ginurat na ya lumiwan igida. 49Ket ito nasingen dito adalan nge̍ Je̍sus nga manmanalan iya sap-ew niya danum, pagarupen da met no be̍law. Ket nagkekerre̍s da ngarudin, 50ta nasingen da nga aminin, ket napalaus met ya ansing da. Ngem sigida nga nagkagi nge̍ Je̍sus igida, nga kinunen na, “Madi kayu mansing, ta iyaken met! Madi kayu madanaganin!” kunen na.

51Ket nakilugan nge̍ Je̍sus igida ito bangka ngin, ket nagtalna met to belluutin. Napalaus nga unay ya seddaaw dito adalan na, 52ta di da pekkem pe̍ naawatan itun ya kaipapennan nito panangpaadu ne̍ Je̍sus kadito tinapay. Ta nagpatingga met ya malagip dan.

To panangpalaing ne̍ Je̍sus enna Ge̍ne̍sare̍t

Mat. 14:34-36

53Ket ito nakadelmangin nge̍ Je̍sus se̍ dito adalan na, simanglad da ka Ge̍ne̍sare̍t, ket nipundu dan to bangka da. 54Apaman nga nakadsag da ito bangka, nailasin met diya toltoley nge̍ Je̍sus. 55Itu nga nagtatagtag ngarud dito toltoley nga nawe̍ kadiya amin nga luglugar antuni, tasun mawe̍ da alac diya agsasakit. Ket nipen da nga siiida da pekkem iya ida da iya orey awac nga nadamag da nga edyan ne̍ Je̍sus itun. 56Ngarud, iya orey awac nga napennan ne̍ Je̍sus, barbaryu man, winno il-ili, winno purpuruc, ket ipen diya toltoley diya agsakit iya plasa na. Ket nipacpakaasi da nga no mabalin, se̍cde̍ngen kuma diya agsakit nge̍ Je̍sus, orey no yan nas gayad niya luput na. Ket amin nga nakase̍cde̍ng igina, ket napalaing da met.

Currently Selected:

Markus 6: YBT

Highlight

Copy