Markus 5

To lalaki nga naluganan ka sairu

Mat. 8:28-34; Luk. 8:26-39

1Ket nakadateng ngarud de̍ Je̍sus enna demmang niya baybay ka Galilya, iya sakup diya iGe̍rasa. 2Ket apaman nga dinumsag nge̍ Je̍sus ito bangka, uwed met lalaki nga naluganan ka sairu, nga nawe̍ simabet igina. Naggayat met yan nga lalaki kadiya tatamennan, 3ta itu met to paged-edyanan na. Awan toley nga makaigapus igina, orey no kawaran da. 4Ta name̍n-adu da nga pinusasan diya ima se̍ saka nan, se̍ kinawaran da. Ngem gin-ginsat na ngas met diya naikawar igina, ket dito nipusas da kadiya saka na, linlintat na ngas met. Ngarud, awan met nakabael nga mangpaamu igina. 5Ket algew se̍ gabi, pe̍yeng met nga aged-edyan to lalaki kadiya tamtamen, se̍ kadiya tagtageytey, nga um-umkis, se̍ taltalinguwen na pe̍ ya beggi na ka batu.

6Ket ito nasingen nito lalaki nge̍ Je̍sus ito deyyu pekkem, nanagtag met nga nawe̍ e̍ Je̍sus. Ket nagparintumeng met nga nagpakaasi igina, 7nga nicre̍s na ka nabileg, nga kinunen na, “Je̍sus nga Anac ne̍ Apu Diyus nga Kangatuwan! Nagan ngarud ya biyang mu iyaken? Pangngaasim kay ta gapu mettas iya dayaw ne̍ Apu Diyus, madi nac kuma parigaten!” kunen na. 8Ket agten ngarud iyan to kinagi nito lalaki gapu ta kinunen mettin ne̍ Je̍sus ito sairu nga, “Ikew nga sairu, agtalew ka iyan nga toley yin!” kinunen na.

9Ket kinunen manin ne̍ Je̍sus igina, “Nagan kad ya nagan mu?” kunen na.

Ket kinunen na, “Bungguy ya nagan ku, ta adu kami,” kunen na met. 10Ket napasnec ngarud nga nagpacpakaasi e̍ Je̍susin, nga madi na da kuma kanu nga pagtalawen iyan nga lugar.

11Ket iya denni antuni, uwed met isa nga dackel nga bungguy diya abuy nga agsebsebbuc iya are̍b niya tageytey. 12Ket nagpacpakaasi ngarud dito sairu nga kinunen da e̍ Je̍sus, “Dituni nga abuy kuma ya pangiyalisam dakami, tasun igida kuma ngin ya luganan mi,” kunen da.

13Ket pinalubusan ne̍ Je̍sus da, ket pimanaw ngarud dito sairu ito lalaki, nga nawe̍ da limugan kadito abuyin. Agduwa nga ribu met ya bilang dito abuy nga nagbubungguy. Ket ito naluganan dito sairu win dito abuy, nagtatagtag mettin dito abuy nga nanagus iya nangiras, nga nawe̍ da ito baybayin, ket nalisem da mettin.

14Ket diya agay-aywan kadito abuy, nagtalew da ngarudin. Ket nawe̍ da nipadamag yani enna ili, se̍ kadiya purpuruc. Ket diya toltoley nga napadamagan iyan, nawe̍ da ngarud tasun singen da kuma pe̍ no nagan to napasamac. 15Ket ito dimateng da ito edyan ne̍ Je̍sus, nasingen da to lalaki nga naluganan itun, nga agtugtugew met nga nakaluputin, se̍ pimulangin to kustu nga panpanunut nan. Igina mettas to lalaki nga naluganan ka bungguy sairu itun. Ket iya agten iyan, nansing ngarud dito toltoley yin.

16Ket dito nakasingen ito napasamac ito lalaki nga naluganan itun, se̍ to napasamac kadito abuy, sinalaysay da met pe̍ kadiya duduma nga toltoley. 17Ket gapu iyan nga napasamac, nagpakaasi ngarud dito toltoley e̍ Je̍sus nga pumanaw kuma kanu iya sakup dan.

18Ket ito nawe̍ nge̍ Je̍sus nga lumugan kuma iya bangka ngin, nagpacpakaasi met to lalaki nga naluganan itun ka sairu, nga maibulun kuma e̍ Je̍sus. 19Ngem madi nga nipalubus ne̍ Je̍sus, no di na lugud kinunen igina, “Agawir ka lugudin, ket makitipun kan kadiya kabagiyam mun. Ket ipadamag mu ngarud igida ya nakaskasdaaw nga nipaay niya Apu ikew, se̍ maipanggep pe̍ iya panangaasi na ikew,” kunen na.

20Ket nawe̍ ngarud to lalaki, ket nipacpakaemmu na kadiya luglugar nga masakupan niya pagiliyan nga De̍kapulis to nakaskasdaaw nga nipaay ne̍ Je̍sus para igina. Ket nasdaaw diya amin nga nakadamag.

To anac ne̍ Hayru, se̍ to babey nga uwed sarut na

Mat. 9:18-26; Luk. 8:40-56

21Ket ito nakadelmang manin de̍ Je̍sus nga naglugan ka bangka, uwed met adu nga toley nga naguurnung ito edyan na ito pingit niya baybay.

22Ket uwed met inumbe̍t nga isa nga pangulu niya gigimungan diya Hudyu, nga agnagan ka Hayru. Ito nasingen na nge̍ Je̍sus, nawe̍ met nagdarongkeb iya sangu na, 23nga nagpacpakaasi e̍ Je̍sus, ket kinunen na, “Makatkatayen ya balasitang kun. Umbe̍t ka kuma ket ipatey mu kuma diya imam igina, tasun madi matey, no di lugud malainganin,” kunen na. 24Ket nibulun ngarud nge̍ Je̍sus igina, se̍ adu pe̍ diya toltoley nga nipuyut igina, nga inilet da met nge̍ Je̍susin.

25Ket uwed pe̍ antuni ya isa nga babey nga uwed sarut na. Sangapulu ket duwa nga dagun nga agbulbulus ya daga nan. 26Adu ya rigat nga niturtured nito babey gapu iya panagpacpaagas na kadiya adu nga nangag-agas igina. Ket naikapus na met pe̍ diya amin nga sansanicwa na gapu iya gastus na, ngem madi met naunayan, no di lugud limalu.

27Ket idi nga babey, nadamag na ya maipanggep e̍ Je̍sus, itu nga nawe̍ ngarud nakiinnilet iya malikudan na, se̍ na sine̍cde̍ng ya luput ne̍ Je̍sus. 28Ta kinunen nito babey iya lemlemmet na, “No mase̍cde̍ng ku kuma orey ya luput na, malaingan nac kun,” kunen na.

29Ket ito panangse̍cde̍ng na, sigida met nga simardeng ngin to panagbulus nito daga na. Ket naricna na ngarud nga naagasanin to sarut na.

30Ket e̍ Je̍sus, sigida met nga nadlaw na nga uwed pannakabalin nga rinumwar iginan. Itu nga limaw-ing kadiya adu nga toley, nga kinunen na, “Nagan ya nangse̍cde̍ng iya luput ku wi?” kunen na.

31Ket kinunen ngarud diya adalan na igina, “Masingem met diya adu nga toley nga agiinnilet iya le̍cbut mu. Ape̍ saludsudem pekkem no nagan ya nangse̍cde̍ng ikew?” kunen da.

32Ngem linanga latta ne̍ Je̍sus, nga siningsingen na no nagan to nangse̍cde̍ng igina. 33Ket to babey, naawatan na ngarud to napasamac iginan, itu nga namilpig met nga siaansingin. Ket nawe̍ nagparintumeng iya sangu ne̍ Je̍sus, se̍ na nipudnu to amin igina.

34Ket kinunen ne̍ Je̍sus ito babey, “Anac ku, nalaingan kan gapu iya panamatim. Agawir ka nga sitatalna kuma ngasin, ta awanin to sarut mun,” kunen na.

35Ket ito agkagkagi pekkem nge̍ Je̍sus, uwed da inumbe̍t nga agpadamag, nga gayat da iya baley ne̍ Hayru nga pangulu niya gigimungan. Ket dito agpadamag, kinunen da e̍ Hayru, “Natey yin ya anac mu. Orey madi ka tactaken ya Mistru win, a,” kunen da.

36Ngem e̍ Je̍sus, kinunen na met e̍ Hayru, “Madi ka madanagan. Basta mamati ka ngasin,” kunen na.

37Ket madi nipalubus ne̍ Je̍sus nga mibulun dito duduma nga toley igida, malacsid e̍ Pe̍dru se̍ de̍ Santiyagu nge̍ Juan nga agkabsat. 38Ket ito sinumpuc da ito baley nito Hayru nga pangulu niya gigimungan, nasingen da diya toltoley iyan nga nakapagpagas, nga agberberrit se̍ agsangsangit da ka nabileg. 39Ket ito imuneg nge̍ Je̍susin, kinunen na kadito toltoley, “Ape̍ nga napagas kayu? Se̍ ape̍ nga agberberrit kayu? Bekken met nga natey ya ebbing, no di ngas mat-atudug,” kunen na.

40Ket nigalgalec ngas dito toley nge̍ Je̍sus. Ket e̍ Je̍sus, pinaruwar na da ngarud nga amin, se̍ na pinauneg diya naganac ngas ito ebbing se̍ dito tellu nga adalan na iya edyan niya ebbing. 41Ket inicman ne̍ Je̍sus ya ima nito ebbing, ket kinunen na, “Talita kum!” nga kayat na nga kagiyen, “Iyang! Bilinen naka nga bumangun kan!”

42Ket dagus met nga bimangun to ebbing, se̍ manmanalan ngarudin, ta sangapulu ket duwa ya dagun nan. Ket napalaus met pe̍ yin ya seddaaw dito nakasingen ito napasamac. 43Ket nibilin ne̍ Je̍sus igida nga pulus nga di da ibagbaga yan nga napasamac iya orey nagan na nga toley. Ket kinunen na pe̍ nga e̍cdan da kuma to ebbing ka kanen na.

Currently Selected:

Markus 5: YBT

Highlight

Copy