TITO 3
3
Jesosaja epeejjicuana queapame ba'ecapoquijji
1Jesosaja epeejjicuana esohuijo a'a jjapajeameequi'yojji ojaya emeshimeseja esohuijo ejjashajja-ajjaquipoquijji, pea etii poanicuanaja pea-aijo. Jesosaja epeejjicuana apoa epotii ba'ecapoquijji pea queapame chacosahuajji epojji huohuipea-aicue cuana. 2Jesosaja epeejjicuana peajo queatai mimica-ajja, peanijje emimijajijji jjashahuabaquica-ajja. Jesosaja epeejji ca oe ojjañacuananijje queapame pocapoquijji. Oyanei queaca'a poani jjabaquica-ajja peacuananijje queapame eba'ejji.
3Yahuajo eseya pea-ai esohui bapojjima' nequi queaquehuanee ba'yapoa. Eyacuiñajjija esohuijo shajjama'nei jayojja poa yahuajo. Ecuaquisho jama eshahuaja dasia eseya ba'epoquiapoa. Joya ecua dejja ejeyo jama eseya ba'epoquiapoa eseja ejjashahuabaquijji peanijje queamimishi epojjijo. Jama epojjijoya eseya jjashahuabaquipoquiapoa. Eseya ebionei ba'epoquiapoa queamase, peaja aquianacuana jeabapoquiapoa. Eseya botiamanei acapoa cuaa, eseyaya oya pea-ai botiamanei apea-aiapoa. 4Ese queamimishihuisotii ba'ejo Eyacuiñajjiya ese nahue'yojji epojji poajeya eseya queapamenee acanaje ojayanei ejjashahuabaquijjijo. Oya esejo jjabameequinaje ojaya eseya queajeanee poani. 5Majoya eseya nahueca'yonaje ojayatii epo'yojji. Ese queapame ba'epoquiani sosejje pojjeama ohuaya eseya nahueca'yonaje. Oyanei ca queapamenee jjashahuabaquipoquiapoa esejo jamatii ese queamimishihuisotii ba'ejo eseya eseja mimishijo queaneenee pomeecuaji'yojjima acanaje. Eyacuiñajjiya eseja mimishicuana chama'yo acanaje, cuijeaca'yonaje Edojjoshahuapameya ese eyacua eba'epoqui'yojji cuayameecao'oyajo. Ma pojjajotii ohuaya eseya eba'ejji eyacua quiacanaje. 6Ese nahue'yojji poani Eyacuiñajjiya Jesosa Quitojo oja Edojjoshahuapame eseya nahuejjimanei quiame acanaje. 7Jamaya ohuaya eseya quiacanaje esejaya queaja'a ebajji e'ejojonei eseya Eyahuasijje ba'etiitiije'yo ma eseya queabihui jjaishoaquipoquianitii meshiyasijje epoqui'yojjijo. Eseya eseja mimishima'yo ohua bacanijjejojoya e'ejojonei cuamaya poquije'yo ojayanei ejjashahuabaquijjijo, jamatii ba'e pojjeama.
8Jiquio esohui e'ejojonei poani. Jamajjeya jiquio huohuimajamajapoquiacue joya Eyacuiñajjija esohuijo jjashahuabaqui'yojji poanicuana o queapame ba'epoquijji. Oja epeejjicuaa queapame ba'emajje peacuana asahuacapoquije. Jama epojjiya queapamenee. 9A'a jamatii peanijje jjamimicuiajeanobiajeaquijji esohui queaquehuajo. Ache etiiquiana yahuajonei cuayapoa, a'a majoya mimijajijji. A'a oe Eyacuiñajjija esohui Moisesja tehuecuanajo mimijajijji peanijje pea-ai. Chojja, jama pomajje se queaca'a etiipoquijji pojjeama. ¿Apiojji ma esohuicuanajo mimijajicajji? Apiojjipishana.
10Bacue, oe Jesosaja epeejjiya Eyacuiñajjija esohui huohuitaicajo oja epeejjicuana ejjachichaqui anicajo comaya niñesheacue. Ohua esohui queaquehua huohuicao'oyajo niñesheao'oyacue. Majoya oya mijo mijjashajja-ajjaquiajo coma dejja huoojeacuaya'yocue. A'a oya jjachichameequio'oyajji miquiana Jesosaja epeejji ejjachichaqui anicanijje. 11Coma dejja miquea bacajji oya pea jjashahuabaqui'yome poani queaquehua. Ojaya ebatiiya queamimishi poani. Eyacuiñajjija oya queanee epomeejji oja mimishijo oya bacaje cuaa.
Oe-ejjenei esohui
12Eyaya Artemas bajjani dejja, pojja'a pea Tíquico mique huoojeajo e'ejojonei poquineicue Nicópolis meshiyasijje e majo ani ba'yohua. Eya jjashahuabaquinaje ma meshijotiiya eya anipoquije so'o queahuoenee she jjayejjequiajo. 13Asahuaneicue Zenas bajjani dejja epoquijji ma o poquisapoani meshiyasijje. Ojaya etii poanicuanaja etehue esohui ebanei pea nahuejji. Apolos pea-ai poquimeeneisahuacue. Cua ohua sacani o queapame poquijji quiacue. 14Jesosaja epeejjicuanaja ma mi ba'ejo nequicaja e'ejojonei bacajji achajja peacuana queapame asahuacajji. Jamatii Jesosaja epeejjicuana ba'ejeaca-ajja peacuana asahuapojjima'nei.
15Ojjaña jiquio enijje ani Jesosaja epeejjicuaa esohui mi queabihui pojji huoojeacanaje. Jesosaja epeejjicuana ecuanaja queajea comajo minijje ani, jamajjeya oya esohui queapame acue ecuanajo. Eyacuiñajjiya ojjaña miquiana queapamenee ca-acapoquiahua ojayanei ejjashahuabaquijjijo.
Currently Selected:
TITO 3: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
