FILEMÓN 1
1
Esohui o queabihui pojji ebionei acapoa Pablohua
1Eya Pablo onaja jeanobia ani Jesosa Quitojo chacochacopoquianijojoya. Eyaya eseja dohue Timoteonijje aniya jiquio esohui tehueaña mique Filemón miquea ebajji. Miya ecuana jayojjaya esohuijo chacochacopoquiani ecuanaja queajea. 2Joya Jesosaja epeejjicuana miquea equijo jjachichaquipoquianicuanaja ebapea-aijji jiquio esohui tehueaña. Eseja jjo'i Jesosaja epeejji Apia bajjanija ebajji, Ariquipoja pea-ai ebajji jiquio esohui tehueaña. Oya pea-ai soldado jama apoa epo nequiani peacuana sohuihuohuiya epoquijji. 3Eyacuiñajji eseja Chii-aiya, Emeshimesenei Jesosa Quitohua pea-ai miquianaya queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya.
Filemón queaja'a jjashahuabaquipoquiapoa esohuijo
4-5Filemón, miya queaja'a jjashahuabaquipoquianitii Eyacuiñajjija esohuijo. Emeshimesenei Jesosa miquea queajeanee poani shajja-ajjamajje eyaya onijje mimianiya Eyacuiñajji gracias amajamajaña mijo. Eyacuiñajjija'yo poanicuana miyaya queajeanee apoquiaña shajja-ajjapea-ainaje ecuaa queabihuiya. 6Eya Eyacuiñajjinijje mimipoquiani mi pea Jesosaja epeejjicuananijje queapame ejjapeequipoquijjijo. Achepamenee Eyacuiñajjiya eseya acanaje Jesosa Quitojo miquea queaja'a ebajjijo eya mimipoquiani onijje. Majoya Jesosa Quito queapameneetii poani bacaje cuaa. 7E'e, miyaya pea Jesosaja epeejjicuana queajeanee apoquiaña shajja-ajjamajje eya queabihui poanaje majoya. Jesosaja epeejjicuana comajo ba'e miyaya yenoama pomeesahua'yonaje oja esohuijo. Jamaya miya queapame poani.
Pablohua esohui Onésimo bajjani dejjajo tehuecapoa o asahuajjijo
8Bacue, eya Quitoja huoojea ona sohuihuohuiquinequijji poaniyajjejojoya ecuea miya huohuicajji ae pocajji miya, ae chacocajji miquea. Jamajjeya ecuea esohuijo jjashajja-ajjaquicajji miya. 9Chojja, eya mi jama pomeesapo-ajja. Ecuea miya queajeajojoya eyaya miya huohuiajjaña. Bacue, eya dejja tiipoquiani. Jjeya Jesosa Quitojo chacochacopoquianijojoya eya ejeanobia ani. 10Jamajjeya eyaya miya huohuiajjaña Onésimo bajjani dejjajo miquea o queapame a'yojji. Oya jiquiojo enijje ani Jesosa Quitojo jjashahuabaqui'yo ecue huohuijo, ecue bacua jama eyaya oya baña.
11Yahuajo oya mijo echacochacopoquijjitii poanaje mique jjeshe. Jamatii queapame pojjeama oya chacochaconaje mijo ebionei. Jjeya ca oya queapame chacochacoani enijje, mijo pea-ai queapame chacochacopoquije o'oya. 12Eyaya oya huacuaya mique huoojeao'oyaña. Ecuea oya queajeanee. Jamajjeya oya queapame ja'ajjequi'yocue. 13Eyaya oya enijjetii animeesa-aña ojaya e ejeanobia ani Eyacuiñajjija esohui queapame Quitojo easahuajji. Oya mique ejjocojo anicajji e asahuajji epojji. 14Jamatii ecuea Onésimo e jiquiojo ani asahuajji eanimeejji pojjeama poaje oya mijo chacochacoanijojoya. Ecuea oya animeecajji poanaje enijje jamatii ecuea miya huohuiajjajjima. Chojja, ecuea miya jama eajji pojjeama. 15E'e pojja'a queapame Onésimo jjasejjaquinaje so'o mijo. Oya ca quijje minijje anitiitiipoquije'yo. 16Oya mijo echacochacopoquijjitii ejjeshe miquea oya jamaya baca-ajja. Mahuisojonei pojjeama miquea oya bacajji. Jjeya ca oya eseja dohue pea-ai poani Quitojo miquea oya jamaya bapea-aicajji. Ecuea oya queajeanee poani. Jamajjeya jjeya miquea oya queajeanee apea-aicajji oya mijo chacochacopoquije'yojojoya, oya miquea dohue Jesosajo poanijojoya.
17Miya enijje ani jayojja chacochacopoquiani esohuijo eya jjashahuabaquiani. Jamajjeya queapame oya ja'ajjequi'yocue e jayojjaya. 18Miquea echacojji ojaya chacojeyojjima enequijo, e'e pojja'a miquea aquiana ohua siicanajejo eyaya miya sosequiaje. 19Miquea ebajji jiquio ecueanei esohui poani eyaya jiquio jeasiiaña ecueanei emeya. E'ejojonei eyaya miya jiquio oja sii cuenta sosequijeyoje. A'a pajea'yojji eyaya miya yahuajo sohuihuohuinaje Jesosajo ejjashahuabaqui'yojji. Jamajjeya miquea eya queapame acajji Onésimo ja'ajjequi'yojji. 20Miya ecue dohue poani Quitojo. Jamajje miya jama poani jjabaquimajje che eya queapame acue. Eya queabihui pomee'yocue Onésimo eja'ajjequi'yojji.
21Eyaya miya jama tehueme aña ecuea miya ebajojoya ojjaña jiquio eya tehueaña huisotii miyaya ajeyoje. Ecuea eba miyaya oepojji pojjeama aje. Jiquio ecue tehuejjimacuana miyaya queapame apea-aije.
Pablohua esohui oe-ejjenei tehuecapoa
22Jjeya pea-ai e cahuijji apoa acue miquea equi. Eyacuiñajjiya miquianaja mimi ejo shajja-ajjacani. Jamajjeya eya jjashahuabaquiani e jiquiojo onaja jeanobia ani ohuaya huoojeacuayameecaje'yo miquianaque ojee eanio'oyajji.
23Epafrasya jiquio enijje ejeanobia aniya Jesosa Quitojo chacochacoanijojoya esohui miquiana queabihui pojji huoojeacani. 24Marcosya, Aristarcohua, Demasya, Lucasya pea-ai ma enijje chacochacopoquinajeya esohui miquiana queabihui pojji huoojeapea-aicani.
25Eseja Emeshimesenei Jesosa Quitohua miquiana queapamenee ca-acapoquiahuatii ojayanei ejjashahuabaquijjijo.
Currently Selected:
FILEMÓN 1: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
