HEBREOS 13
13
Jesosaja epeejjicuana queaja'a ba'ecapoquijji
1Miquiananijje ba'eca Jesosaja epeejjicuana oe queajeatii apoquiacue miquianaya oya dohue oya jjo'i pea-ai poaniyajjejojoya Jesosajo. 2Cua miquianaque anicuaa poejecuana queapame oya ajjequicue, equiyasijje jjequinobiajjequicue. Becacuaa Eyacuiñajjija angelcuana queapame acajjequiapoa oque poeajo, jamatii ojaya oya bajjimajo dejja poso.
3A'a pajea'yojji joya ejeanobia anicuana. Jjashahuabaquicue ojo onijje jeanobia ani jayojja jjabaquimajje. Jjashahuabapea-aiquicue joya queanee acanajecuanajo jamatii oja mimishijo pojjeama. E'e pojja'a miquianaya pea-ai oya jayojja acaje cuaa queanee pea-aiya.
4Dejja jjahuanaquije, epona jjahueaquije pea-ai ojee eba'epoquijji jamaya queapamenee bacajji quianaja. A'a eponajo ejjahuanaquijji peajja poso ajji. Oja huanaseneinijje ojahueneinijje jaacapoquijjitii, peanijje pojjeama. Jamajjeya oe a'a peaja ehuanasenijje jaajji, peaja yahuenijje jaajji. Eyacuiñajjiya ojjaña joya peacojjojji poanicuana queaneenee pomeecaje.
5A'a oe bejjojotii jjashahuabaquipoquijji, a'a queabejjojeanee pojji. Cua miquiana Eyacuiñajjiya quiacanajejo caca oe queabihuitii pocajji, mahuisojoya. Eyacuiñajji jama poani esejo ba'a: “Ecuea miya cajaa ea-ajja-ajjajji pojjeama poaje, ejeana'yojji pojjeama, jamatii ecuea asahuajjima eba'ejeajji pojjeama miya poaje.” 6Eyacuiñajji esejo jama poani bamajje eseya meteama jama poaje ba'a:
“Emeshimeseneiya eya asahuacapoquianitii jamajje,
¿ajeo eya queamete poaje?
¡Ajeopishana de!
Eya dejjamasecuanajo queamete enequipoquijji pojjeama poaje.”
7Shahuabapoquiacue ma miquiana sohuihuohuijji poacuana ma miquianaja etii poacuana. Ma dejjacuanaya queaja'atii ba'epoquiapoa eshe nequiahua Eyacuiñajjija esohui jayojja. Ma ecua oya esohuijotii queaja'a jjashahuabaquipoquiapoa jama pea-aiya quiana oe ba'epoquicue.
8Jesosa Quito oyatii nequipoquiani, pea po'yoajja. Yahuajoneitii, jjeyanei, quijje pea-ai oyatiiya nequipoquije. 9Ma pea esohuicuana Eyacuiñajjija esohui jama pojjeama a'a shajja-ajjajji. Dejjacuaa maya huohuicanitii bobicuanajo ache ijjiaca-ajja, ache ijjiacajji pea-ai. Coma esohuicuanajoya quiana queaca'a etiipoquijji pojjeama poaje. Eseya caca Eyacuiñajjija esohuineijo queaca'a tiipoquije ohuaya eseya queapamenee acapoquiani jjabaquimajje.
10Eyacuiñajjija equi-aijo chacochacopoquianicuaa Moisesja tehuejo ehuone equiyotehuejeamee equia ani oepojji ijjiacapoqui'yani. Jesosa Quito jjaquiaquiapoa emano'yojji eseja mimishijo ma ecua ehuone enaa jehui'yo quiacapoquiapoa cuaa jama pea-aiya poa oya. Jamatii ma Eyacuiñajjija equi-aijo chacochacopoquianicuana Jesosajo jjanahuemeequi'yojjima nequiani ojo jjashahuabaquiajjajjejojo. 11Bacue, Eyacuiñajjija equi-aijo chacochacopoquiani ebionei etiiya ehuonecuanaja na' dojonobiaquicanequiani Eyacuiñajji equecuayijjidojjojo aniyasijje onijjejaajjicuanaja mimishi cuijeameejji. Ma manomeeca'yonaje oja na' shojji ehuonecuanaja eyami ca dahuajeacapoquiani cuaa ona queahueshapishana ba'e esecueyasijje. 12Oya jayojja Jesosa queaneenee mano'yapoa ona queahueshapishana ba'eca esecueyasijje. Majoya oja enaneiya eseja mimishicuana cuijeajeyoca'yapoa, ojaya'yo epojji. 13Jamajjeya esejaya jjeya ma etiiquianaja esohui queaquehua cajaa acajji Jesosanijjenei ejjapeequipoquijji. Dejjamimishicuaa Jesosa cajaa amajje queahueshapishana ba'eca esecueyasijje manomeeca'yapoa. Jama pea-aiya eseya cajaa jjapomeequicajji dejjamimishicuanajo Jesosa jayojja. 14Jiquio meshi ese queapamenee ba'epoquijjitii pojjeama poani. Jamajjeya se oe ma quijje Eyahuasijje anitiitiipoquije meshijo queabihui jjaishoaquicapoquijjitii. 15Eyacuiñajji bihuiatiitiicapoquijji ojjaña pojjajo. Jesosa Quitohua eseya jamaya bihuiameesahuacapoquije. Eseja enabajje esohui cuayaquipoquije o bihuiajji. Ma ecua yahuajo ehuone enaa jehui'yo quiacapoquiapoa cuaa Eyacuiñajjija queapame ebajji, jama pea-aiya eseja esohui o bihuiajji ba'esohuaquije Eyahuasijje o queabihui pomeejji. 16Queapame oe peacuananijje ba'epoquicue o asahuajji. Cua miquianaja ani aquianacuana bobicuana pea-ai peacuana quiacue ojaya chamajo. Miquianaja quia Eyacuiñajjiya queabihuineeya bacaje ehuone enaa jehui'yo quiacapoa jama.
17Miquiana sohuihuohuipoquiajji poani etiicuanaja esohuijo oe jjashajja-ajjaquicue. Shajja-ajjaneipoquiacue oya miquiana jaahuanapoquiajji poanijojoya ojjaña pojjajo mecajje pea-ai. Quijje Eyacuiñajjiya oja chaco miquianajo bacaje a'a queapame a'a queapame pojjeama oya chacochacopoquinaje. Jamajjeya miquianaja etiija esohuijo Eyacuiñajji queabihui poaje miquiaaya etiija esohui queapame shajja-ajjapoquianaje bamajje. Miquianaya ca shajjama' jayojja poanitii ohua huohuicajo Eyacuiñajji queayeno poaje.
18Eyacuiñajjinijje mimipoquicue ecuanajo. Ecuana jjabaquiani queaja'a ba'epoquiani ecuanaja mimishi huanaquehua pojjima'nei. Jamaya ecuana ba'epoquisapoanitii. 19Eyaya quiana huohuiajjaneiaña ejo emimijji Eyacuiñajjinijje ojaya e miquianaque epoquimeecuajio'oyajji miquiananijje anio'oyaa.
Oe-ejjenei esohui
20Eya jiquio mimipoquiani Eyacuiñajjinijje ese queaquijijjijajinee pomeejji poaninijje. Ohuaya Emeshimesenei Jesosa emano'yo jaa shequimeeca'yapoa. Jesosa ese jaahuanapoquiajji poani ovejacuanajaahuanajji jayojja queaca'aneetii nequiani. Eseya ca oja ovejacuana jayojja poani. Oja enaneiya Eyacuiñajjija esohui eyacua ojaya'yo epojji queaca'a pomeecanaje ejaatiitiijji. 21Eya mimipoquiani onijje ojaya quiana equiapoquiajjijo cua miquiaaya saña huisotii queaja'a eba'epoquijji. Jama pomajje miquianaya Eyacuiñajjija esohui jayojja ba'epoquije. Eya onijje mimipea-aiani Jesosa Quitoja miquiana queaca'a mimishiama eba'emeepoquiajjijo. Miquiana jama ba'epoquiani bamajje Eyacuiñajji queabihuinee poaje. Quito ejjabihuiatiiquipoqui. Jama capoahua.
22Ecue dohuecuana jjo'icuana Jesosajo, a'a oe hueyahueya-ajjajji jiquio eya tehueaña esohuicuana ebapoquiajji. A'a jjapajeaqui'yojji jiquio eya tehuenaje esohui iyehuisojo. 23Bacue, jjeya eyaya quiana huohuije Timoteojo. Oya jjeya huoojeacuayaca'yonaje ejeanobia ani. Oya eque poecuaji'yajo eyaya dojoje enijjetii miquiana bao'oyaa.
24Miquiana sohuihuohuipoquiajji poani etiicuana majo ba'eca Jesosaja epeejjicuana pea-ai esohui queapame acue. Italia meshijo ba'ecacuaa esohui miquiana queabihui pojji huoojeacanaje.
25Eyacuiñajjiya quiana queapamenee ca-acapoquiahuatii ojayanei ejjashahuabaquijjijo.
Currently Selected:
HEBREOS 13: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
