HEBREOS 12

Jesosajotii jjashahuabaquicapoquijji

1Jamajjeya jjashahuabaquicue ma yahuajonei queahuiso ba'ecapoa cuanajo. Macuanaya Eyacuiñajjija esohuijo e'ejojonei jjashahuabaquipoquiani queaca'atii ba'epoquiapoa. Jamajjeya jjeya eseya pea-ai oya jayojjaya queaca'atii ba'ecapoquijji, o cajaa apojjima'. Joya ese queaquehua jjashahuabaquimeejji poanicuana cajaa aneicue. Ma mimishiya ese queaquehua pomeemajamajajji epo cajaanei a'yocue, a'a shahuababeca'yojji. Jjashahuabaquipoquicuetii oja esohuijo queaca'a etiipoquijji joya ecua dejja cuajicuajipoquianitii nequiñaquijjimanei jama pea-aiya. 2Jesosajoneitii oe jjashahuabaquipoquicuetii, peajo pojjeama. Jesosaaya eseya ebionei Eyacuiñajjija esohuijo jjashahuabameequicapoa. Oya esejo jjabameequipoquiapoa e'ejojonei oja esohuijo jjashahuabaquipoquiapoatii o mano'yojjijo. Bacue, Jesosa acui ecuiata'apeejo ba'e queaca'a poa emano'yojji jamatii queahuisocuaa oya jama manoje'yo bamajje niñebacapoa queamimishinee poso. Jesosaja ca ebatii poa queaneenee po'yomajje queabihuinee poaje'yo. Jjeya oya oja Chii ani ebañeimijijje queabihuinee ani'yo ojjañacuana huoojeapoquiajjitii poani.

3Jamajjeya Jesosajo jjashahuabaquipoquicuetii oya queaneeca'atii ba'e mano'yapoa jjanahuequijjimanei. Dejjamimishicuanajo ejjamanomeequi'yojji oya jjaquiaquiapoa ma o botiamanei poacuanajo. Jamajje oe o jayojjaya queaca'a pocue huacuaya queamimishi epo-o'oya poanijje, oja esohui cajaa ea'yo poanijje pea-ai. 4Miquianaya queamimishi ba'e'yosapo-ajjanei poani oja esohui cajaa asapo'yoajja jamatii mimishiamanei epojji mano'yojjima so'o. 5¿A'a quianaja epajea'yo Eyacuiñajjija esohui ma ohua huohuicapoa oja bacuacuanajo? Oja esohui etehue jaa jama poani ba'a:

“Ecue bacuacuana jjabahuejjaquicue

Eyacuiñajjiya quiana queacamaja pomeecani miquianaja mimishijo jjabaquimajje.

A'a queayenotii pojji, a'a ojaya botiama'yo poso jjabaquijji pea-ai

queacamaja pomeecajje miquianaja mimishijo.

6Bacue, Eyacuiñajjiya ojjaña joya oja queajea poanicuana nahuecanitii queamimishi epo-o'oya poanijje.

Ojjaña joya ohua bacani oja bacuacuana queacamaja pomeecaje ejjabahuejjaquijji oja mimishijo.”

Jamaya oja esohui etehue jaa. 7Eyacuiñajjiya quiana queacamaja pomeecani ejjabahuejjaquijji jjabaquimajje ojaya'yotii poani oja bacua e'ejojonei jjabaquicue. Bacue, ojjaña echiimesecuaa oja bacuaneicuana queaneepishana pomeecani ejjabahuejjaquijji queaja'a eba'epoquijji. Jamajjeya oe Eyacuiñajjiya quiana queacamaja pomeecajje jjabahuejjaquicue majoya. 8Oya jayojjaya ojjaña eseya oja bacuacuana Eyacuiñajjiya queacamaja pomeecani ejjabahuejjaquijji joya ecua echiimesecuaa oja bacuanei acani jama pea-aiya. Jamajjeya eseya jamatii nequi ojaya queacamaja pomeejjimatii jjabaquimajje oja bacua e'ejojonei pojjeama poani, ojjañaja jea jayojja poani queahuesha chii nequi. 9Eseya esho'yahua shajjama' jayojja poajo eseja chiicuaa queaneepishana acapoquiapoa ejjabahuejjaquijji. Jamatii ohua queaneepishana acaniya eseja chii eseja nae pea-ai eseyaya oya queapame bapoquiapoa. Jamajjeya eseja Chii-ai Eyacuiñajji Eyajo nequi queapamenee bacapoquijji jamatii ohua queacamaja pomeecani eseja mimishijo ohuaya eseya ba'etiitiimeecaje'yohuajjejojoya Eyahuasijje. 10Eseja chiiya eseja naeya jiquio meshijo ba'eya eseya queaneepishana acapoquiapoa iyeshequiajahuiso queapame etiipoquijji ojayanei ejjashahuabaquijjijo. Eyacuiñajji ca ojjaña bajeyojeyojji poaniya ca eseya queacamaja pomeecani ejjabahuejjaquijji ese queaja'a ba'epoquijji, jamatii pojjeama. Jamaya ohuaya eseya acapoquiani ese mimishiama eba'epoquijji o jayojja pea-ai. 11E'ejojonei ohua queacamaja pomeecajje maneitii eshequi nequijo eseya queayeno ponanani, queanee pea-ai jjabacuajiquiani. Majoya quijje eseya queajjashahuabaquija'a po'yani, jjabahuejjaquinaje jjabaquimajje, queabihui po'yani, queneama queabei poani onijje pea-ai.

12Jamajjeya joya ca'a-ama po'yani quiana oe Eyacuiñajjijo queaja'a ba'epoquio'oyacue. Miquianaya emenei'yo poani jayojja ecuioshajjanee'yo jayojja pea-ai poani, queaja'atii ba'epoquiajja. 13Jamajjeya oe queaja'anee ba'epoquio'oyacue jiquio ecua se ejeojji epijajineijje poquiani jama. Miquianaya jama queaja'a poaje'yo bamajje joya ca'a-ama poanicuana huacuaya epoquio'oyajji pojjeama poaje. Oya pea-ai queaja'a poaje o'oya Eyacuiñajjijo, joya ecua dejja quibojjisha nequisohua-ajja jama pea-ai epojjitii pojjeama poaje, nequisohuaje'yo.

14Ojjañacuananijje queabei queneama oe ba'esapopoquicue. Mimishiama eba'epoquijjijo jjashahuabaquicue. Cua queamimishitii ba'epoquianicuanaja Emeshimesenei ebajjitii pojjeama poaje'yo. 15Eyacuiñajjiya quiana queapamenee acapoquiani ojayanei ejjashahuabaquijjijo jjabaquimajje, a'a oya cajaa ajji. Miquianaja ejjashahuabaquijji queamimishi a'a huanaquehuajji miquianaja sapadojjojo. Coma ejjashahuabaquijji esapajotii jaa tiipoquije joya ecua acuisajjacuana queahuesha poquiani jama. Majoya quijje ma mimishiya peacuana queaquehuanee pomeecaje. 16Che oema'nei jjaquiaquijjimanei quiana oe pocue pea dejjanijje pea eponanijje ejaajjijo. A'a Eyacuiñajjija esohui peajja jayojja ajji ma ecua yahuajonei Esauhua acapoa jamaya. Ohuaya Eyacuiñajjija quia queapamenee ebionei cuaya esohui peajja jayojja bamajje quiajeacapoa oe plato bobi sosejje. 17Miquianaja eba quijje ohuaya oja chiija esohui Eyacuiñajjija o queapamenee ba'emeesahuajji oja huohuijji nisho a-ajjacapoa. Oja chiiya oya jama huohuime mi-acajje Esaú paneineiapoa majoya queayenonee pomajje. Jamatii oya pea jjashahuabaquime po'yojjima poa oja mimishijo.

Yahuajonei israelitacuana queametenee pocapoa eyiyo Sinaí nequi quibohuasijje ejjachichaqui nequica

18Yahuajonei israelitacuana eyiyo Sinaí bajjani nequi quibohuasijje jjachichaquicapoa. Majo nequiya cuaquijiji queaquemo jijiba'esohuaquije queahuichachahuojamoo ba'esohuaquije bacapoa cuaa. Quea-aaponeeya eyiyo, eyatahuatahua pea-ai queyacapoa. Beni queaquemo ponequiapoa ma eyiyo jamacoojoya. Miquianaya Eyacuiñajjijo jjanequichipiquimajje oya jama jjabameequije bajjimanei poanaje, ma ecua israelitacuaa bacapoa jama pojjeama. 19Majo ejjachichaqui nequicacuaa baasa' queashajjaquijjonee miacaje shajja-ajjacapoa. Eyacuiñajji janobajjimanei mimije shajja-ajjapea-aicapoa. Queametenee pocapoa cuana majoya, jamajjeya Eyacuiñajji majo ejjachichaqui nequicanijje emimipajea'yojji huohuiajjacapoa cuaa. 20Queameteneeneeya shajja-ajjacapoa cuaa Eyacuiñajji jama mimime poaje ba'a: “Ojjaña jiquio e ani eyiyo quishijji poajecuana quecuaca'yojji emejeya, meiya jajaca'yojji pea-ai manei eshequi nequijotii ohua quishicajo. Huo ehuonecuaa eyiyo quishicajo oya manomeeca'yojji.” 21Eyacuiñajji jama mimime poani shajja-ajjamajje queameteneenee pocapoa cuana. Moisés pea-ai queametenee poa. Jamajjeya oya jama poa ba'a: “Eya meteneimajje cacacacani.”

22Miquianaya ca jjeya jama pea-ai epojji pojjeama. Pea eyiyo Sión bajjani nequiyasijje jjanequichipiquinaje ma Eyacuiñajji eshetii nequipoquianija meshiyasijje. Jerusalén meshi eyacua Eyajo aniyasijje jjanequichipiquinaje quiana. Ma meshi Eyahuasijje anijoya ejjachichaqui nequica angelcuana queahuisonee Eyacuiñajji bihuiajji poani. 23Miquianaya jjanequichipipea-aiquinaje ma ebionei Jesosaja epeejji poacuana aniyasijje. Macuanajaya oja bajjani etehue jaa Eyahuasijje cuamaya o ba'etiitii'yojji. Eyacuiñajji nequiyasijje pea-ai jjanequichipiquinaje quiana. Ohuaya ja'anei ojjañacuanaja oja mimishi huohuicaje'yo. Jjanequichipipea-aiquinaje quiana ma queapamenee ba'epoquiapoacuana emano'yoja edojjoshahua aniyasijje. Macuanaya queapamenee poani oja nahue'yo apoa epo. 24Jesosa nequiyasijje pea-ai jjanequichipiquinaje quiana. Ohuaya esohui eyacua Eyacuiñajjija'yo epojji yecapoa. Jesosaja enaa eseja mimishicuana cuijeaca'yapoa. Jamajjeya oja na' queapamenee poa, ma ecua Abelja ena' jama poa pojjeama queapamepishana.

25Jamajjeya quiaa oe a'a jiquio Eyacuiñajjija esohui cajaa ajji. Bacue, ma yahuajonei Eyacuiñajjija esohui Moisesja ye cajaa ajji poacuana Eyacuiñajjiya queaneenee pomeecapoa queapame po'yojji nisho huohuiajjaneimajje. ¿A'a eseya pea-ai queaneenee pomeecaje'yo Eyacuiñajji Eyajo nequija esohui queapame cajaa ajo? E'e, queaneenee pomeecaje'yo pea-ai. 26Yahuajonei Eyacuiñajjiya Moisés oja esohui etehue quiamajje meshi huehuahuehuameecapoa oja mimi queasajeaneeya. Jjeya oya jama poani pea-ai ba'a: “Ecuea mimi queasajeaneeya meshinei pojjeama huehuahuehuameeje o'oya, eyatahuatahuahuasijjeyee pea-ai huehuahuehuameeje oe-ejjeneiya.” 27Oja esohui oenei huehuahuehuameeje o'oya jama poanijje ba'a: “Eyacuiñajjiya ojjaña oja panacuana jiquio eseya baña huisotii aquianacuana chama'yo acaje. Joya eanitiitiipoquijji oja panacuana caca oe anitiitiipoquije, ejjachama'qui'yojjitii pojjeama poaje.” 28Ma Eyacuiñajjiya queapamenee huoojeacapoquianitii meshi Eyahuasijje eseya anitiitiimeecaje'yo onijje. Maya meshi Eyahuasijje anitiitiipoquije. Jamajjeya oe Eyacuiñajji ejjabihuiatiiquipoqui. Oya gracias acapoquijji. Oya queaca'aneetii nequiani shahuabacapoquijji. Jama saya oya poani eseya ojo chacochacopoquije. 29Eseja Eyacuiñajji jiquio ecua cuaquijiji queaquemohua ojjaña ebiocuana dahuajeajeyocapoquiani jamaya poani. Jamajjeya oya queaca'aneetii nequiani shahuabacapoquijjitii seja.

Currently Selected:

HEBREOS 12: ESE

Highlight

Compare

Copy