1 TIMOTEO 5
5
1Jesosaja epeejji dejja etiinojinoji nequi queamimishi poajo, a'a oya esho'i jayojja tecueaneime ajji. Chojja, queabei ca onijje mimicajji, mique chiinei jayojja niñesheame oya acue. Jesosaja epeejji dejjacuana esho'i queanahue bacajji mique chahuanei jama oe acue. 2Oya jayojjaya Jesosaja epeejji eponatiicuana mique naenei jayojja apea-aicue queajea. Jesosaja epeejji eponacuana esho'i mique jjo'inei jama queanahue bacajji. A'a onijje queamimishi epojjijo jjashahuabaquijji.
Eahuemano'yocuanajo esohui tehuecapoa Pablohua
3Bacue, eahuemano'yocuana oja huapa pojjeamaneicuana chamajo, queahuesha ba'ejo, Jesosaja epeejjicuana jjachichaquipoquianija asahuacajji oya. 4Oja bacuacuana yanijo oja osecuacuana yanijo pea-ai ca oja nae eahuemano'yo oja bacuacuanaja queapame asahuacapoquijji ebionei. Ebacuacuaa etiiya oja chii oja nae pea-ai queajea amajje oya asahuacapoquije ojjañaja ebajji. Jamaya caca queapame eba'epoquijji ohua queapame tiimeesahuacanaje sosejje. Majoya o jama poani bamajje Eyacuiñajji queabihui poaje. 5Eahuemano'yocuana joya oja huapa pojjeamacuanama'nei ani ca Eyacuiñajjijoneitii queabihui jjaishoaquipoquiani ojaya o ba'emeesahuapoquiajjijo. Jamajjeya oya mecajje epojjajo pea-ai mimipoquianitii, mimipajea-ajja Eyacuiñajjinijje ojaya o queapame ba'emeesahuapoquiajjijo, bobicuana oja quiameesahuajjijo pea-ai. 6Beca eahuemano'yocuana ca quea-aquianahuisonee epojjijo jjashahuabaquipoquianitii. Jamaya queapame pojjeama eba'epoquijji eahuemano'yocuana. Eyacuiñajjiya oya bacani edojjoshahua mano'yo, ejjasejjaquitii ani ojo. 7Jamajjeya oe eahuemano'yocuana jiquio esohui huohuineicue o queapame eba'epoquijji ojjañaja ebajji. 8Jesosaja epeejjicuanaja oja huapa pojjeamacuana asahuacapoquijji, joya oja equineijo onijje ba'ecacuana ojaya asahuapea-aicapoquijji. Coma oja huapa pojjeamacuana asahua-ajjanei poanicuaa ca Eyacuiñajjija esohui cajaa acani, queaquehuanee ba'epoquiani. Bacue, Jesosaja epeejji pojjeamacuaa oja huapa pojjeamacuana asahuacani. Oya jama poanijo esejaya pea-ai asahuacajji.
9Eahuemano'yocuana esho'i 60 shequiajame etii pojjima' ani a'a tehuejji o asahuapoquiajji. Joya oenei dejjajo jjahueaqui eahuemano'yo ani oe tehuecue Jesosaja epeejjicuanaja easahuapoquiajji. 10Tehuejjimahua ebionei bacajji eahuemano'yocuana achajja oya ba'epoquinaje. A'a Eyacuiñajjijo echacochacopoqui bacajji oya. A'a oja bacuacuana ohuaya queapame tiimeecanaje bacajji. A'a ohuaya peacuana oja equiyasijje poeyajo queabihuiya jjequinobiacapoquinaje bacajji. A'a ohuaya Jesosaja epeejjicuana asahuacapoquinaje bacajji. A'a ohuaya aema'cuana bobima' poajo queamano poajo pea-ai asahuacapoquinaje bacajji. Jamajjeya eahuemano'yocuaa a'a peacuana asahuacapoquiani bacajji oja bajjani etehuejji.
11Joya esho'i eahuemano'yocuana, a'a tehuejji. E'e pojja'a oya pea dejjajo jjahueaqui'yosaneipoaje oja huohui esohui oya Eyacuiñajjijo echacochacopoquijji poaje cajaa amajje. 12Jama poajoya eahuemano'yo queamimishi poani Eyacuiñajjiya bacaje oja huohui esohui oya Eyacuiñajjijo echacochacopoquijji poaje cajaa acanajejojoya. 13Mahuisoneijo pojjeama oya queamimishi poani Eyacuiñajjiya bacaje. Oya peaja equicuanahuasijje poquinequije anicuaa. Majoya oya queahuiso mimimimije peacuanajo. Esohui queatai acachana ohuaya joya esohui jama aca-ajja. Jama pomajje oya queahueyanee poaje'yo, chacochacoajjanei poaje'yo. 14Jamajjeya eahuemano'yocuana joya esho'i ani jiquio eya huohuiaña jama queamimishi eba'epoqui poanijje cajjahueaqui'yahua pea dejjajo. Majoya ohuaya ebacua mejocaje'yo, equijotii anipoquije'yo pea-ai. Eyacuiñajjija esohui sapo-ajjanei poanicuanaja oya jama po'yajoya eniñebajji pojjeama poaje'yo. 15E'e, beca eahuemano'yocuaa Eyacuiñajjija esohui cajaa aca'yonaje ebionei eshahua Satanasja esohuijo ejjashahuabaquio'oyajji.
16Jesosaja epeejji eponacuanaja oja huapa pojjeama eahuemano'yo yanijo ojaya eponaja oya asahuacapoquijji Jesosaja epeejjicuana ejjachichaquipoqui ani queacamaja epo poanijje coma epona eahuemano'yojo. Joya eahuemano'yocuana oja huapa pojjeamama'nei ani caca oe Jesosaja epeejji oja meshijo jjachichaquipoquianicuanaja oya asahuacajji.
Jesosaja epeejjicuanajaahuanapoquiajji etii poani dejja queapame esohuijo chacochacopoquiani bacajji
17Jesosaja epeejjicuanajaahuanapoquiajji etii poani dejjacuana queapame poani bacapoquijji. Oya queapame esohuijo chacochacopoquianijojoya ma meshijo ba'eca Jesosaja epeejjicuanaja yenoamaa sosequiacapoquijji. Joya Eyacuiñajjija esohui huohuipoquiajji poani etiicuana queapame poani bacajji. Jesosaja epeejjicuanaja oya sosequiacapoquijji oya queapame esohuijo chacochacopoquiani sosejje. 18Eyacuiñajjija esohui yahuajonei etehue jaa jama poani ba'a: “A'a maca nabajeyojji joya anosoai quishisajajji poani.” Oya ijjiaijjiasapoaje majo chacochacoani. Pea Eyacuiñajjija esohui etehue jaa oya jayojja poani jama ba'a: “Joya chacochacoanicuana sosequiacajji oja chaco sosejje.”
19Jesosaja epeejjicuanajaahuanapoquiajji etii queamimishi poani oe dejjaa esohui jama yecajo, a'a e'ejojonei ohua acani poso acuajijji. Beca dejjaa, tres dejjaa pojja'a esohui oya jayojja oya queamimishi poani yecajo majoya shajja-ajjaneicue. A'a oya e'ejojonei poani baneicue.
20Majoya etii poani dejja queamimishi poanaje bamajje Jesosaja epeejji ejjachichaqui anicajo oya tecueacajji. Dejja etii jama acaje bamajje majo ani Jesosaja epeejjicuana queamimishi posapo-ajja poaje.
21Eyacuiñajjiya miya bacanitii, Jesosa Quitohua pea-ai achajja miya chacochacopoquianitii oja esohuijo. Eyacuiñajjija babaca angelcuaa miya bapea-aicani. Jamajjeya oe jiquio esohuijo jjashajja-ajjaquipoquicuetii. Ojjañacuana oya jayojja pea-ai poani bacajji. Oe Jesosaja epeejji queapamenee, pea ca queapamepishana poani, a'a oya jama ajji. 22Dejjacuana joya Eyacuiñajjijo chacochacosapoanija beojjojo miquea eme a'a jii huanajji o nequimeecuajijji etii epojji. Ebionei achajja oya ba'epoquiani baneisocue. Joya dejja mique nequimeecuaji queamimishi poajo miya o queamimishi pomeejji poani jayojja bacaje cuaa. Queaboejea mimishiama ba'epoquicue.
23Miya queaseeneemaja poaniya a'a oopana enanei ishimajamajapoquiajji. Uvajjajjana' oepojji huamajje ishicue mique see huaquiajji.
24Becacuanaja oja mimishicuana queaja'a bacani cuaa. Ojjañaja eba comacuana majoya queaneenee poaje'yo. Peacuanaja mimishi ca bajjimanei acani cuaa jjeya. Quijje ca queaja'a bacaje cuaa comacuana majoya queaneenee poaje'yo. 25Becacuanaja aje oya jayojjaya oja chaco queapame poani bacani cuaa jjeya. Peacuanaja chaco queapame poani jamatii bajjima cuanaja. Quijje ca oja chaco queapame poanaje bacaje cuaa. Oja chaco queapame bajjimatii yajji pojjeama cuanaja poaje.
Currently Selected:
1 TIMOTEO 5: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
