1 TIMOTEO 2
2
Achajja mimime pocajji Eyacuiñajjinijje ejjachichaqui anicajo Pablohua tehuecapoa
1Ebionei jiquio esohui huohuije. Eyaya quiana Eyacuiñajjinijje mimimeesa-aña ojjañacuanajo. Eyacuiñajjinijje mimianiya cua miquiaaya saña huisotiicuanajo oya huohuiajjacue. Ojjaña meshiyasijje ba'ecacuanajo mimipoquicue pea-ai. Eyacuiñajji oe gracias apoquiacuetii onijje mimianiya. 2Joya etii poanicuanajo emeshimese poanicuanajo pea-ai mimicapoquijji onijje oja meshijo ba'ecuana ojaya queapame eba'emeesahuapoquiajjijo. Jama poajoya eseya queabihui camaja-amapishana ojee ba'epoquije queneama oja meshijo. Eyacuiñajji queaca'aneetii poani eojjañacuanamese shahuabapoquiacuetii. Esenijje ba'ecacuana queapame poani esejaya bacapoquijji. 3Jama epojjiya queapamenee. Majoya Eyacuiñajji ese nahue'yojji poani queabihui poaje esejo ese jama ba'epoquiani bamajje. 4Ojjaña meshijo ba'ecacuana Eyacuiñajjiya oja esohui shajja-ajjameesa-acani ma esohuijoya ejjanahuemeequi'yojji cuana. 5Enequitii oya oeneinei Eyacuiñajji. Enequi oeneinei dejja Eyacuiñajji esejo jjabeimeequi'yojji poani. Maya caca Jesosa Quito bajjani. 6Jesosa Quito jjaquiaquiapoa emano'yojji ojjaña eseja mimishicuana sosequiajeyo'yojji. Jesosa mano'yojji epojja poeajo Eyacuiñajjiya ojjaña dejjacuana, eponacuana pea-ai yahuajoneitii nahue'yosa-acani cuana queaja'a huohuicapoa. 7Majoya oja esohui huohuipoquiajji epojjiya Eyacuiñajjiya eya nequimeecapoa queahuisocuana sohuihuohuiquinequijji epojji oja babaca. Ohuaya eya huoojeacanaje judío pojjeamacuana sohuihuohuiya ojo e'ejojonei ejjashahuabaqui'yojji. Jiquio eya jjeya mi huohuiaña esohui e'ejojonei poani, siajje pojjeama.
8Eyaya ojjaña dejjacuana Jesosaja epeejji poani ojjaña meshijo ejjachichaqui anica Eyacuiñajji bihuiajji mimimeesa-aña onijje. Ma dejjacuaaya mimishiama nequicaa oja eme eyahuasijje jeasohuacaje onijje emimijji. Dejjacuana queneama mimijajijjima onijje camimiquiahua jjachichaquimajje. 9Bacue, eyaya eponacuana daqui queapame quea-aopishana huoshomeesa-aña, joya daquiquepenei, queanasinee huoshojji poani ejjayamibameequijji jama pojjeama. A'a quiana eponacuana jjashahuabamajamajaquijji miquianaja esao epashajjajjajjijo. A'a oro eyijji queanahuenee queasosehuiso jjeshejjijo jjashahuabamajamajaquijji. A'a daqui queasiyonee queasosehuiso jjeshejjijo pea-ai jjashahuabamajamajaquijji. 10Oja meshijo ba'ecacuana asahuajjijo caca oe jjashahuabaquicajji eponacuana, daqui queanahuenee huoshojjijotii pojjeama. Jamaya queapame ba'epoquije eponacuana joya Eyacuiñajjijo echacochacojji jjaquiaqui. 11Eponacuana jecanei anicajji esohui huohuicanijo ojaya eshajja-ajjajji ojjaña ejjachichaqui anicaja ebajji oya esohui jayojja ba'epoquisapoani. Jamajjeya o huohuijji poanija esohui shajja-ajjacajji eponacuanaja mimima' aniya. 12Jesosaja epeejjicuana esohuijo ejjachichaqui anicajo eponacuanaja dejjacuana Eyacuiñajjija esohui yajja poani huohuica-ajja ojjañajo. Eponacuana Jesosaja epeejji ejjachichaqui anicajo etii poani jayojja poca-ajja, oya jecanei anicajji. 13Jamaya eponacuana esohuijo anicajji Eyacuiñajjiya ebionei dejja panacoocapoajojoya. Majoya quijjepishana epona panapea-aicapoa. 14Adán pojjeama eshahuajo jjadasiameequiapoa. Epona caca eshahuajo jjadasiameequiapoa. Majoya oja esohui siajjejo epona queamimishi jjapomeequiapoa. 15Eponacuana jjahueaquimajje jjajaahuanaquije mimishijo oja bacuacuana queapame tiimeesahuajji poanijjejojoya. Oya queajjashahuabaquija'a pomajje Eyacuiñajjija esohuijo jjashahuabaquipoquije, peacuana queajea acapoquije, mimishiama ba'epoquisapoaje pea-ai.
Currently Selected:
1 TIMOTEO 2: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
