1 CORINTIOS 5

Oe Jesosaja epeejji queaquehuanee ba'e, oja shanasenijje jaani

1Ecuea eshajja-ajja oe miquianajo Jesosaja epeejji queaquehuanee ba'e oja shanasenijje jaani, oja huanase jayojja acani. Queamimishineenee ca jama epojji, Eyacuiñajjima' poanicuana jama ba'eajja. 2Miquianaya Jesosaja epeejji jamatii queaja'a ba'e poso jjabaquiani. ¡Coma dejjajo ca queayenonee pocajji poanaje, miquiananijje jjachichaquimeeca-ajja pea-ai poanaje! Oya queatainee ba'epoquiani. Jamajjeya miquiana ejjachichiqui anijo oya jeacuayacajji poanaje, queamimishi ca coma. 3Eya miquianaque poquijjima ani so'o, jamatii eya queahuiso miquianajo jjashahuabatiitiiquiani ojjaña pojjajo. Eyaya jamatii cocuama poquijjimaa huohuiaña yajja ma dejja queamimishinee poani acajji. 4-5Miquianaya eseja Emeshimesenei Jesosa Quitoja bajjanijo jjachichaquicue ojee. Majoya yajja oya acajji eyaya huohuije miquiananijje aniya jamaa. Jesosa Quito Emeshimeseneiya queaca'a pomeecaje quiana ma dejja queamimishinee poani oja yami ebionei eshahua Satanás bajjani equiajji ojaya o queaneenee pomeejji. Oja yami queaneenee ponequije so'o. Ojaya edojjoshahua ca enahue'yo poaje Emeshimesenei Jesosa Quito poeo'oyajji epojja poeajo.

6Miquianaya jjabihuiaquiani queaja'a ba'epoquiani jjabaquimajje jamatii ma dejja queamimishinee poaninijje jjapeequiani. Jiquio quianaja esohui eba, oepojjinei eshejjeemeejjiya ojjañatii harina eiñahuahuo shejjeemeejeyocani. Oya jayojjaya oe dejja queamimishinee miquiananijje jjachichaquipoquianiya queahuiso Jesosaja epeejjicuana queamimishi pomeecaje. 7Bacue, judiocuaa fiesta eshahuabapoquia'yojji ma Eyacuiñajjiya oja etiiquianaja bacuacuana nahuecapoajo pahui shejjeemeejji jeajeacani. Majoya aje pahui shejjeemeejjima dahuacani cuaa harina oopana. Oya jayojjaya ma dejja queamimishinee poani jeacuayacue miquiananijje jjachichaquipoquiani. Majoya miquianaya pahui shejjeemeejjima jama pea-ai poaje ma dejja queamimishinee poaninijje jjachichapajeaqui'yomajje. Yahuajonei judiocuaa ovejaja bacua yahuesho'i naa jehuica'yapoa oja bacuaejja mano'yojjima epojjijo. Oya jayojjaya Quito manomeeca'yapoa ese nahue'yojji epojji eseja mimishijo. 8Judiocuaa pahui shejjeemeejjima ijjiacapoa yahuajonei oja bacuacuana nahuecapoajo eshahuaba'yojji. Pahui shejjeemeejji jeajeacapoa cuaa ma fiestajoya. Jama jayojja eseja ejjashahuabaquijji queamimishi poani cajaa apea-aicajji. Ma ecua yahuajonei judiocuaa pahui shejjeemeejjima ijjiacapoa ma fiestajoya jama pea-aiya ba'ecapoquijji, mimishi huanaquehuaca-ajja, e'ejojonei pocajji.

9Eyaya quiana pea ecue tehuejo huohuinaje ¡a'a joya peacojjojji poanicuananijje jjapeequipoquijji! ¡A'a coma esohui pajeajji! 10Ma eya tehuenaje esohui jama poanijje pojjeama ba'a: Ojjañatii Eyacuiñajjima' jayojjacuananijje joya queamimishi ba'enijjeya jjapeequica-ajja. Chojja, jama pojjeama eya poani. Eyacuiñajjima' jayojjacuana ojjañatii queamimishi epojeyojeyo ba'eca. Oya peacojjojji poani, queabejjohuiso posaneipoanicuana, siipojjicuana, dejjaja ne eyacuiñajjinisho bihuiajji poanicuana. Jamajjeya onapejjejo, onachipineijo pea-ai jiquio meshijo miquiana ba'esapo-ajja pomajje, ¿achacua ba'ecajji? Achacuapishana. Chama' pea meshi ona mimishiama ba'ejji poani. 11Ma eya tehuenaje esohui jama poanijje ba'a: Ojjaña joya jjabaquiani Jesosaja epeejjicuana jamatii oya peacojjojji poani, a'a onijje jjapeequijji. Joya queabejjojeanee poani, joya eyacuiñajjinisho bihuiajji poanicuana, joya queamimitai poani, joya huoojjitii poanicuana, joya siipojjicuananijje pea-ai, ¡a'a onijje anisapojji! ¡a'a onijje ijjiaijjiajji! 12-13Bacue, Eyacuiñajjiya eya huoojeacanaje oma' jayojja poanicuanaja mimishi huohuiya pojjeama. Eyacuiñajjiya caca oe onaja mimishicuana queaja'a huohuicaje'yo o queaneenee pomee'yojji, eyaya pojjeama. Miquiaaya joya minijje Jesosaja epeejji queamimishi ba'e queaja'a oya huohuiquicajji. Maya miquianajaya echacojji. Jamajjeya joya peacojjojji ba'e oja shanasenijje jaani dejja huoojea'yocue miquiananijje ejjachichaquipoquitii poanijje.

Currently Selected:

1 CORINTIOS 5: ESE

Highlight

Compare

Copy