1 CORINTIOS 4

Eyacuiñajjija babaca ona sohuihuohuiquinequijji poani dejjacuanajo tehuecapoa

1Bacue, miquianajaya bacajji ecuana Quitojo chacochacopoquiani, mahuisojoneiya. Eyacuiñajjija ma yahuajonei ojjañacuana bameejjima poa esohuicuana ecuana babacacapoa maya jjeya queaja'a ehuohuijji. Jiquio ecua dejjaa quea-aquianahuisohua pea ojo chacochacoani huohuicani oja aquianacuanajaahuanajji epojji, jama pea-aiya ecuana oja esohui queaja'a huohuipoquiajji nequimeecanaje. 2Joya peaja aquianacuanajaahuanajji poani queaja'a chacochacocapoquijji, o chacomeejji poanija esohuijo queapame jjashajja-ajjaquicapoquijji. 3E'e pojja'a becacuana ecue chacojo a'a queapame a'a queapame pojjeama jjaniñebaquiani majotiiya. Miquianaya pea-ai pojja'a quehuajje jjaniñebaquiani ecue chaco bamajje. Ee, eya ca majotii queayeno jjashahuabaquiajja. Ecue chaco a'a queapame a'a queapame pojjeama poani majotiiya ecuea ehuohuijji pojjeama. 4Jjeya ca eya queapame chacochacopoquinaje esohuijo jjabaquiani. E'e pojja'a eya queapame pojjeama chacochacopoquiani bacani cuaa. Emeshimesenei Eyacuiñajjiya caca oe ecue chacocuana bacanitii. A'a queapame a'a queapame pojjeama poani eya huohuicaje'yo quijje ohuaya. 5Jamajjeya oe a'a peacuanaja chaco a'a queapame a'a queapame pojjeama poani huohuisapojji epojja ojjaña chaco huohui'yojji epojji poejjimahuajo. Emeshimeseneiya caca oe poeo'oyamajje ja'anei huohuicaje'yo ojjañaja chaco a'a queapame a'a queapame pojjeama poanaje. Ma quea-aapo jayojja ba'epoquianinajecuanaja mimishi huohuicaje'yo pea-ai. Ma oja sapadojjojo ehuanaquehua jaa oja mimishicuana huohuicaje'yo pea-ai. Joya queaja'a ba'epoquianinajecuana ca ohuaya oya queapame chacochacopoquinaje huohuicaje'yo.

6Ecue dohuecuana jjo'icuana, eyaya jjeya jama tehuemeya aña ecuea eba'ejjijo, Apolosja eba'ejjijo pea-ai miquiana jjashajja-ajjaquipoquijji Eyacuiñajjija esohuijo. Miquianajaya ejjashahuabaquijjineijo eba'epoquijji pojjeama jamaya esohui tehueaña ecuaa. Joya esohuihuohuijji poanicuana achajja oya chacochacoani, ¡a'a majo jjaniñebaquijji! ¡A'a ohua queapame huohuicani, peaa ca queapame pojjeama jama ajji! Oya jayojja bacajji oya miquianajo chacochacopoquiani queaja'a eba'emeesahuajji. Eyacuiñajjija esohuihuohuijji poanicuana queapame chacochacopoquiani baje quiaa jama jjashahuabaquime pomajje. 7Beca quiana queasapaja'a jjabaquiani ache queapame chacochacoani esohuijo, ache queapame pojjeama chacochacoani ehuohuijji. ¿A'a miquianayanei queasapaja'a poani jjabaquiani? Chojja, Eyacuiñajjiya quiana queasapaja'a nequimeecani, miquianayanei pojjeama. ¿Ache shai miquianajanei poani ma Eyacuiñajjija miquiana quiameesahuajjima? Achepishana. Jamajjeya oe a'a miquianayaneitii jjabihuiaquijji. Ojjaña jiquio miquianajaya poani aquianacuana Eyacuiñajjija quia, oyatii poe pojjeama.

8Miquianaya ojjaña queasapaja'anee queaca'a pea-ai jjabaquiani jiquio ecua dejja quea-aquianahuiso pea aquiana sapo-ajja jama quea-aquianahuisojjejojo. Eyacuiñajjiya mahuisonei quiacanaje posoya jjabaquiani pea quianaja quijje ejjesheo'oyajji pojjeama poso anaje, apoa poanaje poso jjabaquiani. Jamaya miquianayaneitii queaca'a poani poso jjabaquipoquiani, joya ecua emeshimesecuaa pea huoojeacani jama pea-ai posoya quiana jjabaquiani. Ecuanajo jjashahuabaquiajja miquiana sohuihuohuijji epojjijo. E'e pojja'a queapame pome miquiana emeshimese jayojja epojji peacuana huoojeapoquiajji epojji. Jamajojjemo ecuana miquiananijjetii nequipea-aime ona huoojeapoquiajji epojji pea-ai. 9Ecuana Eyacuiñajjija babaca ona sohuihuohuiquinequijji poani jamatii queahuisocuaa bacani ecuana quijje-ejjenei nequiani, ojaya nahueama jama. Eyacuiñajjiya ecuana jama epojji nequimeecani. Joya ecua oe dejja Roma etiicuaa huohuicani emano'yojji ojjaña ejjachichaqui anicacuanaja oya manoje'yo ebajji jama jayojja ecuana jjabaquiani. Oya jayojjaya queahuisocuana ejjachichaqui anicajo ecuana queaneenee acaje, manomeecaje'yo pea-ai bacaje cuaa. Angelcuaa ecuana jama acaje'yo bapea-aicaje. 10Ecuana Quitojo chacochacopoquianijojoya sapadojjoma' jayojja bacani cuaa. Miquianaya ca queasapaja'anee poani jjabaquiani. Ecuana ca miquiaaya ca'a-ama poani baña, miquianaya caca oe queaca'anee poani jjabaquiani pea-ai. Miquianaya queabihuinee poani peacuana esohui queapame mimiajo miquianajo. Jamatii ecuanajo peacuana jjaniñebaquiani shajja-ajjamajje miquiana yenoama poani ecuanajo. Jama jjashahuabaquime poca-ajja. 11Ecuana queashoenee pomajamajani, queanabataja pea-ai. Oeneinei che daqui ecuanaja eyamijo ba'e, queahuoe poajo chama' pea ehuosho'yojji. Esohuijo ecuana cuiamajamajacapoquiani cuaa ma esohui botiamaneijojoya. Ecuana esohuihuohui poaequiani queahuiso meshiyasijje jamatii quima'nei nequi. 12Ecuana chacochaconeiani bobi jjeshejjijo, peaja asahuajjimajjejojoya. Peacuaa esohui ecuanajo queatai acajo ecuana o niñeba-ajja esosejje, o jayojja pea-ai po-ajja. Onaa botiamanei acani, queaneenee pomeecani pea-ai esohuijo jamatii ecuana queaca'a nequipoquiani. 13Ecuanajo jjaniñebaquiani, ecuana mata-acani pea-ai shajja-ajjamajje jamatii esohui queapame ecuana mimiani onijje. Ecuana jiquio ecua shabo ejeajea ani jama bacani cuaa, peajja. Jamaya ecuana botiamanei acapoquiani cuaa jjeyanei pea-ai.

14Ecuana jama mimime poani miquiana queabicho pomeejjijo pojjeama. Miquiana queaja'a niñesheajjijo ca jamaya ecuana poani. Jiquio ecua echiimeseya oja bacuanei huohuicani jama pea-ai miquiana ajjijo esohui jama huohuiaña miquiana queajeajojoya. 15E'e bacue, miquiana sohuihuohuijji poani queahuisonee nequica. Jamatii ecue sohuihuohuicoo ca quiana ca oe Quitojo, miquianaja chii jayojja poani. Esohui queapame Jesosa Quitojo eya huohuicooajje quiana jjashahuabaqui'yonaje. 16Jamajjeya quiana oe eyaya huohuimajamajaña e jayojja pea-ai queaja'a eba'epoquijji.

17Miquianaya jama ba'eme epojjijo ecuea epeejji Timoteo huoojeaje. Oya ecue bacuaejja jayojja poani ecuea queajeanee Emeshimeseneijo, oya pea-ai queaja'a ba'epoquiani. Ohuaya quiana shahuabameecaje jiquio eya huohuipoquiaña esohuiya oyaya queameshihuiso jjachichaquipoquianicuanaja ebajji achajja Jesosa Quitoja epeejjicuana ba'ecapoquijji. 18Becaa quiaa eya quijje cocuama poquijjima epoaje poso aña miquiana queaquehua ba'e baa. Majoya beca quiana queaquehuatii ba'epoquiani miquianajanei ejjashahuabaquijjijo. 19Emeshimeseneiya eya quijje cocuama poquimeesahuacaje, jamajojoya eya poquije achajja miquiana ba'e baa. Joya oyanei queaca'a jjabaquianicuana pea-ai baquije. A'a e'ejojonei Eyacuiñajjiya oya queaca'a pomeecani baquije. E'e pojja'a oyanei queaca'a poso jjabaquiani. 20Bacue, becacuana mimijeani enabajo queaca'a eba'epoquijjijo jamatii oya ba'epoquiani, Eyacuiñajjijo chacochacoajja. Jamajje Eyacuiñajji e-esemese poani ese jjabaquiajo Emeshimeseneiya eseya queaca'a ba'emeesahuacaje, enabajo mimianijo pojjeama queaca'a ba'epoquije. 21¿Achajja eya miquianaja meshiyasijje poeajo bajjequisa-aña quiaa? ¿A'a eya miquiana queamimishi ba'e tecueaa poeje basa-aña? Eya jama posapoña-ajja miquiananijje. Jamajjeya miquianaja ejjashahuabaquijji queaquehua cajaa acue. Majoya eyaya queabihuiya quiana bañaje. Ecuea miquiana queajeanee ebajji esohui queapame añaje.

Currently Selected:

1 CORINTIOS 4: ESE

Highlight

Compare

Copy