Iƹibraniyen 1
1
Siḏi Arebbi issawaȓ akiḏneɣ s Mmis
1Ḏi zman issawaȓ Arebbi ak ȓejḏuḏ nneɣ s uqemmum n lʼanbiya s waṭṭas n ṯwaȓaṯin s waṭṭas n ibriḏen. 2Walakin ḏi lʼayyam-a ineggura issawaȓ akiḏneɣ s uqemmum n Mmis iƹni wenni iy ixḍar aḏ iwareṯ marra ṯimesȓayin, zzayes iy d ixȓeq Arebbi ddunect. 3Netta ḏ nnur n lƹaḍama n Arebbi ḏ ṣṣifeṯ n ṭṭabiƹa nnes bȓa axeṭṭi. S jjheḏ n wawaȓ nnes iy zi irebbu marra ṯimesȓayin. Wami iḥell ȓmuƹṣiyaṯ n bnaḏem issiṣfa-ṯent, ssenni iqqim x ufusi n Arebbi Subḥana wa Tƹala.
Lƹaḍama n Mmis n Arebbi x lmalaʼikaṯ
4Fa Mmis iḏweȓ imɣar aṭṭas x lmalaʼikaṯ minzi isem nni iy ḏas iswareṯ Arebbi imɣar aṭṭas x yisemawen nsent.
5Arebbi ƹemmarṣ war ḏas yinni i can n lmalak zi lmalaʼikaṯ aqa cek ḏ Mmi, nhara nec ḏewȓeɣ ḏ Babac.
Ƹemmarṣ war yinni x can n lmalak qa nec aḏ iȓiɣ ḏ Babas, netta aḏ yiȓi ḏ Mmi.
6U ƹaweḏ Arebbi wami d itawi Mmis amenzu#1.6 Amenzu netta ḏ ifxeddi, qqaren-ṯ i uḥenjir iy d ɣa ixeȓqen ḏ amezwaru. ɣar ddunect-a iqqar: Aḏas sejjḏent marra lmalaʼikaṯ.
7Xmi issawaȓ x lmalaʼikaṯ iqqar:
<Ixeǧeq-d lmalaʼikaṯ nnes ḏ arriḥ,
ḏ imsexxaren nnes ḏ aḥaḏuq n ṯmessi.>
8Walakin x Mmis iqqar ḏi Lkitab:
<Ay Arebbi, ȓƹarc nnec aḏ idum i ȓebda n ȓebdaṯ,
ȓḥaqq aḏ yiȓi ḏ ṯaɣriṯ n ȓeḥkam nnec.
9Tḥibbiḏ min iṣeȓḥen, tƹiffiḏ ccarr.
S manaya Arebbi iƹni Arebbi nnec,
iḏhen-ac s zzect n ȓefraḥeṯ,
isiȓi-yic ḏeg ujenna x imƹacaren nnec.>
10Iqqar ƹaweḏ: <Ay Arebbi, ḏeg umezwaru ṯserseḏ dsasaṯ n ddunect-a, ṯeggiḏ ijennaṯen#1.10 Ijennaṯen niṯni ḏ ljamaƹ n ujenna, iƹni ḏ ssmawaṯ. s ufus nnec.
11Yina aḏ fnan cek aḏ tdumeḏ,
marra aḏ rcan am warruḍ.
12Aṯen ṯḍefseḏ am uzeǧab ḏ axarṭiṭ,
aḏ twabeddȓen am warruḍ.
Cek lla, war tbeddiȓeḏ ca,
iseggwusa nnec ƹemmarṣ aḏ fnan.>
13Iwa ƹemmarṣ Arebbi war yinni i can n lmalak zi lmalaʼikaṯ: <Qqim-d x ufusi inu aȓ d ɣa ggeɣ ȓƹaḏyan nnec swadday iḍaren nnec.>
14Lmalaʼikaṯ, niṯenti min ƹnant? Niṯenti ḏ arruḥaṯ twassekkent-id aḏ sexxarent i yinni iy ɣa iwarṯen asenjem.
Currently Selected:
Iƹibraniyen 1: RIF
Highlight
Copy
Compare
Share
Want to have your highlights saved across all your devices? Sign up or sign in
