Lev 4
4
Ebihongwa eby'okuganyiza ebibi
1MUKAMA akagambira Musa ati: 2Gambira abaana ba Isirairi oti: Kakuba omuntu akora ekibi atagenderiire, ekimu ha bintu MUKAMA ebi yatangire, akakora ekimu hali byo, 3anyakusobeze, kakuba aba ali nyakatagara ayaseesirweho amagita, akaleetera ati abantu omusango, ahongere MUKAMA enimi ento etanyina kamogo habw'ekibi eki akozire. 4Enimi egi, agireete ha mulyango ogw'Eheema ey'okutangatanganiramu, omumaiso ga MUKAMA, ate omukono gwe ha mutwe gwayo, agiitire omumaiso ga MUKAMA. 5Nyakatagara ayaseesirweho amagita, akwate ekicweka ky'esagama yayo, agitwale omu Heema ey'okutangatanganiramu; 6aibike orukumo rwe omu sagama egi, agimiise emirundi musanju omumaiso ga MUKAMA, ali aheeru y'enyigamo ey'Ekiikaro Ekirukwera. 7Nyakatagara asiige esagama ha mahembe g'itambiro ericumiikirirwaho obubbani oburukuboya kurungi, itambiro eri niryo erinyakuli omu Heema ey'okutangatanganiramu, esagama y'enimi enyakusigaireho, agiseesere ekicweka ekya hansi eky'itambiro eryokezibwaho ebihongwa, erinyakuli ha mulyango ogw'Eheema ey'okutangatanganiramu. 8Ebisajwa byona eby'enimi ey'ekihongwa eky'okuganyiza ebibi, abigiihemu, ebisajwa ebirukusweka na byona ebinyakuli ha byenda, 9ensigo ibiri n'ebisajwa byazo, n'eby'omu mugongo, n'obune obw'empagara abitwale hamu n'ensigo 10nyakatagara abyokeze ha itambiro eryokezibwaho ebihongwa (nk'ebyakubaire biihirwe omu nimi ey'ekyonzira habw'okusaba obusinge). 11Baitu orususu n'enyama yayo yoona, omutwe, ebirenge, ebyenda n'efa yayo, 12enimi yoona agiihe omu rukande, agitwale omu kiikaro ekirungi nambere baseesa iju, agihembere omurro agyokye.
Ekihongwa eky'okuganyiza ebibi ebikozirwe abantu kwonka
13Kakuba abantu ba Isirairi bakora ekibi batagenderiire, bakakora ekimu ha bintu MUKAMA ebi yatangire, bakacwa omusango, ekintu bakakisereka abantu abandi bakalema kukimanya; 14ekibi eki, ekibakozire obu kirimanywa, abantu abo bahonge enimi ento ey'okubaganyiza ekibi eki, bagirete omumaiso ag'Eheema ey'okutangatanganiramu; 15abakuru b'abantu bate emikono yabo ha mutwe gw'enimi, egi bagiitire omumaiso ga MUKAMA. 16Nyakatagara ayaseesirweho amagita, atwale ekicweka ky'esagama yayo omu Heema ey'okutangatanganiramu, 17aibike orukumo rwe omu sagama egi, agimiise emirundi musanju omumaiso ga MUKAMA, ali aheeru y'enyigamo ey'Ekiikaro Ekirukwera. 18Asiige esagama ha mahembe g'itambiro erinyakuli omumaiso g'Eheema ey'okutangatanganiramu, omumaiso ga MUKAMA, enyakusigaireho, agiseesire ekicweka kya hansi eky'itambiro erinyakwokezibwaho ebihongwa, erinyakuli ha mulyango ogw'Eheema ey'okutangatanganiramu. 19Ebisajwa byayo byona abiihemu, abyokeze ha itambiro. 20Enimi nukwo agikole ati; nkooku yakozire enimi ey'okuganyiza ekibi eky'abanyakatagara, n'enu nukwo agikole ati; nyakatagara asabire abantu nukwo baganyirwe. 21Enimi agiihe omu rukande agitwale agyokye nkooku yayokeze ey'okubanza.
Ekihongwa eky'okuganyiza ebibi ebikozirwe abalemi b'abantu
22Omulemi obu alikora ekibi atagenderiire, akakora ekimu ha bintu MUKAMA Ruhanga we ebi yatangire, akacwa omusango, 23kakuba bamumanyisa ekibi eki yakozire, aleete embuzi empaya, etanyina kamogo, 24ate emikono ye ha mutwe gwayo, agiitire omumaiso ga MUKAMA omu kiikaro nambere baitira ebihongwa eby'okwokya, ebe kihongwa kye; eki nikyo kihongwa eky'okuganyiza ekibi. 25Aho nyakatagara atwale ekicweka ky'esagama, aibikemu orukumo rwe, agisiige ha mahembe g'itambiro eryokezibwaho ebihongwa, enyakusigaireho, agiseesire ekicweka ekya hansi eky'itambiro eryokezibwaho ebihongwa. 26Ebisajwa byayo byona abyokeze ha itambiro nkooku yayokeze ebisajwa eby'ekyonzira ekiheebwayo habw'okusaba obusinge; amusabire kuganyirwa ekibi kye nukwo aganyirwe.
Ekihongwa eky'okuganyiza ekibi ekikozirwe omuntu omu
27 #
Kubar 15:27,28. Kakuba omu ha bantu kwonka akora ekibi atagenderiire, akakora ekimu ha bintu MUKAMA ebi yatangire, 28abantu obu bamumanyisa ekibi eki yakozire, omuntu ogu aleete embuzi ebuguma etanyina kamogo. 29Ate emikono ye ha mutwe gwayo, agiitire omu kiikaro nambere haitirwa ebihongwa eby'okwokya, ebe kihongwa kye eky'ekibi eki yakozire. 30Nyakatagara atwale ekicweka eky'esagama yayo, aibikemu orukumo, agisiige ha mahembe ag'itambiro ery'okwokezaaho ebihongwa, enyakusigaireho, agiseesire ekicweka ekya hansi eky'itambiro. 31Embuzi agiihemu ebisajwa byayo byona nkooku yaihire ebisajwa omu mbuzi ey'ekihongwa habw'obusinge, abyokeze ha itambiro, harugemu ekisorokoko ekirukuboyera kurungi MUKAMA, asabire omuntu ogu kuganyirwa, nukwo aganyirwe.
32Kakuba aleeta omwana gw'entaama nikyo kibe kihongwa eky'okumuganyiza ekibi, 33aleete eruusi etanyina kamogo, ate emikono ye ha mutwe gw'ekihongwa eki agiitire omu kiikaro nambere baitira ebihongwa eby'okwokya, nukwo emuganyize ekibi. 34Nyakatagara atwale ekicweka ky'esagama ey'ekihongwa eky'okuganyiza ekibi, aibikemu orukumo, agisiige ha mahembe ag'itambiro eryokezibwaho ebihongwa, enyakusigaireho, agiseeserre ekicweka ekya hansi eky'itambiro. 35Agiihemu ebisajwa byayo byona, nkooku yabiihire omu kyonzira ekiheebwayo habw'obusinge, abyokeze ha itambiro, abigereke ha bihongwa ebindi ebyokebwa ha murro bikahongerwa MUKAMA, asabire omuntu ogu habw'ekibi kye eki yakozire nukwo aganyirwe.
Currently Selected:
Lev 4: BRR2008
Highlight
Copy
Compare
Share
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
