Lev 11
11
Ebisoro ebirukuzirwa n'ebitarukuzirwa
1MUKAMA akagambira Musa na Arooni ati: 2“Mugambire abantu ba Isirairi ngu: Binu nibyo bintu ebyomeezi ebi murukwikirizibwa kulya, ha bisoro byona ebinyakuli omunsi. 3Kyona ekinyakwasize enkangaasi ekinyakunyina obukangaasi kandi ekinyakwekuuma, omu bisoro byona, ebi nibyo musobora kulya. 4Baitu nabwo omu bisoro ebinyakwekuuma kandi ebinyakwasize enkangaasi binu mutabirya, nibyo binu: engamiya, n'obweraaba eyekuuma baitu teyasize nkangaasi y'omuziro hali inywe; 5enjoga, n'obweraaba eyekuuma baitu teyasize nkangaasi y'omuziro hali inywe. 6Orume, n'obururaaba rwekuuma baitu tirwasize nkangaasi, rw'omuziro hali inywe. 7Empunu, n'obweraaba eyasize enkangaasi kandi enyina obukangaasi, baitu teyekuuma, y'omuziro hali inywe. 8Enyama y'ebisoro ebi, mutaligirya kandi emitumbi yabyo mutaligikwataho, bintu by'omuziro hali inywe.
9“Binu nibyo murukwikirizibwa kulya: byona ebinyakuli omu maizi. 10Ebintu byona ebinyakuli omu nyanja rundi omu bisaaru kandi ebinyakunyina ebisuti, n'ebigaragamba, musobora kubirya. Baitu kyona ekinyakuli omu nyanja rundi omu bisaaru ekitanyina kisuti n'ebigaragamba, ebihangwa byona ebyomeezi ebinyakwijwire omu maizi by'omuziro hali inywe. 11Biriikara biri by'omuziro hali inywe; enyama yabyo mutaligirya, emitumbi yabyo nayo, mugizizeege. 12Ebintu byona ebinyakuli omu maizi ebitanyina bisuti n'ebigaragamba, by'omuziro hali inywe.
13“Omu binyonyi, muzirege binu: isamba, ekigeera, enyange, 14maleere, esega ez'emiringo yoona, 15ebyegoora eby'emiringo yoona, 16ehudu, ekisomabwire, enunda, empungu, 17ensindizi, enzikeeri, enyawaawa, 18embaati, karooli, 19ekidongodongo, ekiisamahano n'ekihuguhugu.
20“Ebihuka byona ebinyakunyina amapapa kandi ebinyakugendesa amaguru ana, by'omuziro hali inywe, 21nimwikirizibwa kulya ebinyakunyina emirundi ei bigurukisa. 22Nimwikirizibwa enzige eza buli mulingo emparra eza buli mulingo, ebijeerre ebya buli mulingo, enseenene eza buli mulingo. 23Baitu ebihuka ebindi ebinyakunyina amapapa, eby'amaguru ana, mubizizeege.
24“Binu biraabafooraga abatasemiire; omuntu weena araakwataga omutumbi gwabyo, araabaga naazira okuhika akairirizi, 25kandi weena araahimbaga ekicweka kyakyo, ayogyege engoye ze, aikale naazirwa okuhika akairirizi. 26Buli kisoro ekinyakwasize enkangaasi kandi ekitanyina bukangaasi rundi ekiteekuuma, ky'omuziro hali inywe; buli muntu araakikwatahoga, araabaga asiisikaire. 27Ebisoro byona ebinyakurubasa ebiganja, omu bisoro byona ebinyakugendesa amaguru ana, nibizirwa, araakwataga ha mitumbi yabyo, araabaga naazirwa okuhika akairirizi, 28kandi ogu araahimbaga emitumbi yabyo, ayogyege, ebyokujwara bye, aikale naazirwa okuhika akairirizi; ebintu ebi mubizizeege.
29“Omu bintu ebinyakugendesa enda ebinyakuli omunsi, binu mubizizeege, akanyamunkanga, ekikonkomi ekikooto n'ebikonkomi ebindi, 30engurukizi, enswaswa, omunya n'empimpina. 31Omu bintu byona ebinyakugendesa enda ebi nibizirwa; weena araabikwatahoga bimazire kufa, araabaga naazirwa okuhika omu kairirizi. 32Ekintu kyona ekinyakugwibwaho ekimu ha bintu ebi ebifiire, kizirwege, obu kiraabaga kiri kintu ekinyakubaizirwe omu muti, rundi kijwaro, rundi rususu rundi guniya, ekikwato kyona ekinyakukozesiibwe omulimo gwona, kisemeriire kwibikwa omu maizi kandi kizizibwe okuhika omu kairirizi; hanyuma y'akasumi ako, tikyazizibwege. 33Kandi ekimu ha bintu ebi, kakuba kigwa omu kikwato kyona eky'ibumba ekikwato eki okyate. 34Eky'okulya kyona ekirukuliibwa ekisobora kuba kihikirweho amaizi gakyo, kizizibwege; kandi ekyokunywa kyona ekiba kisangirwemu, nakyo kizizibwege, nikiba kiri ky'omuziro. 35Buli kintu ekinyakugwibwaho akacweka k'omutumbi gw'ekintu eki kizizibwege; obu garaabaga gali mahiga rundi kyoto, kisemeriire kuseeswa; habwokuba nibizizibwa, mwikalege nimubiziza. 36Kyonka iziba rundi ekintu ekindi ekirukulindirwamu amaizi, tibyazizibwege, baitu ekintu ekindi kyona ekirukuhika ha mitumbi yabyo, kiraazizibwaga. 37Kandi akacweka koona ak'omutumbi kakuba kagwa ha mbibo erukugenda kubyarwa, embibo egi teezizibwege; 38baitu embibo egi kakuba bagiseesira amaizi, kandi akacweka ak'emitumbi kakagihikaho, obu embibo egi mugizizeege.
39“Kandi ekisoro eki murukwikirizibwa kulya, kakuba kifa, ogu arukukwata ha mutumbi gwakyo, arazirwaga okuhika akairirizi, 40kandi ogu arukulya ha mutumbi gwakyo, ayogyege engoye ze, aikale okuhika omu kairirizi.
41“Ebintu byona ebinyakwekwata akaseebo, mubizizeege; bitaliriibwa. Kyona ekinyakugendesa enda kandi kyona ekinyakugendesa amaguru ana. 42Rundi kyona ekinyakunyina obugere bwingi, ebintu byona ebinyakwekurra, ebinyakwekururra ha itaka, muleke kubirya, habwokuba bintu binugwa. 43Mutalirya ebintu ebirukugendesa enda, ebi nyakwekururra ha itaka abantu bakabanuga kandi mutalyesiisa habwabyo mukafooka abarukuzirwa. 44#Lev 19:2; 1Pet 1:16.Habwokuba ninyowe MUKAMA Ruhanga wanyu; habweki, mweyeze mufooke barukwera, habwokuba nyowe ninyera. Muleke kwesiisa n'ebintu ebirukugendesa enda, ebinyakwekururra ha itaka, 45habwokuba ninyowe MUKAMA Ruhanga ayabaihire omunsi Misiri, mbe Ruhanga wanyu; habweki, mubege abarukwera, habwokuba nyowe ninyera.”
46Eki nikyo kiragiro ekirukukwata ha bisoro, ebinyonyi n'ebihangwa byona ebyomeezi ebinyakwikara omu maizi, ebihangwa byona ebinyakwekururra ha itaka, 47ekirukuleeta enyahukana ha bintu ebirukuzirwa kandi ekirukwahukaniza ebihangwa ebyomeezi ebirukwikirizibwa kuliibwa n'ebihangwa ebyomeezi ebitarukwikirizibwa kuliibwa.
Currently Selected:
Lev 11: BRR2008
Highlight
Copy
Compare
Share
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
