Aos. 16
16
1Aŋun, aponi ŋituŋa ŋul kisicanae a ŋityaŋ a ŋul,
apotu ŋityaŋ ŋul ŋulu alalak kisicana ŋituŋa ŋul.
2Akilo iyoŋ akisican ŋituŋa kon a ŋakisicaneta a ŋun, ibu iyoŋ kitoodiu arimao kon neni a ŋituŋa kon,
ibu iyoŋ kitemok aŋuna kec ŋalurui ŋuna enyamete ikes,
akimuj ŋina abobon ŋina elamari ekibure ŋolo ka akiriŋ,
3ikotere nai ani iitanete ŋituŋa ŋul akimuj
todaun ekibure tari ŋolo edit ŋolo ka akimuj,
aŋuna a ŋityaŋ a ŋulu aronok a ŋulu eakikinitae ikes;
nai ŋituŋa kon, apotu toryamut ŋican apaki ŋina euruwuana
ido apotu ekaku kimuja akimuj ŋina abobon.
4Arae ŋun anerae amaikina ŋikesicanak ŋul toryamut ŋican ŋul jik ŋulu eitanito ikes,
nai aponi kitoodikinae ŋituŋa ŋuluce epite ŋolo esicanere ŋimoe kec.
5Apaki ŋina abunio anyunyura kon neni a ŋituŋa kon alotyaŋ a ŋulu adedeŋak
ka apaki ŋina aponiata ŋimuno ŋulu akonyak tomunyasi ikes,
abu anyunyura kon nyerubak eyai neni kec amunyar ikes.
6Apotu ikes toryamut ŋican apaki ŋina auruwuana erae ŋulukitatamet ikes
ido apotu ikes toryamut etorube ŋolo ka alakuno akitatamun ikes ŋakiro ŋuna icikito ŋikisila kon ikes.
7Ituŋanan ŋini abu tocamu akiŋoliyar lotorube ŋol, aponi toiunae, meere etorube ŋolo ekyaaritae ŋol abu toiu ikes,
nai iyoŋ Akuj ibu toiu ikes, Akuj ŋina irae ekaiunan a daadaŋ.
8Tari anakitiya ŋun, ibu iyoŋ kitocamu ŋimoe kosi
atemar erae iyoŋ ilakununui ŋituŋa anaronis a daadaŋ.
9Apotu emaase ka ŋicuc toara ŋimoe kosi,
emam epite aponi toryamunae aŋuna ka akitaŋaleun ikes,
anerae amaikina ikes kisicanae a ŋiboorei a ŋul.
10Nai pa apotu tari ŋimuno ŋulu a ŋakisorito tomunyasi ŋituŋa kon,
anerae abu akisyon kon bu neni kec kiŋarak iyoŋ ikes kitaŋaleu.
11Apotu ŋimuno tokonyakonyata ikes ikotere etamunete ŋakiro ŋuna icikakinit iyoŋ ikes,
ido aponi atipei tolakunae ikes,
ikotere nyimuryak jik Akuj
toruworos ŋulu nyemitakinito ŋuna ka arimao kon.
12Apotu ŋikito ŋulukitaŋaleet ŋulu ka ariet, kori ŋulukiosa nyitaŋaleut ikes,
nai arae akirot kon, okoe Ekapolon abu kitaŋaleu ikes, akirot kon ŋina itaŋaleuni ŋituŋa daadaŋ;
13anerae iyakar iyoŋ apedor ŋinakiteyaret ka ŋinaaret,
irikori iyoŋ ŋituŋa tari lopukei ŋulu ka akibois a ŋina ka atwanare, ido kinyaku nabo toyarut.
14Epedori ituŋanan ŋini aronon akiar ŋinice,
nai nyepedori akinyakakin nabo neni a ituŋanan a ŋin etau ŋolo aloma aneni keŋ,
kori nyepedori alakun etau ŋolo aeni anakibois a ŋikatwak.
Kisicana ŋikuwuamisinei ŋulu amunyarak Ijipit
15Akuj, nyepatana abucar anapedor kon,
16anerae ŋituŋa ŋulu apotu nyiwuapa ŋakiro kon, ŋulu pa ikicamito iyoŋ,
ibu iyoŋ kisican ikes a apedor kon,
ibu iyoŋ kitidita ikes akiru ŋina nyiŋolikina ikes ŋinapei ka ŋakako ŋuna aya lokuwuamin ŋulu aryenyaanak,
ido abu akim tomunya ikes daadaŋ.
17Ibore ŋini ikituumokini nooi iŋes ŋakiro ŋuna abunio akim torubak erirae jik tari anakipi a ŋuna akituduŋere akim,
abu akim torubak eyakar agogoŋu akilo ŋakipi
anerae iŋarakinito ŋisubuna daadaŋ ŋituŋa ŋulu iyookino.
18Apaki ace, aponi akim kituduŋei,
ikotere nai nyenomiya ŋityaŋ ŋulu eakiyaritae akiar ŋulu nyiwuapito ŋakiro ka Akuj,
topedoryata nai ŋituŋa ŋulu nyiwuapito ŋakiro ka Akuj ayenun
atemar iwuapit ikes Akuj atubokin.
19Ani apaki ace, ŋina ayakatar ikes kidiŋ ŋakipi, abu amwanis torirau nooi akilo neni eriraa akim,
ido abu tonomiya ŋikinyom anakwap a ŋina eboiyoto ŋituŋa ŋulu pa eyookino.
Inakinae Ŋisirael Manna
20Akilo akisican ŋituŋa kon a ŋakisicaneta a ŋun, ibu iyoŋ inak ŋituŋa kon akimuj a ŋimalaikan,
ido emam ŋakinyinyir ebukorito ikes, ibu iyoŋ tokorak ikes akimuj ŋina iakuuni iyoŋ anakuj ŋina akonit sek.
Abu ŋinituŋanan tolakar aŋuna ka akimuj a ŋin ka abu tobobok ŋinituŋanan.
21Etoodiunito ŋun daadaŋ epite ŋolo iminar iyoŋ nooi ŋituŋa kon,
abu akimuj ŋin kisimwon ituŋanan daadaŋ ŋini abu akimuj iŋes
aponi akimuj ŋin kitoboboi ikotere ebobokini ituŋanan daadaŋ ŋini imuji iŋes,
22Apotu ekuno ka ŋakako kiretakis amwanis ikotere nyetala akimuj ŋin.
Arae ŋun ikotere ŋituŋa kon eyenunete atemar emunaari amwanis ŋina eyai nakako ka nakiru ŋina apolon ŋikinyom a ŋimoe kec,
23nai abu amwanis ŋinapei ŋin aŋuna ka akitoodikinia ŋulu iyookino atemar einakinio ikes ibore ŋini imujete, nyitoodiu ŋinyas keŋ neni a ŋulu iyookino.
24Iyoŋ ibu tosub ŋisubuna daadaŋ,
isitiyaete ŋisubuna ŋul apedor kec akisicania ŋulu nyiyookino,
ido anarimao, imyekinito ŋulu ikikinyomito iyoŋ.
25Aŋun, apaki daŋ ŋin, abu kilocokin alopitesyo a daadaŋ,
toruwor apaki ŋin daadaŋ ŋina kitiyanakinet iyoŋ aŋuna ka akimuj kon a ŋina alalan ka etuman,
a ŋina ibu iyoŋ inak ŋinituŋanan eitanit lopite ŋolo eitanitor iŋes;
26ikotere nai okoe Ekapolon ŋituŋa kon ŋulu imina iyoŋ epedorete ayenun
atemar meere akitare ŋikinyom epedori akitanun ŋituŋa,
nai akirot kon iŋes iturubakini ŋituŋa ŋulu ikikinyomito iyoŋ eyakasi.
27Ibore ŋini abu amwanis nyenomiya,
abu totala apaki ŋina amwanunia iwadio ekoyot ŋolo ka akoloŋ
28akitoodiun atemar emaikina toyenunae atemar itemokino ituŋanan tonyou eriŋa akoloŋ nyelomuna, ido tolakar neni kon
ka emaikina ituŋanan kilip neni kon apaki ŋina edoiyorya akoloŋ;
29anerae epuripuryaar akigeno a ituŋanan a ŋini nyelakanar neni ka Akuj lopite ŋolo epuripuryaaror ekuno emwanuni akoloŋ,
eŋopiyari akigeno keŋ lopite ŋolo eleleiyaryata ŋakipi toŋopiyasi.
Currently Selected:
Aos. 16: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.