Aos. 15
15
Aryamunet ŋina ka Akuj a ŋina a kire
1Nai neni kon Akuj kosi eyakasi nu: arimao ka ŋuna a kire,
atitinyikinit ka akipukat ŋiboro daadaŋ anakisyon.
2Tari kikisec isua, ikirae isua ŋulu kon, ikiyeni apedor kon;
nai nyikiseci isua, anerae ikiyeni isua atemar iyeni iyoŋ atemar ikirae isua ŋulu kon.
3Erae ayenut iyoŋ akiyookino ŋina a kire
ka erae ayenut apedor kon akisyakinet ŋina a ŋini nyetwani.
4Nyeoliyoro isua nakiwuap ŋuna a ŋakujo a ŋuna itiyaunit ituŋanan anapiiryanut keŋ,
kori nakiwuapit akibuses a ŋitorubei a ŋulu iositae ŋiraŋgi,
nakilip neni a ŋitorubei a ŋulu iwuanakinitae ŋiraŋgi ŋulu egelegelya,
5Ŋitorubei ŋulu isupanari etakane kec ŋibaŋaanotin,
tosodo nai kiburak ikes akilip neni a ibore a ŋini nyeyari, a ŋini erae etorube a ekatwan.
6Ŋituŋa ŋulu eminasi ŋiboro ŋulu aronok ka itamara nakigeno ŋina a niboro a ŋul,
erae ŋulu itiyaete ŋiboro ŋul, kori ŋulu iburit akilip neni a ŋiboro a ŋul.
Abaŋao ŋina ka akilip neni a ŋitorubei a ŋulu eyetae a ecoto
7Emunauni ekayan ŋiboro a ecoto,
ido kitiyau ejok nooi eborosit ŋolo epedoryo iwon akisitiya
toyeu alocoto a ŋolopei,
ŋiboro ŋulu ajokak ka ŋice ŋulu nyejokak
nai eyeuni iŋes ŋinibore aŋuna a ŋolotic.
8Anakicanican apaki kec, eyeunete ikes etorube ŋolo ka akuj alocoto a ŋolopei,
etorube a ituŋanan ŋolo itiyaunete ikes a ecoto ŋol,
erae ŋolo emunaar atipei toruwor nabo ŋalup ŋuna alemunere ŋituŋa daadaŋ
ani edoli apaki ŋina eboŋoryata ŋalup nalup, elemaryo akiyar ŋina aponi kiwuakinae nalup ŋun.
9Nai nyemisito ŋikayiak ecoto atemar eyai apaki ŋina emaikina ituŋanan totwan,
kori nyeyenete atemar euruwuana akiyar a ituŋanan,
nai ecamito ikes akiloiloa ka ŋulu eyeete ŋiboro a egolid ka esilipa
ka erokete akitiya ŋiboro a ŋulu itiyaete ŋiboro anasuwat a ŋinanyaŋ,
etamete ikes atemar ikitiyae ibore ŋini apolon nooi anayere ŋakujo ŋuna isikwaanitae ka icebore.
10Erae ŋitai a ŋikayiak a ŋul ekuron, erae akigeno kec ŋinakoŋinait akilo tari aŋoryanut
ka erae akiyar kec ŋinacaryoit akilo tari ecoto,
11anerae apotu ikes nyeyenut ŋini etiyauni ikes,
ido inak ikes ŋitai ŋulu itiyaete ka kieŋak neni kec ŋitai ŋulu eyarete.
12Nai apotu ikes totamakis akiyar yok erae ŋinakiboiyet koŋin,
kituruwosi ŋirwa ŋulu a ŋasuban ŋuluryamunet ibore idio,
anerae apotu ikes totamakis atemar emaikina ituŋanan toryamu ŋisiliŋa ŋulu daadaŋ epedori aryamun, tari kerae anakitiya ŋuna aronok.
13Ayenete ŋituŋa lu akilo ŋituŋa ŋuluce daadaŋ atemar aseca ikes
apaki ŋina etiyauniata a ecoto koŋin ŋiboro ŋulu epatana abwaŋa ka kiceut ŋitorubei.
14Nai ŋulu ebaŋaaka nooi ka ŋulu iyaloloŋete nooi akilo tari ŋiŋwea,
erae daadaŋ ŋulu erae ŋimoe ŋulu etiŋito ŋituŋa kon erono;
15anerae apotu ikes totamakis atemar erae ŋitorubei kec daadaŋ ŋulu etiyaunitae a ecote ŋakujo
tari daŋ pa kepedorito ŋitorubei ŋul akiŋolikin a ŋakonyen kec
ka akieŋa alokumes kec,
kori akiirar a ŋaki kec,
kori ayenun ibore a ŋimoyo kec,
ido nyepedorito alosit a ŋakejen kec;
16anerae ituŋanan etiyauni ikes,
ituŋanan ŋini iwuakinitae etau neni keŋ iŋes etiyauni ikes.
Emam ituŋanan epedori akitiyaun akuj ŋina ikoni ituŋanan pei.
17Erae ŋituŋa ŋulu iboiyete, ido totwaka, ido ibore ŋini itiyauni ituŋanan a ŋakan keŋ anaronis keŋ, erae ŋini etwanit ŋinapei anakitiyaunet,
anerae ejokak ŋituŋa akilo ŋitorubei ŋulu ilipete ikes neni kec,
anerae eyakatar ŋituŋa akiyar, nai emamukatar ŋakujo akiyar.
Ŋimuno analoŋisat
18Apotu ŋituŋa kilipa tari neni a ŋityaŋ a ŋulu aronok nooi,
ŋityaŋ ŋulu eroko nooi akilo ŋuluce daadaŋ,
ŋityaŋ ŋulu tari ketamaki ituŋanan eryamuni atemar edit aosou kec
19ka tari kerae ikes ŋityaŋ, nyetakanete erae ŋulu ibusak, ŋulu ejoikinete ituŋanan,
etwakiyarito ŋityaŋ ŋul akitojokyo ka ŋarereŋisyo aneni ka Akuj.
Currently Selected:
Aos. 15: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.