Sir 8
8
Ŋuna elomunete aneni a ituŋanan ka ayakar ŋatameta
1Nyiloiloasi ka ŋituŋa ŋulu eyakatar ŋapedorosyo,
acepaki ikitiŋete ikes iyoŋ erono.
2Nyiburaete ka ŋikabarak,
acepaki ikilounete ikes iyoŋ aŋuna a ŋiboro kec;
anerae enyasu ebari ŋolo a egolid ŋulu alalak,
ido amunaiya ŋatameta a ŋirwosi.
3Nyipegenakinosi ka ikutukanot
ka nyituk ŋakiro nakiro kec lopite ŋolo etukere ŋakito nakim.
4Nyisoloorito ŋulu eyakatar ŋipitesyo ŋulu aronok, acepaki epedorete akiyany atapapaa kus.
5Nyitoŋoa ŋini eesikini akitiya ŋuna ka asecit;
totamunito atemar emaikina iwon daadaŋ ikisicani.
6Nyijamuwarit anatameta kon ituŋanan ŋini emojoŋit,
anerae iwon daŋ ŋice ikiruwor ŋulu ikimojoŋit.
7Nyilakara aŋuna ka atwanare a ŋinice;
totamunito atemar iwon daadaŋ ikilosi atwakare.
8Nyijamuwarit ŋakiro ŋuna irworosi ŋikaosok,
nai toripiripi iyoŋ ŋakitadapeta kec ŋuna irworotor ikes;
anerae iyenuni iyoŋ aneni kec ŋipitesyo ŋulu ajokak ka epite ŋolo itiyanakinia ŋirwosi.
9Nyiŋer akiirar ŋuna irworosi ŋulu emojoŋito,
anerae apotu ikes daŋ toyenut ŋun aneni a ŋikauruunak kec;
erae neni kec iŋes iyenunia iyoŋ ŋakiro,
ido ipedori aboŋokin ŋakiro apaki ŋina ikiŋisere.
10Nyiinak ŋikasecak apaki ace ŋina esecata,
acepaki ikinyamete iyoŋ ŋakiro ŋuna itenepunito ikes.
11Nyicamak ŋulu abenyak ikireunete iyoŋ,
acepaki epedorete ikes adapun iyoŋ aŋuna a ŋakiro kon.
12Nyidenik ituŋanan idio ŋini egogoŋ akilo iyoŋ ibore;
nai ani kidenik iyoŋ iŋes ibore, kimarak atemar nyeriŋa iryamuni.
13Nyitema alakuni ituŋanan a ibore a ŋini alalan todit bo ŋini iyakar iyoŋ;
nai ani kitema iyoŋ alakuni ituŋanan, kitemokino akitac.
14Nyisitak alokisila ekatubon ŋakiro,
anerae ŋuna etubunio, eruwor ŋuna eriitotor ŋituŋa ka iŋes
aŋuna eraakar iŋes ekatubon ŋakiro.
15Nyimina arukit ka ŋulu nyiyookino bon,
acepaki eruwor ikes atyonis aneni kon;
anerae itiyaete ikes lopite ŋolo italakarit ikes,
ido alotooma abaŋao kec itwakete iyoŋ ka ikes.
16Nyicamu ajikin ka ituŋanan ŋini epatana akiŋo,
ido nyirukito ka ikes anariet aneni asilon,
anerae nyekerito ikes akiar ituŋanan,
ido ani kemam ŋini ikiuni, ikiarete ikes iyoŋ.
17Nyiŋitanar ŋakiro aneni a ŋibaŋaanotin,
anerae nyepedorete ikes akimunon ŋuna imunonitae.
18Nyitiya ŋadi ŋuna imunonitae alokiŋaren ŋigelaanotin,
anerae nyiyeni iyoŋ ŋuna etakanunete.
19Nyisileereu ŋuna itami iyoŋ neni a idiotuŋanan,
acepaki iritari iyoŋ alakara ŋina sek iyakar.
Currently Selected:
Sir 8: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.