Sir 7
7
Ŋace ŋuna ikilimokinitae akiwuap
1Nyitiya aronis, ido nyebuni aronis neni kon.
2Tolwana aneni itiyaere ŋuna nyiyookino,
ido eboŋori aronis aneni kon.
3Nyiekis nawat kus akitiya ŋuna nyiyookino,
anerae ipedorete aryamun ŋican ŋulu alalak.
4Nyiwarit atemar eketopoloo Ekapolon,
kori ikisiboik erwosit lokicoloŋ ŋolo ka apolou.
5Nyimaima Ekapolon acamun atemar iyookino iyoŋ, kori nyitoodiunit aneni a erwosit atemar ios iyoŋ.
6Nyiwarit aruwor ekatubon ŋakiro,
acepaki nyipedori iyoŋ alemar amamukau akiyookino;
ipedori iyoŋ akirii ka ŋulu eyakatar ŋapedorosyo,
nai imunaari iyoŋ ayenon kon irae ŋini ijok.
7Nyitiya neni a ŋituŋa ŋadi ŋuna aronok
ka nyilema ajokis kon ŋina sek ijokya alotuŋa kon.
8Nyiboŋonokini ŋarwa ŋaarei akitiya asecit,
nyikiesikinio iyoŋ akisician tari kitiya apei daŋ.
9Nyitema, “Etamuni Akuj ŋainakineta kaŋ ŋuna alalak,
ido ani kaya ayoŋ neni ka Akuj a ŋina alokidiama nooi ainakinet kaŋ ecamuni iŋes.”
10Nyikiup iyoŋ akilip,
ido nyijamak ainanakin ibore neni a ŋikulyak.
11Nyikyenar ituŋanan ŋini itoŋoitae,
anerae Ekapolon iŋes epedori akitiditeun ka akitopoloor.
12Nyiyeu ŋuna ka alyokonu aŋuna alokaato kon,
kori nyitiya ŋuna ikote ŋun neni alokone kon.
13Toŋer alimun ŋuna ka amodiyo ka adio,
anerae erae amodiyo anaiyaret ŋina eyauni ŋuna nyejokak.
14Nyirwor ŋakiro ŋunakoŋinae anatukot a ŋikasikou,
ido nyiboŋonokini iyoŋ ŋakiro ilipi.
15Nyiremokino ŋiticisyo ŋulu agogoŋok, kori etic ŋolo ke emanikor,
etic ŋolo erae Akuj ŋina alokidiama nooi ewuakini.
16Nyimorikinosi ka ŋajoresyo a ŋikasecak,
totamunite atemar nyedidi akisicanio.
17Kitiditeun bon nooi,
anerae ŋulu nyiwuapito ŋuna ka Akuj, isicanio ka akim ka ŋikur.
Erukitene ka ŋuluce
18Nyigyela ekonikone aŋuna a ŋisiliŋa,
kori nyigyela lokaato kon ŋolo ilomunito ka iyoŋ anakook ka apei aŋuna a egolid a ŋolo ka Opir.
19Nyirita aberu ŋina aoson kori ŋina ajokan,
anerae iloit ajokis keŋ ŋina ke egolid.
20Nyiyenyi ŋipi ŋulu itiyaete alotooma akikinyoma,
kori ŋikelejilejak ŋulu einakina aŋuna a etic kec.
21Tominak alotau kon ŋipi ŋulu epiiryaka;
nyilema aneni kec alacakina kec.
22Iyakar iyoŋ ŋaatuk a? Kiyok ikes;
ani kiryamunit iyoŋ idiobore aneni kec, kiyok ikes ejok.
23Iyakar iyoŋ ŋidwe a? Kitatam ikes toyakatar ŋipitesyo ŋulu ajokak,
ido kituruwo ikes ŋulu iwuapito ŋakiro ŋinapei anasorokanu kec.
24Iyakar iyoŋ ŋidwe ŋulupesur a? kiyokiunite ikes
ka nyicamak ikes itiyaete ŋuna aronok ŋuna ecamito.
25Kipoto nakoku kon kiitae, apaki ŋin iŋes irikakinia iyoŋ etic kon ŋolo apolon;
nai inak iŋes neni a ekile a ŋolo ejokak ŋatameta.
26Iyakar iyoŋ aberu ŋina ikitalakarit iyoŋ a? Nyilak iŋes;
nai nyiwuak akikinyomit kon neni a ŋini iŋerit iyoŋ.
27Kitopoloorite papa kon a ekonitau a daadaŋ
ka nyikimuryak aryeba a toto kon apaki ŋina ikidounere iyoŋ.
28Totamunite atemar erae ŋikauruunak kon ikiuruunete iyoŋ;
alipite itaca iyoŋ ŋuna apotu ikes kitiyata aŋuna kon?
29Kitopoloorite Ekapolon a akonikiyar a daadaŋ
ka kitopoloorite ŋisacaradotin keŋ.
30Tomina ekasuban kon a agogoŋu kon a daadaŋ
ka nyijamakinit ŋiketiyak keŋ.
31Kitopoloorite Ekapolon ka kitopoloorite ŋisacaradotin
ka inanak iŋes atutubet keŋ lopite ŋolo ikicikakinitere iyoŋ ainakin iŋes:
Ŋaraito ŋuna eŋarenok, ŋainakineta aŋuna ka asecit, ŋiseketa ŋulu a ibarasit a ŋini erae amuronot, amuronot ŋina eyaununuyo aŋuna ka akiteseguno ka ŋaraito ŋuna eŋarenok ŋuna a ŋikinyom.
32Inanakinete ibore neni a ŋikulyak,
ikotere ŋarereŋisyo kus ilelebikinio.
33Inanak ka alelyanu neni a daadaŋ a ŋulu eyarete;
nyilema arimao tari aneni a ŋikatwak.
34Nyiker akitor neni a ŋulu igworosi,
kigworo kaapei ka ŋulu igworosi.
35Nyiŋayaŋaya adolokin ŋulu edyakasi,
anerae adolokin kon ikes iŋes ikiminakinere iyoŋ.
36Alotooma ŋuna daadaŋ itiyae iyoŋ, totamunite asalunet ŋina ka akiyar kon,
ido nyiseci iyoŋ jik.
Currently Selected:
Sir 7: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.