Sir 42
42
1Emaikina ikirumito iyoŋ ŋileec aboŋokin akirworo ŋuna iira iyoŋ
ka alimor ŋakiro ŋuna imunono.
Ani kitiya iyoŋ ŋun, itoodiuni iyoŋ ŋuna iyookino anamamukau ka ŋileec,
ido iruwor iyoŋ ŋini ijok aneni a ŋituŋa a daadaŋ.
Nyikiruma ŋileec alotooma ŋiboro lu
ka nyisec aŋuna ka akitopoloorit ŋituŋa ŋuluce:
2Nyikiruma ŋileec aŋuna a ŋikisila a ŋulu ka Akuj a ŋina alokidiama nooi ka aŋuna ka acamunet keŋ
ka aŋuna ka atubokin ŋulu nyiwuapito ŋuna ka Akuj.
3Nyikiruma ŋileec aŋuna ka akiyokit ŋisiliŋa a irukitos kon,
kori a ŋini irukitotor iyoŋ ilosete
ka akikor ŋiboro ŋulu sek eyakatar ŋikonei.
4Nyikiruma ŋileec akisitiya ŋakipimeta ŋuna iyookino
ka aryamun ŋiboro ŋulu alalak, kori ŋulu ekudyoko
5ka aryamun epoida anagyelanakin ŋimucurus ŋiboro
ka akitatam ŋidwe a ŋinapaki ŋipitesyo ŋulu ajokak
ka akibuŋa ipito ŋini aronon tari kelomut ŋaokot alokaku.
6Neni eyai aberu ŋina nyikinyoma, emaikina kiwuakinae akikoŋiet;
ido neni eya ŋituŋa ŋulu alalak, emaikina egolitoe ŋipukei aŋuna a ŋiboro.
7Ani kiŋadak iyoŋ ibore idio, emaikina kimarae, kori kipimae etyae, ido ani ipotori, kori ijauni iyoŋ idiobore, emaikina ŋun daadaŋ kigiritetei.
8Nyikiruma ŋileec alimokin ŋini nyeyeni, kori ibaŋaanot atemar nyiyookino ŋuna itiyae iŋes,
kori ŋini emojoŋit ŋini iilit aŋuna ka amalao keŋ.
Ani kitiya iyoŋ ŋun, itoodiuni asyomit kon,
ido ijokyar iyoŋ aneni a daadaŋ
Ŋidwe ŋulupesur ka atapapa
(Sir 7:24-25, 26:10-12)
9Eyakar papa atamatam jik ŋina imunono aŋuna a ikoku keŋ a ŋinipese
ka iyaloloŋi iŋes aŋuna keŋ nyejotoonor.
Ani eriŋa apese ŋin esorokana, etamatamae papa keŋ atemar kori acepaki nyiisyo iŋes,
kori ani kiisi, etamatamae iŋes atemar kori elakio;
10ani nyiryamakina ke ekile, etami iŋes atemar itamalaanio, ido kitopoti iŋes alore a papa keŋ;
kori ani keryamu ekile, epedori acepaki adokin,
kori tari kiisi, epedori acepaki aruwor ŋina ekolupana.
11Tocoikinite ka agogoŋu ikoku kon ŋinipese ŋini egogoŋ akou,
acepaki ikituruwori iŋes iyoŋ ŋolo ikikyenatar ŋimoe kon,
ŋolo ikirworotor ŋituŋa alotaun ka anatukot a ŋituŋa,
ido ikisurum iŋes iyoŋ ŋileec aneni etukokin ŋituŋa.
Taanyu atemar mam ŋidirisae anagule keŋ,
ka emam nenimukur neni irereo iŋes ŋirotin ŋulu epote kai.
12Nyiesik iŋes itoodiunit akibuses keŋ alokiŋaren ekile edio,
kori erukito ka ŋaberu ŋuna iitit,
13anerae eponeneete ŋakimom alonapen
ka neni ka aberu etakanunia aronis ka aberu.
14Ejok aryenyeo a ekile akilo aberu ŋina itojoka;
erae aberu eyauni ŋileec ka elemanari ajokis.
Ŋiticisyo ŋulu ka Akuj alosubuna keŋ
15Atamuni tokona ayoŋ ŋiticisyo ŋulu ke Ekapolon
ka alimori ayoŋ ŋuna eŋolik.
Apotu kitiyakin ŋuna acamit Akuj alotooma akirot keŋ
ka itiyaete ŋisubuna keŋ daadaŋ acamit keŋ.
16Inwakunit akoloŋ alokidiama ibore daadaŋ a akica keŋ
ka ileleba apolou ŋina a Ekapolon loticisyo keŋ.
17Nyeinakina Ekapolon apedor tari neni a ŋimalaikan keŋ akimarun ŋiticisyo keŋ daadaŋ ŋulu ka aumokin.
ŋulu adau Ekapolon ŋolo etiron akiwuakin,
ikotere etakani ibore daadaŋ isileereunit apolou a Ekapolon.
18Eripiripi iŋes ŋauwuata ka ŋitai a ŋituŋa;
Eyeni iŋes ŋuna iwuaitae alotooma kec;
anerae eyeni Akuj ŋina alokidiama nooi ŋuna daadaŋ emaikina toyenunae;
ite iŋes ŋinapei koloŋ ŋiboro ŋulu etakanunete.
19Isileereuni iŋes ŋuna koloŋ sek ayakasi ka ŋuna etakanunete,
ido isileereuni iŋes neni kitorunete ŋiboro ŋulu iwuaitae.
20Mam atametait ebucar aneni keŋ
ka emam ibore iwuaitae ŋini nyeyeni iŋes.
21Esibak iŋes ejok akibuses ŋina ka aosou keŋ;
erae iŋes ŋinapei koloŋ Akuj ŋinapei ŋin.
Mam ibore epedoryo akiyatakin neni keŋ, kori alemar aneni keŋ,
ido nyiitanit idiobore toruwor ikesirworiunan keŋ.
22Okoe etya ai epite ŋolo ikiburitotor ŋiboro daadaŋ ŋulu itiyaunit iŋes
ka etya ai amilimil ŋina eyakatar ikes iŋolikini!
23Eyakasi ŋiboro lu daadaŋ ka erubakinete eya ŋikaru ka ŋikaru;
iturubakinitae ŋinisubuna eyai aŋuna ke etic a ŋolo esubunitere.
24Eponeneete ŋiboro daadaŋ a ŋiarerei, erae ipei ŋiniberu
ka ipei ŋinikile
ka mam ibore asubu iŋes pa itiyaunitae erae ŋini ejok.
25Irikanakini ibore ipei ajokis a ibore a ŋinice.
Ŋae eupi akitere apolou ŋina ka Akuj alorwa keŋ a daadaŋ?
Currently Selected:
Sir 42: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.