Sir 41
41
Ŋuna etapito atwanare
1Okoe atwanare, erae ibore ŋini aronon atamatam ŋuna kon aneni a ituŋanan a ŋini eyakar ekisil aloboro keŋ,
a ŋini emam ŋuna emaikina kiyaloloŋio
ido itiyae ejok alotooma ŋuna itiyae daadaŋ
ka ŋini eriŋa egogoŋ aŋuna ileileya akimuj keŋ!
2Okoe atwanare, erae ibore ŋini ajokan ayakaun iyoŋ neni a ituŋanan a ŋini eyakar akiitanit,
ido tomamukar agogoŋu, a ŋini anyamun aŋuna ka amojoŋu ka akiitanit ŋina a ŋibore a daadaŋ; erae atwanare ibore ŋini ajokan aneni a ŋini epegana ka nyepedorit akidaŋidaŋ.
3Nyikerit atubokino atwanare;
totamunite ŋulu adaut atwakare eriŋa iyoŋ ka ŋulu etwakete ekaku kon.
4Erae ŋun ŋuna etubunit Ekapolon aŋuna a ŋituŋa a daadaŋ;
kaanukiro nai iŋeryo iyoŋ acamit ŋina ka Akuj a ŋina alokidiama nooi?
Tari keyar ituŋanan ŋikaru ŋitomon, kori amiat, kori aliput, mam ŋakiŋiseta ŋuna iŋisyo iŋes anakibois a ŋikatwak.
ŋican ŋulu eryamunete ŋituŋa ŋulu aronok
5Erae ŋidwe a ŋikasecak ŋisiilyanotin
ka erubakinito ikes eya nakituro ŋina a ŋulu nyiwuapito ŋuna ka Akuj.
6Eŋopiyarete ŋiboro ŋulu irumete ŋidwe a ŋikasecak aneni atapapa kec
ka eruwor ŋidwe kec ŋulu emam ajokis ŋikaru ka ŋikaru.
7Itoroniyarete ŋidwe papa kec ŋolo pa ewuapit ŋuna ka Akuj,
anerae alemar ajokis aneni kec aŋuna keŋ.
8Ekaŋ iyes ŋulu nyiwuapito ŋuna ka Akuj,
iyes ŋulu iŋero ŋikisila a Akuj a ŋina alokidiama nooi!
9Ani kiyakatar iyes ŋidwe, eryamunete ikes ŋican,
iuruunete iyes ikes aŋuna ka akigworo bon.
Ani ikigukini iyes, eyakaun alyokonu ŋinaruba
ka ani itwakete iyes, ŋicen ikes irumete iyes.
10Ibore daadaŋ ŋini ebunit alokwap eboŋori kwap, aŋun, ŋulu nyiwuapito ŋuna ka Akuj, elomarete locen ka namunyaro.
11Erae akuwan a ituŋanan ŋina iburiburi anyamun atipei,
nai nyikisaryo ekiro ŋolo ajokan.
12Kitojokite ekiro kon, anerae erubakini iŋes eyai akilo tari kitwana iyoŋ,
erubakini iŋes eyai akilo tari egolid ŋolo ileleba ŋisitowae aliput.
13Imaruna ŋirwa ŋulu ka akiyar a ŋina ajokan,
nai erubakini ekiro ŋolo ajokan ŋikaru ka ŋikaru.
14Ŋidwe kaŋ, toruworos ŋulu a kire anakiro a ŋuna ikitatamitae iyes,
ido toyakatar ekisil alokidiŋ kus.
nyaani ajokis eyai kidiŋ ŋunaarei nu, aosou ŋina iwuaitae ka ebari ŋolo nyiteo?
Ŋakiro ŋuna alalak ŋuna nyikwaaniara
15Ejokak ŋituŋa ŋulu iwuaito abaŋao kec,
akilo ŋulu iwuaito aosou kec.
16Aŋun, kitoodiutu akitopoloorit ŋakiro kaŋ;
anerae nyejok aryamunit ŋileec anakiro a daadaŋ,
kori nyejok acamakin ŋakiro daadaŋ ŋuna ikisirumete ŋileec.
17Emaikina iyoŋ ikirumito ŋileec aŋuna ka aryamun ŋikauruunak kon iyoŋ irae imalaanot
ka erae ŋileec alyokonu alokiŋaren erwosit, kori ekepukan;
18emaikina ikirumito iyoŋ ŋileec alokiŋaren ekatubon aŋuna isecitor iyoŋ
ka ikirumito ŋileec alokiŋaren atukot a ŋituŋa aŋuna ka ajamakinit ŋikisila;
emaikina ikirumito iyoŋ ŋileec alokiŋaren aberu kon, kori ekile kon, kori ekone kon; aŋuna nyitiyaa iyoŋ ŋuna iyookino.
19Emaikina ikirumito iyoŋ ŋileec aŋuna ka akoko anakibois a ŋina iyai iyoŋ.
Emaikina ŋileec ikirumito iyoŋ akiŋer ŋuna idau iyoŋ akikoŋ, kori acamun ka ŋinice,
kori akiwuakinit akan kon nabokony iyai neni imujere;
kori akitoodiunit esiŋir ŋolo ka aŋoit apaki ŋina ijaunia ibore, kori ŋina ipotorya ibore.
20Emaikina iyoŋ ikirumito ŋileec akililiŋ alokiŋaren ŋulu ikimalaete iyoŋ;
kori akiŋoliyarit neni a amalaat
21ka akiŋer adyekitoi ŋina a iyenet kon;
kori alemar ibore ŋini ekorakinitae ŋinice, kori einakinitae
ka akitere aberu, kori ekile a ŋinice.
22Emaikina iyoŋ ikirumito ŋileec akituruwor aketiyan, kori eketiyan a ŋinice aberu kon, kori ekile kon,
ido nyiyapiya tari lokitaada keŋ;
emaikina iyoŋ ikirumito ŋileec akirworo ŋakiro ŋuna a ŋiyany alokiŋaren ŋikonei kon
ka nyiyanyi ŋuluce kidau ainakin ibore.
Currently Selected:
Sir 41: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.