Sir 39
39
Etic a eketataman a ŋikisila
1Etya ai epite ŋolo egelaania ŋini einakina nakisyom ŋikisila ŋulu ka Akuj a ŋina alokidiama nooi!
Iwarit iŋes ayenun aosou a ŋituŋa a ŋulu a koloŋ,
ecamit iŋes jik ayenun ŋakiro ŋuna keponi todwarae;
2iŋadae iŋes ŋakiro ŋuna ajokak ŋuna kirworosi ŋituŋa ŋulu ayenen,
ido esyomi ŋakiro daadaŋ ŋuna ajokak nooi anakitadapeta;
3iwarit iŋes ayenun apolou ŋina nyileere anakitadapeta
ka iboi iŋes alore etami ayenun apolou ŋina nyileere anakitadapeta.
4Itiyae iŋes neni eyakasi ŋikapolok, ido eyakaunun iŋes neni a ŋikepukak,
elosenene iŋes nakwapin a ŋituŋa a ŋulu egelegelya,
ido toyenu a nen ŋuna ajokak ka ŋuna aronok ŋuna itiyaete ŋituŋa.
5Iwuakinit iŋes etau keŋ anyounun eriŋa ataparacu aŋuna ka akilip neni a Ekapolon a ŋolo abu tosub iŋes
ka adyekitoi neni ka Akuj a ŋina alokidiama nooi;
irworo iŋes ilipi, ido iŋita akisyonio aŋuna a ŋasecisya keŋ.
6Ani kecamunit Ekapolon ŋolo epol akilo,
ilelebikinio iŋes etau ŋolo ka ayenun;
ebukuni iŋes ŋakiro ŋuna ka aosou ŋuna erae ŋuna keŋ,
ido tolakar iŋes neni ke Ekapolon anakilip.
7Iteni Ekapolon iŋes anakiro keŋ ka anaosou keŋ,
apaki ŋina etamatamaa iŋes ŋakiro ŋuna imunono.
8Itoodiuni iŋes aosou anakiro a ŋuna adau iŋes ayenun,
ido epoloor iŋes alotooma ŋikisila ŋulu ka acamunet a Ekapolon.
9Ipurete ŋikalalak ayenut keŋ ŋakiro;
nyelemaryo jik aneni keŋ ayenut ŋin.
Nyimuryakin iŋes aneni a ŋituŋa,
ido erubakini ekiro keŋ eyai ananyameta a daadaŋ.
10Erubakinete ŋakwapin irworosi ŋuna ka aosou keŋ,
ido iseraete ŋituŋa anatukot ipurosi iŋes.
11Ani kiboi iŋes ekaoyan, eesikini iŋes ekiro keŋ
erae ŋolo etamunitae adepar ŋulu a ŋituŋa ŋulu edeparito tari aliput;
ido ani ketwana iŋes, etemokin akiyar keŋ aŋuna keŋ.
Eete ŋolo ka akipuro Akuj
12Ayakar ayoŋ ŋuna alalak ŋunalimuno anatameta kaŋ;
ileleba ŋakiro neni kaŋ lopite ŋolo eupya akica ke elap akwap eyai kidiama kidiŋ akuwar.
13Kiirasi ŋakiro kaŋ, ŋidwe kaŋ ŋulu ikinyoma,
ikotere totakana irae ŋulu ajokak ikwa aturot ŋina epoloe alodiyete ayonae ŋina eya ŋakipi.
14Kitoodiutu ŋipitesyo ŋulu ajokak lopite ŋolo ebunio eure ŋolo ajokan aneni a ekinyate,
ido kitoodiutu akibuses kus lopite ŋolo ibusyata ŋatur a ecomocomo.
Kitoodikisi ŋituŋa daadaŋ ajokis kus, ido toeo ipurosi Ekapolon;
tolakaros neni a Ekapolon aŋuna a ŋiticisyo a daadaŋ.
15Kiserata itopoloorito ekiro keŋ,
ido tolakaros neni keŋ alotooma akipuro,
toeo ka torama ŋaduŋgui;
ŋakiro nu ikes ilimunete iyes ilakarosi neni keŋ:
16“Ejokak nooi ŋiticisyo ŋulu ke Ekapolon daadaŋ ka ŋinibore icikakini iŋes, itiyakin alotooma apaki ŋina eseunit iŋes.
17Emam ituŋanan etemari, ‘Nyo en?’ Kori ‘Nyo ŋin?’
Anerae anapaki a ŋina itemokinitoe, eboŋokinio ŋakiŋiseta ŋun.
Analimunet a ŋina ka Akuj, apotu ŋakipi towua aiwapei,
abu Akuj tosub neni ewuatar ŋakipi.
18Ani elimuni Akuj akirot, iyookin daadaŋ ŋuna ecamit iŋes,
emam ŋini iretakini iŋes kecamit aiun a apedor keŋ.
19Eyakasi kiŋaren keŋ,ŋiticisyo daadaŋ
ka mam ibore ŋini nyepedorit iŋes akiŋolikin.
20Ŋinapei anakisyakinet tari nasalunet ŋina a ŋikaru,
ite iŋes ibore daadaŋ ka emam aneni keŋ ibore nyepedorit iŋes akiŋolikin. 21Emam ituŋanan etemari, ‘Nyo en?’ Kori ‘Nyo ŋin?’ Anerae esubunitae ibore daadaŋ aŋuna ka akitiya ibore idio.
22“Erapuwarit arereŋu keŋ akibois ŋina eonit,
lopite ŋolo erapuwaryata ŋakipi a aŋolol ilapi akibois ŋina aonon.
23Nai iritari iŋes a anyunyura keŋ ŋituŋa a ŋakwapin,
lopite ŋolo abunio iŋes kilocokinio akwap ŋina aya ŋakipi kituruwo acumbi.
24Iyookino aneni a ŋulu enupito iŋes akiwuapit iŋes,
nai etyonikinit nooi ŋulu aronok akiwuapit ŋuna ka Akuj.
25Ŋinapei anakisyakinet aponi tosubunae ŋiboro erae ŋulu ejokak aŋuna ka akitiya ŋuna ajokak,
nai aŋuna a ŋikasecak aponi, tosubunae ŋiboro ŋulu ajokak ka ŋulu aronok.
26Ŋiboro ŋulu iitanit ituŋanan anakiyar keŋ erae ŋakipi,
akim, ŋasuwa, acumbi, ŋakirya ŋuna a ŋaganoi, ŋakile, ao ka epiini ŋolo ecuunitae, akimyet ta ŋilowi.
27Ejokak lu daadaŋ aŋuna a ŋini iwuapit ŋuna ka Akuj,
nai ŋikasecak eŋerete ikes ŋun toloto akitiya aronis.
28“Eyakasi ŋikuwuamisinei ŋulu itiyaunitae aŋuna ka akinyaŋarya ŋakiro,
ido anaryenyeo kec epedorete ikes aukor ŋimoru aneni sek eya;
alotooma akoloŋit ŋina ka akinyasuno,
ebuni aneni kec agogoŋu ŋina aryenyaanan,
ido kitidipokis aŋoit a ekasubunan kec.
29Aponi tosubunae nu daadaŋ aŋuna ka akinyaŋia ŋakiro:
Akim, ŋakako, eron, edeke,
30ŋityaŋ ŋulu anyamak, ŋikiitonia, ŋapomya,
ka ŋiboro ŋulu isitiyaete ŋituŋa aarya ŋulu nyiwuapito ŋuna ka Akuj ikotere tomunyarae.
31Elelyanete ŋulu iwuapito ŋuna ka Akuj itiyaete ŋuna ecamit Akuj,
etenito jwi jwi akitiyanakin Akuj anakwap a na,
ido ani ebuni apaki ŋina a ŋican, nyeŋerete ikes akiwuapit akirot ŋina ka Akuj.”
32Aŋun, ŋinapei anakisyakinet adau ayoŋ acamun nu daadaŋ,
ido adau atamatam ejok ka ewuak nakigireta ikote ne:
33Ejokak ŋiticisyo ŋulu ke Ekapolon daadaŋ
ka ikiinakini iŋes ŋinibore iitani daadaŋ anapaki a ŋina itemokino.
34Emam ituŋanan etemari, “Nyejok en ikwa ŋin,”
anerae ejokuni ŋinibore daadaŋ anapaki aŋina itemokinitoe aŋuna keŋ.
35Aŋun tokona, toeok ekipur a etau kon a daadaŋ ka a etoil kon ka tolakar aŋuna a ekiro a Ekapolon.
Currently Selected:
Sir 39: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.