Sir 38
38
Ŋuna etapito ŋikainanakinak ŋikito ka aŋaleu a ŋawat
1Kitopoloorito ŋikainanakinak ŋikito aŋuna a etic kec,
anerae erae Ekapolon abu tosub ikes;
2eponito ŋiticisyo kec ŋulu ka akitaŋaleun ŋawat aneni ka Akuj a ŋina alokidiama nooi,
ido eryamunete ikes eropit kec aneni a erwosit.
3Ituruwori apiiryanut ŋikainanakinak ŋikito ŋulu eyenen,
ido itopolooritae ikes aneni eyakasi ŋikapolok.
4Abu Ekapolon tosub ŋikito ŋulu emasyo, kitolomu analup,
ido nyejamuwarete ŋulu eyakatar ayenut ŋikito ŋul.
5Pa mono aponi kitobobounoe ŋakipi a ekitoe,
ikotere nai eyenunere agogoŋu keŋ a?
6Abu Akuj inak apiiryanut neni a ŋituŋa,
ikotere ipuryo iŋes aŋuna a ŋiticisyo keŋ a ŋulu ajokak.
7Aŋuna a ŋikito a ŋul, ikitaŋaleuni ekainanakinan ŋikito,
ido tolema aryeba.
8Inyalakini ŋikito ŋini eyeni akinyal ŋikito.
Nyedaunun ŋiticisyo ŋulu ka Akuj
ka neni ka Akuj ebunitor aŋaleu nakwap daadaŋ.
9Ikaakoku, ani idyakakin iyoŋ nyiŋel,
nai kilip neni ka Ekapolon, ido ikitaŋaleuni iŋes iyoŋ.
10Toki ŋadyakanareta kon, ido kitiya ŋuna iyookino
ka kitesegu ekonitau anasecisya a daadaŋ.
11Inak amuronot ŋina abobon a eure ka ainakinet ŋina a ŋikinyom ŋina erubakinio etamunitae,
ido tobukok akimyet nainakinet kon lotyae ŋolo daadaŋ ipedoritor iyoŋ.
12Tosodi nai kisiboik ikainanakinan ŋikito nakibois keŋ, anerae erae Ekapolon abu tosub iŋes;
nyiesik iŋes eekari aneni kon, anerae iitanit iyoŋ iŋes.
13Eyakaunun apaki ŋina eraakar ŋini einanakini ekitoe epedori aryamun ekitoe ŋolo ikitaŋaleuni iyoŋ,
14anerae ilipete ikes daŋ neni ke Ekapolon atemar inak ikes aripun neni itorunit adyak ka epite ŋolo kitaŋaleunet aŋuna ka aiunia akiyar.
15Ituŋanan ŋini itiyae asecit anakitoroniyarit aketiyaunan keŋ,
eruwor ŋini eyarikini neni a ŋini einanakini ŋikito.
Akigworo aŋuna a ŋikatwak
(Sir 22:11-12)
16Ikaakoku, kimyek ŋakiyo kon todout aŋuna a ikatwan,
ikwapei ituŋanan ŋini eyai nakiro ŋuna apipilak, kisyak akiolol.
Tonuk akuwan ŋin iwuakinit ŋasuban ŋuna emaikina kitiyae apaki ŋin,
ido nyiŋer alosit neni enukakinio ŋini atwana.
17Kimyek akigworo kon kitoodiu atemar erae ŋina a ŋican
ka akiolol kon toruwor ŋina itoodiunit atemar ikinomorito ŋakiro nooi;
kimyek akigworo kon toruwor ŋina itoodiunit atemar kimina iyoŋ ŋini atwana;
kigwor akoloŋit apei, kori ŋaarei ikotere nyikisoloi,
ido tocamu akisirworiuno anapipilu a ŋin;
18anerae epedori akiyaloloŋ ayaun atwanare,
ido elemari akiyaloloŋ agogoŋu aneni kon a ituŋanan.
19Ani ketwana ituŋanan, edaun akiyaloloŋ ekaku,
nai isiyaloloŋiyori etau akiyar ŋina a ŋulu a ŋican.
20Nyiesik etau kon iyaloloŋi, tolema ŋun aneni kon,
ido totamu apaki ŋina esalunia akiyar kon.
21Nyikimuryak atemar mam aboŋun nakwap nabo;
emam ŋuna ajokak ŋuna itiyae iyoŋ neni a ŋini atwana,
iyoŋ ilope iwani akuwan kon.
22Totamunite ŋuna etiyakin neni keŋ, anerae itiyakin ŋunapei neni kon,
erae tokona neni keŋ ka eruwor moi taparacu neni kon.
23Ani kieŋu ikatwan, kimyek atamunit iŋes kieŋu,
ido tocamu akisirworiuno aŋuna keŋ apaki ŋina eekarya etau keŋ.
Amucuruso ka akitiya ŋiboro
24Eryamununui eketataman a ŋikisila aosou erae keinakina akisyom,
ani kecamit iŋes aruwor ŋini eos, emaikina toesik ŋiticisyo ŋulu alalak.
25Ikokini mono ŋini etiŋit iwuapit emeleku a ŋimoŋin eruwor ŋini aoson, ŋini eyakar akituro aŋuna etiŋitor arukan ŋina emetere ŋicugae,
ŋini emyat ŋicugae totiŋiyarite etic kec
ka ŋini erae erwori keŋ ŋolo etapit ŋimoŋin ai?
26Iwuakinit iŋes etau keŋ nakinapinap emanikor itae
ido iwarit iŋes nooi ŋinya ŋulu iŋadao aŋuna a ŋatak.
27Ikote nenipei ŋakiro aŋuna a ŋini itiyae ŋiboro ka ŋini epiiryana anakitiya ŋiboro a ŋini itiyae tari nakwaare ka tari naparan;
tari ŋulu iwuanakinete ŋimacarin lokabobooe,
iwarit ŋinituŋanan akiwuakin emacar ŋolo egelaana lokaboboot ŋolo etiyau iŋes,
iwuanakinete ŋitorubei ŋulu etakanete ibusak nooi,
ido elelakinito ikes nooi akirikakin etic kec.
28Ikote nenipei ŋakiro aneni a eketyakan ŋasuwa a ŋolo iboi alodiyete akityeket ŋasuwa,
iwuakinit iŋes ŋatameta keŋ nakityek ŋasuwa;
einanakini akiwuarun ka akim ŋina amwanan iŋes akinyinyir,
ido idaŋidaŋi iŋes amwanis a akim a ŋina a ekitet;
isijikenene eruye ŋolo ke enyondo ŋaki keŋ,
nai ite iŋes jik epite ŋolo eyakar ibore ŋini ecamit iŋes akitiyaun.
Iwuakinit iŋes jik etau keŋ aŋuna ka akirikakinia ibore ŋini ecamit iŋes akitiyaun
ka etamatamae iŋes epite ŋolo isibusya ibore ŋin irikakin.
29Ikote nenipei ŋakiro aneni a ikayan ŋamoti a ŋini iboi
alotic keŋ, ido kisirimi alogoro a ŋakejen keŋ;
emunikinit iŋes a ŋinapaki ajokis a ibore a ŋini itiyauni iŋes ka itiyaununui iŋes ŋiboro ŋulu alalak.
30Eyeuni iŋes ecoto a ŋakeekan, ido kitononok a ŋakejen,
iwuakinit iŋes etau keŋ akirikakin ibore ŋini eyakar eraŋgi ŋolo ajokan,
ido ecoikini epite ŋolo inokakinia akim neni icunyere ŋiboro ŋul.
31Eya ŋun daadaŋ nakan kec ka epiiryaka ŋul daadaŋ aloticisyo kec.
32Ani kerae tomam ikes, kemam etaun iboiyoto ŋituŋa
ka nyenyami ikes akoro aneni daadaŋ iboiyoto ikes.
Kikote neni daŋ, nyemisito ŋituŋa ikes anatukon a ŋuna irworotor ŋituŋa,
33kori nyeryamunito ikes akitopolooro anakiboisyo a ŋuna ecunanakin ŋituŋa.
Nyiboiyonokin ikes nakiboisyo a ŋikatubok ŋakiro,
kori nyeyenete ikes ŋuna etubunio aloikiiko;
nyepedorete ikes akiteyenikin ŋuluce ŋipitesyo ŋulu ajokak, kori epite ŋolo etubere ŋakiro ejok
ka emam ikes ŋini erae ekepukan.
34Nai erubakinito ikes itiyaete ŋiboro ŋulu ka akwap,
ido ŋuna eŋirikinito ikes, erae akiturubakin etic kec ŋolo ka amucuruso.
Currently Selected:
Sir 38: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.