Sir 2
2
Ŋiticisyo ŋulu emaikina kitiyae neni ka Akuj
(Yak. 1:2-4, 12-16; Amos 3:1-9)
1Ikaakoku, ani ibuni iyoŋ akitiyanakin Ekapolon,
tosubakina aŋuna ka akikatakino.
2Tosubak ekonitau torae ŋolo iyookino ka ŋolo nyiryaŋiryaŋa
ka nyiryairyai apaki ŋina eponiata ŋican.
3Kimiidikin neni ka Akuj, ido nyiesik iŋes,
ikotere ejokyata ŋirwa kon ŋulu esidyok.
4Tocamu ŋican ŋulu etakanunete neni kon
ka totitinyik anapakio a ŋuna a ŋican.
5Ikatanakinio egolid ka akim,
ido ikatanakinio ŋipitesyo a ŋituŋa alocan a ŋulu amwanak pe ikwa akim a ekitet.
6Kikinyom Ekapolon, ido ikiŋarakini iŋes iyoŋ;
kituruwo ŋipetesyo kon ŋulu iyookino,
ido kigeno neni keŋ.
7Iyes ŋulu itopoloorito Ekapolon, kidarutu akeekisyon,
nyioliyosi, acepaki iesikinete akiwuapit iŋes.
8Iyes ŋulu itopoloorito Ekapolon, kikinyoma iŋes,
ido nyeŋopiyari eropit kus.
9Iyes ŋulu itopoloorito Ekapolon,
toyakatar akigeno ŋiboro ŋulu ajokak,
aŋuna ka alelyanu ka akisyon ŋinaruba.
10Totamatamata mono iyes ŋuna a ŋanyameta a ŋuna akoloŋ,
ido kiŋolikisi nu;
eyai mono idio ŋini abu kikinyom Ekapolon,
ido nyeryamu akiŋarakino a?
Kori abu idio torubak itopoloorit Ekapolon,
ido toesik Ekapolon iŋes a?
Kori eyai mono ŋini abu tonyara Ekapolon, ido tojamakinae a?
11Erae Ekapolon ŋolo erimaana ka isyoniono;
isyonene iŋes ŋulu esecito ka eiununui ŋulu eyakasi locan.
12Ekaŋ iyes ŋulu ekuryaka ŋitai ka tokalanyaka ŋakan
ka ekasecan ŋolo italalat ŋirotin ŋulu ka akiyar kon!
13Ekaŋ iyes ŋulu ililimiyorito alotai kus ŋulu imamukatar akikinyomit!
Aŋun, emamukaun neni iunotor iyes.
14Ekaŋ iyes ŋulu iŋero akigeno kus!
Nyaanu ŋuna itiyakinete iyes apaki ŋina ebunio atubokino aneni ke Ekapolon?
15Nyeŋerito ŋituŋa ŋulu itopoloorito Ekapolon ŋakiro keŋ, ido iwuapito ŋulu eminasi Ekapolon ŋuna ebala iŋes kiwuapa.
16Iwarito ŋulu itopoloorito Ekapolon alakanar neni keŋ,
ido eyenete nooi ŋituŋa ŋulu itopoloorito Ekapolon ŋikisila keŋ.
17Itemonokinete ŋituŋa ŋulu itopoloorito Ekapolon ŋitai kec,
ido itiditeuna ikes make alokiŋaren Ekapolon.
18Oyakaunos napedor ŋina ke Ekapolon,
nai meere napedor a ŋituŋa;
anerae eriyan ailiil keŋ ka akisyon keŋ,
ido eriyan ŋiticisyo keŋ ka ekiro keŋ.
Currently Selected:
Sir 2: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.