Sir 1
1
Akipuro Ekapolon aŋuna ka aosou
(Ŋakit. 3:13-20, 8:22-31; Ŋirom. 11:33)
1Ebunit aosou daadaŋ aneni ke Ekapolon,
ido erubakini jik aosou aneni ke Ekapolon.
2Ŋae epedori akimar asinyon ŋina ka anam,
ŋakilimes ŋuna ka akiru ka ŋirwa ŋulu a ŋikaru ka ŋikaru?
3Ŋae epedori ayenun aoyau, ameun alokwap tari nakuj,
alolomu ka akwap ameun alowae ke epei tari ŋoloce,
aoyau ŋina ka auwuat ka aosou?
4Aponi aosou tosubunae eriŋa ŋiboro daadaŋ,
ka asubunio koloŋ sek ayenut.
5Ŋae aponi kitoodikinae akisyakinet ŋina ka aosou?
6Ŋae eyeni atyonis ŋina yenunet aosou?
7Nai eyai ipei bon ŋini eyakar aosou,
iŋes emaikina kitopolooroe nooi,
8erae iŋes Ekapolon ŋolo iboi alokicoloŋ keŋ.
9Erae Ekapolon abu tosub aosou;
abu Ekapolon kiŋolik aosou ka abu tocamu ajokis keŋ,
ido abu kilelebik aosou neni a ibore a daadaŋ a ŋini abu iŋes tosub,
10abu inak aosou neni a ŋisubuna a ŋulu eyarete a daadaŋ lopite ŋolo etemokinitor iŋes;
abu inak aosou ŋina alalan neni a ŋulu eminasi iŋes.
Aosou ŋina a kire iŋes akitopoloorit Ekapolon
(Yob 28:28; Ŋikis. 1:7)
11Ani kitopoloorit ituŋanan Ekapolon, eryamuni apolou ka akitopolooro,
eryamuni alakara ka ebokot ŋolo ka alelyan.
12Ani kitopoloorit ituŋanan Ekapolon, eryamuni alakara alotau keŋ,
eryamuni alakara, alelyanu ka eryamuni akiyar ŋina aoyan.
13Eryamunete ŋituŋa ŋulu itopoloorito Ekapolon alakara ekaku ka akiyar a na;
iterereŋio ikes akoloŋit ŋina etwakyata.
14Erae akitopoloorit Ekapolon akisyakinet ŋina ka aosou;
einakinitae aosou neni a ŋulu ikinyoma eriŋa eya nakookyes.
15Iboit aosou aneni a ŋituŋa ŋinapei koloŋ anakisyakinet
ka iboi aneni a ŋiletok kec anakikinyoma.
16Erae akitopoloorit Ekapolon akilelebikina aosou;
ilelebianakini aosou ŋituŋa a ŋainakineta keŋ;
17ilelebianakini nakais kec ŋiboro ŋulu ajokak ŋulu iitanito ikes,
ilelebianakini aosou lodulae kec akimuj ŋina itaunete ikes.
18Erae akitopoloorit Ekapolon ebokot ŋolo ka aosou,
ikiinakini aosou ekisil ka ituruwori akuwan ŋina eyai eŋale.
19Ebukununui aosou ka ayenut ŋuna ajokak
ka ŋuna aronok lopite ŋolo etamia ituŋanan,
iyatanakini aosou apolou a ŋulu apotu kikinyoma aosou.
20Erae akitopoloorit Ekapolon ataagorete ŋina ka aosou,
ido erae ŋaten keŋ akiyar ŋina aoyan. #1:21iyatakinito ŋakigireta ŋace eŋaet 21: Elemari akitopoloorit Ekapolon ŋasecisya; ido neni eyai akitopoloorit Ekapolon, iritari aŋoit a nen.
22Nyetemaryo iyookino ŋakiro ŋuna ka aŋoit koŋin,
anerae eyauni aŋoit koŋin ŋican neni a ŋini eŋoit koŋin.
23Epedorete ŋituŋa ŋulu etitinyikinito ŋakiro akiboi pa iyaloloŋete, akitodol apaki ŋina eryamuniata ibore ŋini iitanito,
ido nai bu alakara neni kec nabo.
24Ililiŋiyarete ŋituŋa ŋul ŋakiro kec akitodol ŋina edolio apaki ŋina iyookino;
ido elimunete ŋulu elalak ŋuna ka akitam kec ejok.
25Eyakar aosou lobari keŋ ŋalimununiyeta ŋuna ka aosou,
nai erae amamukau ayenut Akuj asiilyo ŋina eyai neni a ekasecan.
26Ani kiitanit iyoŋ aosou, kiwuap ŋakiciketa,
ido ebuni Ekapolon ainakin iyoŋ aosou ŋina alalan;
27anerae erae akitopoloorit Ekapolon aosou ka ŋipitesyo ŋulu ajokak.
Elakara Ekapolon erae kitopoloorit ituŋanan iŋes ka kitiditeuna iŋes bon.
28Nyiŋerit akitopoloorit Ekapolon;
Nyilot akilip iŋes iyakar ŋatameta ŋuna ka aŋayaŋayat.
29Nyiruwor ikaŋisoswae alokiŋaren ŋuluce
ka tocoikinite anakiro a ŋuna irworo iyoŋ.
30Nyitopolooro bon, acepaki iruwor ikoŋinait,
ido yau ajamuwaro nakuwan kon.
Isileereuni Ekapolon ŋuna imunonit iyoŋ,
ido ikisurumi iyoŋ ŋileec alokiŋaren atukot,
anerae ibu iyoŋ toloma natukot pa itopoloorit Ekapolon
ka eleleba amodiyo lotau kon.
Currently Selected:
Sir 1: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.