Ŋilep. 6

1Tema Ekapolon neni a Moses, 2“Ani kesec ituŋanan idio alokidiŋ kus aneni ke Ekapolon; tomodiya ekidunyet keŋ ibore ŋini icikakinitae iŋes aŋuna ke edeni, kori todema ekidunyet keŋ ibore keŋ, kori tomodiya, 3kori ani kirapu iŋes ibore a ŋinice, ido nyelimo, kori kikoŋ alyokonu epega alotooma ibore ŋini epedori ituŋanan akitiya, ido tosec anakiro aŋun, 4ani keyenu iŋes atemar asec, emaikina iŋes kinyaka ibore ŋini abu iŋes todema ituŋanan, kori ibore ŋini sek ecikakinitae iŋes aŋuna ke edeni, kori ibore ŋini sek erapuni iŋes, 5kori ibore daadaŋ ŋini abunio iŋes kikoŋio alyokonu, emaikina iŋes totacak ibore ŋin daadaŋ neni a ilope tolemu nabo atutubet apei alotooma ŋikan a ibore a ŋin, ido kinyakak ilope a ibore a ŋin akoloŋit ŋina eaya iŋes ainakinet keŋ aŋuna ka asecit. 6Nai ikwapei akisicanet; emaikina iŋes ya neni ke esacaradoti ainakinet aŋuna ka asecit keŋ neni ke Ekapolon emesek ŋolo ajokan, ŋolo emam neni eŋwalit, ŋolo ke esipan keŋ, kori ibore ŋini ke etyae a ŋicekelya a ŋulu ecamunito ŋituŋa daadaŋ isitiyao anakibois a ŋina asegan. 7Alopite a ŋol, emookuni esacaradoti ituŋanan ŋin anasecit keŋ alokiŋaren Ekapolon, ido isyonio ituŋanan ŋin anakiro a daadaŋ a ŋuna abu iŋes kitiya toruworor ŋini esecit.”

Ŋakitatameta aŋuna a ŋamuronisya

8Tema Ekapolon neni a Moses, 9“Kicik Aron ka ŋidwe keŋ ŋulusapa ebe, ‘Ŋikisila ŋulu emaikina kiwuapae lu aŋuna a ŋainakineta a ŋuna epeyo. Emaikina ainakinet ŋina epeyo kimyekinae anamuroet akuwar kia akitodol ŋina iwalarya akwap, ido emaikina kinoketei jik akim alokidiama namuroet. 10Emaikina esacaradoti tonap ŋilowi keŋ ŋulu amilimilak ka ŋulu alotooma daŋ ŋulu amilimilak, ido tomuda ekuron ŋolo ka ainakinet a ŋina adau akim anyamuwar alokidiama namuroet, tomudak diyete namuroet. 11Ani irikakini, tolaca nai ŋilowi ŋul, tonap ŋice, ya ekuron kiŋa alomar, nakibois ŋina italeunitoe ŋina asegan. 12Emaikina kiturubakinae akim enoki alokidiama namuroet; nyemaikina toduŋe. Emaikina esacaradoti kiwuanakini ŋakito nakim a ŋinataparacu, ido kinapanak nakim ainakinet ŋina epeyo, kicuny asepwae ka ainakinet a ŋina ke ekisil. 13Emaikina akim enepi jik alokidiama namuroet; nyemaikina toduŋe.’ ”

Ŋainakineta ŋuna a ŋikinyom

14“‘Ŋikisila ŋulu emaikina kiwuapae lu aŋuna a ŋainakineta a ŋuna a ŋikinyom. Emaikina ŋidwe ka Aron ŋulusapa yaut ŋainakineta ŋun neni ke Ekapolon. 15Emaikina esacaradoti tomuk ŋakirya ŋuna ajokak ŋadi ileleba akan, tolemu akimyet kaapei ke ekinyate ŋolo idokokinitoe nainakinet ŋin, yaasi ainakinet ŋin ŋina ke etal, kicunya alokidiama namuroet, erae ainakinet ŋina ebob eure aneni ke Ekapolon. 16Emaikina nai Aron ka ŋidwe keŋ ŋulusapa yaasi ŋakirya ŋuna idoŋito kimuja; nai emaikina ikes kimuja pa iwuakinitae ŋakinyalet, ido emaikina kimuja anakibois a ŋina asegan; analapatu ke eema a ŋolo ilipere. 17Nyemaikina kipoi iwuakinitae ŋakinyalet; ainak ayoŋ ikes ŋakirya ŋun erae ŋuna emaikina ikes toryamut anainakinet a ŋina epeyo aŋuna kaŋ. Eseg ainakinet ŋin nooi, ikwaan ka aŋuna ka asecit ta ŋina ke ekaile aŋuna ka asecit. 18Enyamete ŋisapa daadaŋ ŋulu erae ŋiletok ka Aron ŋamugati a ŋakirya a ŋun. Eruwor ŋol ekiner kec, ŋoloruba ananyameta kec a daadaŋ, anainakineta a ŋuna epeyo aŋuna ke Ekapolon. Ŋini daadaŋ etapi ŋainakineta ŋun, eruwor ŋini eseg.’ ”

19Tema daŋ Ekapolon neni a Moses, 20“Ainakinet na iŋes emaikina Aron ka ŋidwe keŋ ŋulusapa yaut neni ke Ekapolon akoloŋit ŋina ituruworere idio alokidiŋ kec esacaradoti: Atutubet apei alotooma ŋitomon a akilo a ŋakirya a ŋuna ajokak ikwapei ainakinet ŋina emaikina ikes tolemununeete a ŋinapaki. Tolemunae atutubet apei a ainakinet a ŋin taparacu, ido atutubet apei tolemunae eboŋ. 21Emaikina ŋakirya ŋun kiguroe ka akimyet kipoi a ikalaat a ŋinibeleny. Itemokino erae ŋuna eupit akimyet, erae ŋamugati ŋuna eŋimitae, ainakinet ŋina emaikina eure keŋ ebob aneni ke Ekapolon. 22Emaikina lokoku ka Aron ŋolo ilunyokin neni ka Aron aruwor esacaradoti ŋolo Apolon nooi kipo ŋamugati ŋun. Erae ainakinet ŋin ŋinaruba ŋina emaikina inanakinetei Ekapolon, ido itemokino kicunyae todaun. 23Ainakinet ŋina a ŋikinyom daadaŋ ŋina elemuni esacaradoti, itemokino kicunyae todaun; nyemaikina tonyamae.”

Ŋainakineta aŋuna ka asecit

24Tema Ekapolon neni a Moses, 25“Tolimok Aron ka ŋidwe keŋ ŋulusapa ebe, ‘ŋikisila ŋulu emaikina kiwuapae lu aŋuna a ŋainakineta aŋuna ka asecit. Emaikina ainakinet aŋuna ka asecit toarae alokiŋaren Ekapolon anakibois a ŋina eareneneere ainakinet ŋina epeyo; erae ainakinet ŋin ŋina eseg. 26Emaikina esacaradoti ŋolo eai ainakinet kimuj adio a ainakinet a ŋin anakibois a ŋina asegan analapatu ke eema a ŋolo ilipere. 27Ŋini daadaŋ etapi akiriŋ ka ainakinet a ŋin, eruwor ŋini eseg. Ani kiterakin ŋaokot a ainakinet a ŋin lolou, emaikina kilotarae anakibois a ŋina asegan neni eya ŋaokot alolou a ŋol. 28Emaikina tobwaŋabwaŋaarae amot ŋina esitiyao akipoo ainakinet ŋin, nai ani kerae eborosit ŋolo itiyaunitae ke eburonis epotere, emaikina kirigaarae, ido kilotarae a ŋakipi. 29Emaikina ituŋanan daadaŋ ŋini erae ŋinisapat aloletok a ŋisacaradotin kimuj ainakinet ŋin, erae ainakinet ŋin ŋina eseg nooi. 30Nai ainakinet aŋuna ka asecit daadaŋ, ŋina eyaunio ŋaokot keŋ tooma eema ŋolo ilipere nakibois ŋina asegan nooi, aŋuna ka amookunia ituŋanan anasecit, nyemaikina kimujae ŋin; itemokino kicunyae.

Currently Selected:

Ŋilep. 6: NIB2008

Highlight

Copy