Ŋilep. 5

1Ŋakiro ŋuna ikote nu ikes itelemunete ituŋanan ainakinet aŋuna ka asecit.

Ani kenyaraun ituŋanan neni etubere ŋakiro temarae tolimu ŋakiro ŋuna iyeni iyoŋ anakiro aŋuna isitakinitere ŋinice, ido towou iŋes alimor tari keyeni ka kiŋolikinit, isicanio iŋes a ŋakiro a ŋun,

2Kori ani ketap ituŋanan ibore ŋini italeo pa iredakinit akitap, kerae etyaŋ ŋolo etwanit ŋolo sek italeo akitap, kori ibarasit ŋini etwanit ŋini sek italeo akitap, ityaŋ ŋini elyat, ŋini etwanit, ŋini sek italeo akitap, aruwor iŋes ŋini itoroniyaritae ka eyakar ekaile ŋolo ka asecit.

3Ani ketap ituŋanan ibore ŋini italeo akitap, tari pa kiredakinit iŋes akitap, ani eyenunio iŋes a ŋun eruwor iŋes ŋini eyakar ekaile ŋolo ka asecit.

4Ani kikirikirak ituŋanan akiikin akitiya idiobore, aŋuna ajokak, kori aŋuna aronon, ŋakiro ca daadaŋ ŋuna ikoŋete ŋituŋa nai nyeyeni iŋes, ani ŋina eyenunia iŋes ŋun, eruwor iŋes ŋini eyakar ekaile ŋolo ka asecit.

5Ani keyeni ituŋanan atemar asecit alorotin a ŋul keedio, emaikina ituŋanan ŋin tocamu asecit keŋ ŋina adau akitiya. 6Nai ikwapei akisicanet aŋuna ka asecit keŋ, emaikina iŋes yau neni ke Ekapolon akine ŋinaberu alosipan kerae amesek, kori ameot ikwapei ainakinet aŋuna ka asecit keŋ; tosodi nai esacaradoti tomooku ituŋanan ŋin anasecit keŋ.

7Nai ani pa kepedori iŋes alemun amesek, emaikina iŋes yau neni ke Ekapolon ikwapei ainakinet aŋuna ka asecit keŋ ŋakuryo ŋaarei, kori ŋatemeleudi ŋaarei, apei erae ainakinet aŋuna ka asecit ka ŋinace erae ainakinet ŋina epeyo. 8Emaikina ituŋanan ŋin yau ŋikeny ŋul neni ke esacaradoti, ido tolemu mono esacaradoti ainakinet ŋina emookunere ituŋanan ŋin anasecit keŋ a ŋin, tomojir emosiriŋ, nai tocoite nyetub. 9Emaikina esacaradoti kipakak nawaetin anamuroet ŋaokot ŋadi ŋuna ka ainakinet a aŋuna ka asecit, tosodi ŋaokot ŋunace daadaŋ kitiitak kwap namuroet, aŋuna eraakar ainakinet ŋin aŋuna ka asecit. 10Ani irikakini, tolemu ainakinet ŋina a ŋaarei, ido ya erae ŋina epeyo lopite ŋolo elimunitotor ŋikisila. Alopite a ŋol, emookuni esacaradoti ituŋanan ŋin anasecit keŋ a ŋina abu kitiya, ido isyonio ituŋanan ŋin.

11Ani pa kepedo ituŋanan ŋin aryamun ŋakuryo ŋaarei, kori ŋatemeleudi ŋaarei, eyauni iŋes akilo a ŋakirya apei toruwor ainakinet aŋuna ka asecit keŋ. Nyemaikina iŋes kiwuak nakirya ŋun akimyet, kori ekinyate, anerae erae ainakinet aŋuna ka asecit. 12Emaikina ituŋanan ŋin yau ŋakirya ŋun neni ke esacaradoti, ido emaikina esacaradoti tomuk ŋakirya ŋun ŋadi ka akan ka apei ileleba, ikwapei ainakinet ŋina ke etal, ido emaikina ya esacaradoti ŋakirya ŋun kicuny alokidiama namuroet kaapei ka ŋainakineta ŋuna epeyo aŋuna ke Ekapolon, anerae erae iŋes ainakinet aŋuna ka asecit. 13Alopite a ŋol, emookuni esacaradoti ituŋanan ŋin anasecit keŋ a daadaŋ a ŋina kebu iŋes kitiya, ido isyonio ituŋanan ŋin. Ikwapei ainakinet ŋina a ŋikinyom, eruwor ŋakirya daadaŋ ŋuna idoŋete ŋuna ke esacaradoti.

Ŋainakineta ŋuna ka awoun alemun ainakinet neni ke Ekapolon

14Tema Ekapolon neni a Moses, 15“Ani kesec ituŋanan idio alokidiŋ kus nyelemu ainakinet ŋina emaikina inak neni ke Ekapolon, emaikina ituŋanan ŋin yau neni ke Ekapolon alosipan keŋ emesek ŋolo ajokan ŋolo emam neni eŋwalit. Emaikina emesek ŋol erae ŋolo epedoryo akigyel a ŋisilipae alotyae a ŋicekelya a ŋulu ecamunito ŋituŋa daadaŋ isitiyao anakibois a ŋina asegan. Erae ŋin ainakinet aŋuna ka asecit. 16Emaikina nai ituŋanan ŋin totaca ibore ŋini etoroniyar. Ani irikakin, tolemu nabo atutubet apei alotooma ŋikan, inak esacaradoti. Emaikina nai esacaradoti tomooku ituŋanan ŋin anasecit keŋ a emesek a ŋolo erae ainakinet ŋina ka akiilit aŋuna ka asecit, ido isyonio ituŋanan ŋin.

17“Ani kesec ituŋanan idio alokidiŋ kus pa iredakinit, kitiya ŋuna nyecamakinito ŋakiciketa ŋuna ke Ekapolon, adau ituŋanan ŋin akisec, ido emaikina kisicanae. 18Emaikina ituŋanan ŋin yau alosipan keŋ neni ke esacaradoti emesek ŋolo ajokan ŋolo emam neni eŋwalit, kori ibore ice ŋini ke etyae a ŋolo ke emesek, ikwapei ainakinet aŋuna ka asecit. Emaikina nai esacaradoti tomooku ituŋanan ŋin anadyakaret keŋ a ŋina abu kitiya pa iredakinit, ido isyonio ituŋanan ŋin. 19Erae ainakinet ŋin aŋuna ka asecit a ŋina abu iŋes tosec alokiŋaren Ekapolon.”

Currently Selected:

Ŋilep. 5: NIB2008

Highlight

Copy