Awos. 21

Ŋikisila aŋuna a Ŋipi

(Ŋikis. 15:12-18)

1“Ŋikisila lu ikes emaikina iyoŋ tolimok Ŋisirael:

2“Ani igyelunete iyes epito ŋolo erae Eburaniyait, emaikina kitiya neni kus ŋikaru ŋikanikapei bon erae epito. Nai ani epete ŋikaru ŋikanikaarei, emaikina tojoŋo araakau epito, toruwor ŋini emam ŋuna imicao. 3Ani kebunit iŋes erae iŋes bon, emaikina toboŋo erae iŋes bon. Ani kebunit erukito ka aberu keŋ, emaikina toboŋosi ka aberu keŋ. 4Ani kiitakinit ekapolon ke epito a ŋol epito ŋol aberu, ido tourite aberu ŋin ŋidwe ŋulusapa, kori ŋulupesur, idoŋete aberu ŋin ka ŋidwe neni ke ekapolon a epito a ŋol, ido toboŋo epito ŋol bon. 5Nai ani ketema epito ŋol, ‘Amina ayoŋ ekapolon kaŋ, aberu kaŋ ka ŋidwe kaŋ, ido nyacamit arotokin aneni ke ekapolon kaŋ,’ 6emaikina nai ekapolon ŋol ya epito keŋ neni ka Akuj. Emaikina iŋes yaarae lopuke a Akibois a ŋina ilipere, kori kitowuae anakito a ŋuna ke epuke, ido topedoi akit keŋ ke emutu; toruwor nai epito ŋol eketiyan ke ekapolon keŋ ŋikaru ŋulu ka akiyar keŋ daadaŋ.

7“Ani kegyela ituŋanan nakoku keŋ ikwapei apito a ituŋanan a ice, nyemaikina iŋes tolot emam ibore etacitere ikwa epito. 8Ani pa kejoketa ŋipitesyo ka apito a ŋin aneni ke ekapolon a ŋolo abu tosea iŋes, emaikina kinyakakinae apito ŋin neni a papa keŋ. Mam ekapolon a apito a ŋin apedor agyelar apito ŋin lotuŋa ŋulugelae aŋuna arokyarotor ŋipitesyo keŋ aneni keŋ. 9Ani keseunit iŋes apito ŋin aŋuna alokoku keŋ, emaikina iŋes inak apito ŋin ŋapedorosyo daadaŋ ikwapei nakoku keŋ. 10Ani kiit edya ŋol aberu ace, nyemaikina iŋes tojoŋo akitan, akitanap, kori akiŋarakinit aberu keŋ ŋina esyaunan. 11Ani pa keinaki iŋes aberu ŋin ŋiboro ŋul ŋiuni, emaikina aberu ŋin kipasaiya, emam ibore elakunitae alotuŋa keŋ.”

Ŋikisila aŋuna ka aryenyeo

12“Ituŋanan ŋini eari ŋinice, emaikina iŋes daŋ toarae. 13Nai ani pa kiredakinit iŋes akiar ŋinice, torae atwanare ŋina kitemokinit Akuj, emaikina ituŋanan ŋin tosi nakibois ŋina etemokini ayoŋ Akuj aŋuna keŋ. 14Nai ani kiredak ituŋanan aŋoikin ŋinice toar, emaikina iyes torikosi ituŋanan ŋin a Namuroet kaŋ toara iŋes.

15“Ituŋanan ŋini erami papa keŋ, kori toto keŋ, emaikina toarae.

16“Ituŋanan ŋini ekokoiyari ituŋanan ŋinice, kegyelarit iŋes ituŋanan ŋin, kori keriŋa eyai neni keŋ, emaikina toarae.

17“Ituŋanan ŋini iceni papa keŋ, kori toto keŋ, emaikina toarae.

18“Ani kiburakinosi ŋituŋa, ido towan ipei ŋinice kerae ka amoru, kori tonaŋ nai nyetwana ŋini ewanitae, ido yaarae kimadae ka 19toŋaleu tolomu kiŋa icoge ke ebela, nyemaikina toarae ikawanan, nai emaikina iŋes totac apaki ŋina ecanican ŋin eperi ka emaikina iŋes kidar ŋin tari ŋina eŋaleunio ejok jik.

20“Ani kewan ekapolon epito, kori apito keŋ ke ebela, ido totwan apaki ŋinapei ewanere, emaikina kisicanae ekapolon ŋol. 21Nai ani kiboi epito ŋol, kori apito ŋin akoloŋit apei, kori ŋirwa ŋiarei nyetwana, mam nyisicanio ekapolon ŋol; anerae agyelit ekapolon ŋol epito ŋol, kori apito ŋin ka arae ŋolo keŋ, kori ŋina keŋ.

22“Ani kewana ŋituŋa ŋulu ejiete aberu ŋina epoti tobwaŋut akook, ido nyitiyakin ŋace naberu ŋin, itatacio ekawanan aberu ŋin ibore ŋini etemari ekile ka aberu a ŋin tolemunae, ido tocamunite eikiiko daadaŋ ŋun. 23Nai ani kewanitae aberu ŋin nooi, emaikina iyes tolemasi akiyar aŋuna ka akiyar, 24akoŋu aŋuna ka akoŋu, ekelae aŋuna ke ekelae, akan aŋuna ka akan, akeju aŋuna ka akeju, 25akicuny aŋuna ka akicunyia, ajeme aŋuna ka ajeme ka aramat aŋuna ka aramat.

26“Ani kewan ekapolon akoŋu ke epito, kori ka apito keŋ todita, emaikina ekapolon ŋol kimyek epito ŋol, kori apito ŋin tolot aneni keŋ emam ibore imicatae, anerae adau ekapolon ŋol aditar akoŋu keŋ. 27Ani kewan ekapolon ekelae ke epito, kori ka apito keŋ tolema, emaikina ekapolon ŋol kimyek epito ŋol, kori apito ŋin tolot aneni keŋ emam ibore imicatae, anerae adau ekapolon ŋol alemar ekelae keŋ.”

Ŋikisila aŋuna ka awanawana

28“Ani kicum emoŋ ekile, kori aberu ka towan toar, emaikina tocakae emoŋ ŋol a ŋamoru, ido nyemaikina tonyamae akiriŋ keŋ ka mam ŋuna emaikina kisitakinere ilope ke emoŋ. 29Ani nai kenait sek emoŋ ŋol akicumucum ŋituŋa, ido tolimokinitetei ilope ke emoŋ akiretakin ŋun, nai towou akiretakin, ido toar emoŋ ekile, kori aberu, emaikina emoŋ ŋol tocakae a ŋamoru, ido toarae ilope ke emoŋ daŋ. 30Nai ani kiitani etacit, emaikina ilope ke emoŋ totac etyae daadaŋ ŋolo etubunitoe, ikotere tolakunia akiyar keŋ. 31Emaikina kiwuapae ekisil lopei lo erae kicum emoŋ ikoku ŋinisapat, kori ŋinipese. 32Ani kicum emoŋ epito, kori apito, emaikina ilope ke emoŋ totac elope ke epito, kori ka apito ŋicekelya ŋatomoniuni ŋulu ke esilipa, ido tocakae emoŋ a ŋamoru.

33“Ani keŋaa ituŋanan akipany kimyek eorori, kori kebok kimyek eorori, ido kimasakin emoŋ, kori esigirya tooma keŋ, 34emaikina ilope ka akipany a ŋin totac ilope a ibarasit a ŋin, ido ya iŋes ibarasit ŋini imasakina nakipany.

35“Ani kewan emoŋ a ituŋanan ŋolo a ŋinice, toar, emaikina togyelarae emoŋ ŋolo aari ŋoloce, totyaka ŋikulepek a ŋimoŋin ŋisiliŋa, ido totyaka emoŋ daŋ ŋolo atwana. 36Nai ani kenaiyarit sek emoŋ ŋol akicumucum ŋimoŋin ŋuluce, ido kimyekinite ilope akiretakin, emaikina iŋes totacak emoŋ lomoŋ ŋol, nai ya iŋes ŋolo atwana.”

Currently Selected:

Awos. 21: NIB2008

Highlight

Copy