Awos. 20
20
Ŋakiciketa ŋunatomon
(Ŋikis. 5:1-22)
1Kirwor nai Akuj ŋakiro nu daadaŋ tema,
2“Ayoŋ Ekapolon Akuj kus, ŋina abu okoyau iyes anakwap a Ijipit, anakibois a ŋina iraakatar iyes ŋipi. 3Nyiyakatar ŋakujo ŋace mati ayoŋ bon.
4“Nyitiyaut aŋuna kus etorube a idiobore erae akuj kus, kerae etorube a ibore a ŋini eyai kidiama nakuj, kori a ŋini eyai kwap tooma ŋalup, kori a ŋini eyai nakipi ŋuna alokwap ŋalup. 5Nyiryediko kilipa neni kec; anerae ayoŋ Ekapolon Akuj kus, Akuj ŋina alilyan, esicani ayoŋ ŋidwe aŋuna ka asecit atapapa kec akitodol nanyamet ŋina a ŋauni ka ŋina a ŋaomwon a ŋulu akaŋerito ayoŋ, 6nai etoodikini amina kaŋ ŋina nyiryaŋiryaŋa nanyamet ŋina ka aliput a ŋulu akaminasi ayoŋ, ido kiricito ŋakiciketa kaŋ.
7“Nyisitiyaete ekiro ke Ekapolon Akuj kus analyokonu, anerae nyeesikini Akuj akisican ituŋanan ŋini isitiyae ekiro keŋ analyokonu.
8“Totamunito akoloŋit ŋina a Sabato, ido kituruworito iŋes ŋina asegan. 9Kitiyata ŋiticisyo kus daadaŋ ŋirwa ŋikanikapei. 10Nai akoloŋit ŋina a ŋakanikaarei erae Sabato, akoloŋit ŋina ke Ekapolon Akuj kus; akoloŋit ŋin, nyitiyata etic edio: Nyitiyata iyes, nyitiyaete tari ŋidwe kus ŋulusapa, kori ŋulupesur, ŋiketiyak kus, kori ŋaketiyak kus, ŋibaren kus, kori ŋituŋa ŋulugelae ŋulu iboiyete alotaun kus, 11anerae ŋirwa ŋikanikapei, abu Ekapolon kitiya, tosub nakuj, akwap, anam ka ibore daadaŋ ŋini eyai tooma kec. Aŋun, abu Ekapolon kiterereŋ akoloŋit ŋina a Sabato kitesegu.
12“Tokerite ŋinituŋanan papa keŋ ka toto keŋ, ikotere tolalata ŋirwa ŋulu iboiyoto iyes anakwap a ŋina ikiini Ekapolon Akuj kus.
13“Nyiar.
14“Nyilom.
15“Nyikoko.
16“Nyisudo ŋakiro neni a ŋikidunyet kus.
17“Nyiŋobel ŋinituŋanan akai a ikidunyet keŋ, nyiŋobel aberu a ekidunyet keŋ, kori eketiyan ka aketiyan a ikidunyet keŋ, kori emoŋ, kori esigirya, kori ibore ca daadaŋ ŋini erae ŋini a ikidunyet keŋ.”
18Ani iirarete ŋituŋa daadaŋ agiro ka eruye ŋolo ka arupepe ka ani iŋolikinete akimilyaa ka emoru epurui, abu akuryanu min neni kec, tomaranikis, towua aneni alwanan. 19Temasi ikes neni a Moses, “Bua erae iyoŋ ikisirwor isua, epupokinio isua ŋakiro ŋun. Nai nyicamak Akuj ebuni akisirwor isua, ani kikisirwor Akuj isua, ikitwaki isua.” 20Tema Moses neni a ŋituŋa, “Nyikuryaketa, anerae ebunit Akuj erae akikatakin iyes, ikotere torubakis iwuapito ŋakiro keŋ nyiseceta.” 21Kidoŋo ŋituŋa ewuasi aneni alwanan, nai tolot Moses lomoru, toapiya lodou ŋolo pa acaor, ŋolo ayai neni ayai Akuj.
Ŋikisila ŋulu iwuapitae edukio Namuroet
22Tema Ekapolon neni a Moses, “Tolimok Ŋisirael ŋakiro nu ebe, ‘Idaut iyes ŋikulepek aanyun atemar adau ayoŋ akirwor neni kus anakuj. 23Nyitiyaut aŋuna kus ŋakujo kilipete neni kec, ido kilipete neni kaŋ daŋ, nyemaikina iyes kitiyaut aŋuna kus ŋakujo tari alosilipa, kori alogolid. 24Emaikina iyes kitiyaut a ŋalup Namuroet aŋuna kaŋ, ido inanakis ŋainakineta kus neni kaŋ a nen, ŋainakineta kus ŋuna a ŋamesekin ka ŋimoŋin ŋuna epeyo ka ŋuna ke ekisil. Abuni ayoŋ akiterereŋ iyes anakibois a daadaŋ a ŋina akainakini ayoŋ iyes akilipya ayoŋ. 25Ani kitiyaut iyes a ŋamoru Namuroet aŋuna kaŋ, nyitiyaut a ŋamoru a ŋuna ibesitae ejok; anerae ani kibeta iyes ŋamoru ŋunakitiyaunet Namuroet ŋin, idaut iyes amunaar Namuroet ŋin. 26Nyiwuakis ŋadoketa Namuroet kaŋ ŋuna idoketa iyes, ikotere nyisileereun a nen ikwa itakaniata iyes.’ ”
Currently Selected:
Awos. 20: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
