Bel. Ep. 1
1
(EKEK 14 A EKITAABO A DANIEL)
Daniel ka ŋisacaradotin a Bel
(Yer. 50:21, 51-44)
1Apaki ŋina atwania erwosit Asitayages ikwapei atapapaa keŋ, abu Kirus ŋolo a Perisia kilunyokin lokicoloŋ keŋ kipuka. 2Arae Daniel erukitos a erwosit ka arae ituŋanan ŋini etopolooritae akilo ŋikonei a erwosit daadaŋ.
3Ayakatar apaki ŋin, Ŋibabiloniyae etorube a akuj a ŋina anyaritae Bel, ido a ŋinakoloŋit alemununeete ikes aŋuna a Bel ŋiguniyae ŋulu a ŋakirya a ŋuna ajokak ŋitomon ka ŋiarei ka ŋamesekin ŋatomoniomwon ta ŋilitae amiat ka ŋatomoniarei ŋulu a epiini. 4Etopoloorit erwosit Bel ka alosenene a ŋinakoloŋit akilip neni keŋ. Nai elipi Daniel neni a Akuj keŋ.
Aŋun, abu erwosit kiŋit Daniel tema, “Kaanukiro nyilipenenea iyoŋ neni a Bel?” 5Toboŋok Daniel tema, “Nyetopoloorit ayoŋ ŋakujo ŋuna erae ŋituŋa itiyaunito, nai Akuj ŋina eyari, ŋina asubuni nakuj ka akwap ka iŋes asubuni ŋisubuna ŋulu eyarete daadaŋ.”
6Kiŋit erwosit Daniel tema, “Nyitami iyoŋ atemar erae Bel akuj ŋina eyari a? Nyite iyoŋ neni etya akimuj ŋina imuji iŋes ka neni etya ibore ŋini emasi iŋes a ŋinakoloŋit a?” 7Tokyeni Daniel, tema, “Toceite nyikimodikin, okoe erwosit, anerae erae ibore en ŋalup bon alotooma ka eburonis alokiŋa, ido nyimuja ka nyemata iŋes idiobore.”
8Abu nai erwosit toŋo, ido tonyara ŋisacaradotin a Bel, tolimok ikes tema, “Ani pa kikilimokis iyes ayoŋ ituŋanan ŋini imuji akimuj daadaŋ ŋina elemununuyo aŋuna a Bel, itwakete iyes. 9Nai ani kitogogoŋ iyes atemar Bel iŋes enyamenene ŋamuja ŋun, etwani Daniel, anerae eyeny iŋes Bel.” Tolimok Daniel erwosit tema, “Kimyek kitiyae lopite ŋolo ilimunio iyoŋ.”
10Ayakasi nen ŋisacaradotin a Bel ŋatomonikanikaarei pa imaritae ŋaberu kec ka ŋidwe kec. Aŋun apotu erwosit torukosi ka Daniel kai a Bel. 11Tolimut ŋisacaradotin a Bel temasi, “Kiŋolikisi, elosio tokona isua kiŋa. Okoe erwosit, kitemok iyoŋ elope akimuj ka epiini, ido togolok epuke, kipucak emacar a ekaboboot kon nen. 12Ani iboŋuni iyoŋ moi taparacu ŋisaae ŋulu ka apaaran, ido ani pa kiryamu iyoŋ atemar kirika Bel akimuj ŋin daadaŋ, etwakyo isua, nai etwani Daniel ŋolo irworo alyokonu aŋuna kosi.” 13Pa amisito ikes, anerae ewuakinito ikes epuke ŋolo pa atakani kwap emesa neni etoreneneete ikes a ŋinapaki alomarya tooma kai a Bel akirikar akimuj ŋina alemununuyo aŋuna a Bel. 14Kedaut ikes alomar kiŋa, abu erwosit kiwuak nen akimuj aŋuna a Bel. Tolimok nai Daniel ŋiketiyak keŋ alemun ekuron kipurupurakis kai a Bel daadaŋ apaki ŋina araakar erwosit bon arukito ka ikes. Tolomasi nai ikes daŋ kiŋa, togolokis epuke kipucakis emacar ŋolo a ekaboboot a erwosit nen, toloto nai. 15Ani nakwaare, apotu ŋisacaradotin ikwaŋinapei sek aponeneata, potu kaapei ka ŋaberu kec ka ŋidwe kec, kirikasi ka toŋobasi ibore daadaŋ!
16Ani taparacu tonyou erwosit bu torukut ka Daniel. 17Kiŋit erwosit Daniel tema, “Daniel, nyetakanara ba ŋakipuceta?” Toboŋok Daniel tema, “Okoe erwosit, nyetakanara!” 18Aŋaar ŋipukei bon, kiŋoliya erwosit lomesa, ido kiworou nooi tema, “Okoe Bel, ipol iyoŋ nooi ka emam amodiyo aneni kon jik!”
19Nai tokyeni Daniel, tolimok erwosit nyeloma tooma kai. Tema, “Kiŋolik kwap a akai, ido toyenu atemar ŋulu ataŋae ŋikukus a ŋakejen lu?” 20Tema erwosit, “Ete ayoŋ ŋikukus a ŋakejen a ŋikilyok, a ŋaberu ka a ŋidwe.”
21Toŋo nai erwosit toresiyar, toroc ŋisacaradotin daadaŋ kaapei ka ŋaberu kec ta ŋidwe kec. Apotu nai ikes kitoodikis erwosit ŋipukei ŋulu emunonitae ŋulu etoreneneete ikes elomarete kai akirikar ibore daadaŋ ŋini ewuanakinio lomesa. 22Aŋun, abu erwosit toar ikes, ido kipotok Bel neni a Daniel a ŋolo abu tobwaŋabwaŋaya etorube ŋol ka kinyasu akai a Bel daŋ.
Toar Daniel Epiu
23Ayai nakibois ŋin Epiu ŋolo abur nooi, ŋolo etopoloorito Ŋiburaniyae. 24Tolimok erwosit Daniel tema, “Nyipedori iyoŋ atemar nyerae na akuj ŋina eyari, aŋun, kilip neni keŋ.” 25Tema Daniel, “Elipi ayoŋ neni a Ekapolon Akuj kaŋ, anerae erae iŋes Akuj ŋina eyari. 26Nai tocamakinae ayoŋ, okoe erwosit, ido oar ayoŋ Epiu emam ekileŋ, kori abiro.” Tema erwosit, “Akacamak ayoŋ iyoŋ.”
27Tolemu nai Daniel akimyet, asepwae ka ŋitim, ido kidorok ikes daadaŋ kitiyaunia ŋimugati ŋulu abobok ŋulu abu iŋes inak Epiu kimuj. Abu Epiu kimuj ŋimugati ŋul, ido toduwok akook keŋ toŋaar. Tema nai Daniel neni a erwosit “Kiŋolik ibore ŋin sek ilipi iyoŋ neni keŋ!”
28Ani iirarete Ŋibabiloniyae ŋakiro ŋun, apotu toŋoa nooi, ido totukut akiar erwosit, ebasi, “Aruwor erwosit Eyudayat, amunaiya erwosit Bel, aar Epiu ka aŋol ŋisacaradotin.” 29Ani elosete ikes neni a erwosit, temasi neni keŋ “Inakinae isua Daniel, ani kemam, ikiaryo isua iyoŋ ka ŋituŋa a ekal kon daadaŋ.” 30Abu erwosit toanyu atemar iimunito ŋituŋa neni keŋ ka agogoŋu, ido alotooma akitiŋakinit iŋes ainakin ikes Daniel, abu kipotok Daniel neni kec.
Daniel anadui a Ŋiŋatunyo
(Dan. 6:10-28)
31Apotu Ŋibabiloniyae kimasakis Daniel nadui a ŋiŋatunyo, kiriya Daniel a nen ŋirwa ŋikanikapei. 32Ayakasi ŋiŋatunyo ŋikanikaarei nadui ŋin, ido a ŋinakoloŋit ainanakinio ikes ŋituŋa ŋiarei ka ŋamesekin ŋaarei, nai apaki ŋina emasakinere Daniel nen, mam ibore sek ainakinitae ikes akinyam, ikotere eryetarete ikes Daniel.
33Apaki ŋin, ayai ekadwaran Abakuk Yudaya, kebu iŋes kipou ŋapoko, ido tonyilinyilak amugati nabakuli, acamit iŋes alosit lomanikor ainar akimuj ŋin neni a ŋulu alemete ŋikinyom. 34Nai abu emalaika a Ekapolon tolimok Abakuk tema, “Ya akimuj ŋina iyakar iyoŋ ŋin Babilon neni a Daniel a ŋolo eyai nadui a ŋiŋatunyo.” 35Tema Abakuk, “Ekapolon, ŋinapei nyiŋolikina ayoŋ Babilon ka nyayeni ayoŋ ŋuna a adui a ŋiŋatunyo.” 36Abu nai emalaika a Ekapolon totiŋ Abakuk anakou todaka iŋes etiŋit ŋitim ekeri esibit ekuwuam, kiwuak iŋes Babilon, kidiama adui a ŋiŋatunyo.
37Kiworou nai Abakuk tema, “Daniel, Daniel, kijaa akimuj ŋina ikiyakik iyoŋ Akuj.” 38Tema Daniel, “Okoe Akuj, ikitamu iyoŋ ayoŋ ka nyimyekina iyoŋ ŋulu ikiminasi iyoŋ.” 39Aŋun tonyou Daniel, ido kimuj, ŋinapei paki kinyaka emalaika a Akuj Abakuk nakibois ŋina sek ayaunia.
40Ani edolete ŋirwa ŋikanikaarei, bu erwosit akigwor aŋuna a Daniel. Ani edoluni iŋes nadui a ŋiŋatunyo, toripiya tooma, kiŋolik Daniel iboi. 41Kiworou erwosit nooi tema, “Okoe Ekapolon, Akuj a Daniel, ipol iyoŋ nooi ka emam Akuj ace eyai mati iyoŋ.” 42Abu nai erwosit kiriu Daniel kiŋa, kimasak nadui a ŋiŋatunyo ŋulu sek acamito akiar Daniel, ido apotu ŋiŋatunyo kirikasi ikes ite erwosit.
Currently Selected:
Bel. Ep. 1: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.