Titus 3
3
Iṫaċaƞ Ki Wic̄alapi Ki Tokel Igluhapi Kte
1Oyate niṫawa ki kiksuyewiċaya yo: Tuwa oyate ki iwaƞkal wowaṡʹake yuhapi ki hena ahowiċaṗapi kte. Anawiċaġoptaƞpi kte. Eṡʹeyaṡ ohiƞniya takuƞl waṡteya eċuƞpi kta uƞ igluwiƞyeya uƞpi kte. 2Tuweni wiċayaṡic̄api kte ṡni. Ahoyekiċiyapi kte ṡni. Tuwe ki iyuha ob taƞyaƞ uƞpi kte na waḣwayela opiicʹiyapi kte. 3Ehaƞni uƞkiṡ-eya waċiƞuƞṫaƞkapi ṡni waƞ hehaƞ waanauƞġoptaƞpiṡni, wiċaṡaṡniya opiuƞkicʹiyapi, na taku iyeċetuṡni hena kaṡkauƞyuzapi, woiyokipi ec̄ela uƞkolepi. Taku ṡic̄e ki hena uƞkokaḣtaƞpi uƞ ṡilwiyukc̄aƞyaƞ uƞkʹuƞpi. Waoyusiƞkapi ki ogna uƞkigluhapi na tuwe ki iyuha ob iwaḣteuƞkiċilapiṡni.
4Tuk̇a hehaƞ Wak̇aƞṫaƞka Niuƞyaƞpi uƞkiṫawapi ki
ṫawowauƞṡila na ṫawowaṡte ki gluaṫaƞiƞ.
5Takuni waṡteya eċuƞkʹuƞpi ṡni tk̇a
iye ṫawowauƞṡila ki uƞ niuƞyapi.
Wak̇aƞṫaƞka ṫawoniya wowaṡʹake ki uƞ
piya uƞṫuƞpi iyeċel
uƞċaƞtepi ki uƞyueċetupi.
6Wak̇aƞṫaƞka Jesus Christ
mak̇a wiċoni el hiyuye,
he Woniya-Wak̇aƞ ki uƞkʹupi.
7Jesus ṫawowauƞṡila ki uƞkikipipiṡni eyaṡ,
uƞṡiuƞlapi uƞ he yuhauƞkiyapi.
Na Wak̇aƞṫaƞka ṫawauƞkiyapi ċa
wiċoni oihaƞke wanic̄a ċa u kte ki
he aṗe uƞkʹuƞpi.
8Wonaḣʹuƞ ki le ataya heċetu. Wouƞspe ki lena woilake waṡte na iyuha uƞkiwaṡtepi kte. Oyate ki iwaṡtepi kta uƞ lena iyuha yuhapi kta iyowiċayapaṡtakiƞ kte, heċel tuwe ki iyuha Wak̇aƞṫaƞka wic̄alapi hena wiċoḣʹaƞ waṡteṡte eċuƞpi kte.
9Eyaṡ ṫuƞkaṡilawiċauƞyaƞpi kʹuƞ eċiyataƞhaƞ witkoya waakinic̄api, na wawikipajiƞpi, na Moses ṫawooṗe akinic̄api hena etaƞ iṫehaƞ nigluha kte. Lena takuni iwiċawaṡte ṡni na otuyaċiƞ iwoglakapi. 10Etaƞ woṡic̄api ec̄ela slolyapi hena waƞji naiƞṡ nupa akigle iwahowiċayayiƞ. Hehaƞl awiċaluṡtaƞ kte. 11Ṫawaċiƞpi ki kaptaƞyaƞpi uƞ taku ṡic̄a eċuƞpi hena iye icʹiglaṡic̄api ki aṫaƞiƞ.
Wiċayawaṡtepi
12Artemas e naiƞṡ Tychicus hiyuwiċawayiƞ kte. Watohaƞl tuktuma hi kihaƞ, Nicopolis el atamayayiƞ kte. Hel waniyetu opta wauƞ kte micʹiċuƞze. 13Tohaƞl Zenas wakiya wiċaṡa ki e na Apollos iyayapi kta igluwiƞyeyapi kihaƞ tohaƞ oyakihi hehaƞya owiċayakiyiƞ kte, heċel takuni ikaċaƞpi kte ṡni. 14Crete el Iṫaċaƞ wic̄alapi hena iƞṡ-eya taku waṡte eċuƞ pic̄a hena wilagicʹiyapi kta iyeċetu.
15Tona mic̄iċapi hena iyuha nape niyuzapi. Tona ok̇olakiċiye wak̇aƞ oṗapi hena nape wiċauƞyuzapi. Iṫaċaƞ Jesus taƞyaƞ niyuhapi kta waċewakiye. Heċetu welo.
Currently Selected:
Titus 3: LKTNT20
Highlight
Copy
Compare
Share
Want to have your highlights saved across all your devices? Sign up or sign in
© American Bible Society
