James 4

1Takuwe ċa yeċizapi na ahoyeyeċiyapi hwo? Iṡnaniċ'ilapi na niye tokel yaċiƞ ki he ognaya taku iyuha iyopteyapi yaċiƞ ki he uƞ heċetu hwo? 2Taku waƞ yaċiƞ eyaṡ luha ṡni, ki he tuktel ogna eċanu ki luha oyakihi ki he oyale. Heuƞ nakuƞ tiwiċaya kte oyakihi. Eyaṡ heċena luha oyakihi ṡni, kiċizapi na ahoyekiċiyapi un lena yuhapi okihipi ṡni. Iyeṡ heuƞ waċeyakiyapi ki waṡte kte. 3Woċekiyapi ki ehapi eyaṡ woayupte iyaċupi ṡni, iċiƞ woċekiye ehapi ki hena niye iniwaṡtepi kta uƞ waċeyakiyapi ki heuƞ. 4Wak̇aƞṫaƞka wiċayalapi kehapi eyaṡ wiċayak̇api ṡni! Mak̇a wowiyutaƞ ki he waṡteyalakapi haƞtaƞnaṡ Wak̇aƞṫaƞka ṫoka niyapi ki he slolyayapi ṡni hwo? Heuƞ mak̇a wowiyutaƞ ki he ok̇ola niċ'iya haƞtaƞnaṡ Wak̇aƞṫaƞka etkiya ṫoka niċ'iċaġe lo. 5Wowapi Wak̇aƞ ki el leċel eye ki he ċetʹuƞyagla hwo? "Wak̇aƞṫaƞka Woniya wak̇aƞ waƞ uƞkʹupi ki he kiwaƞk̇aƞyeṡ kċuwa." 6Iyeṡ nakuƞ, Wak̇aƞṫaƞka lila taƞyaƞ uƞkuwapi, Wowapi Wak̇aƞ ki leċel eye, "Wak̇aƞṫaƞka tuwa wak̇aƞiċ'ila ki he kuṡeṫuƞ kte, eyaṡ tuwa uƞṡiiċ'ila ki he wowauƞṡilaḣc̄a ki he uƞ yawaṡte kte lo." 7Wak̇aƞṫaƞka etkiya iċ'iċuwo! Wak̇aƞṡiċa ki ṫawaċiƞkiċ'uyaƞ kʹanaziƞyo, heċel niḣayab iyayiƞ kte lo. 8Wak̇aƞṫaƞka ikiyela u wo, ki iƞṡʹeya nikiyela u kte. Takuƞni itok̇aṡniyaƞ yauƞpi ki hena wiċoni apikiyapo. Waċiƞ ninuƞpapi ki waƞjilakiya wiyukc̄aƞpi na ṫawaċiƞ ohokilapo. 9Taku heċetu ṡni eċanuƞpi ki hena uƞ iċaƞṡilya ċeyapo. Iḣatʹeya yauƞpi ki he ekignakapi na e ċeyapo. Iyuṡkiƞya yauƞpi ki ayuṡtaƞpi na e iyokiṡilya uƞpo. 10Wak̇aƞṫaƞka iṫokabya uƞṡiniċ'iyapi ki niyuonhaƞpi ktel lo. 11Mitakuyepi, woiye ṡikṡiċa uƞ tuweni awaiyewiċakiyapi ṡni yo! Heċanuƞpi ki, naiƞṡ tuwa laṡiċapi haƞtaƞnaṡ, Wak̇aƞṫaƞka ṫawooṗe ki he laṡiċapi iyeċeċa yelo. Na Wooṗe ki he laṡiċapi ki, Wooṗe ki he iwaƞkab nigluzapi na he ahoyaṗapi ṡni naiƞṡ 12Wak̇aƞṫaƞka hena uƞkʹupi waƞhe. Wak̇aƞṫaƞka wayasu uƞkiṫawapi, na he niuƞyapi naiƞṡ ihuƞguƞyaƞpi okihi. Walasu oyakihi keċaƞni ki he tuwa wowaṡʹake niċ'u hwo? 13Leċel iṫoṗe ṡniya waehapi, "Hiƞhaƞni ki naƞiƞṡ hiƞhaƞni ak̇otaƞhaƞ ki oṫuƞwahe ta uƞyapi kte. heċiya waniyetu waƞji wowaṡi iċuƞkʹuƞpi nahaƞ mazaska ota uƞkaġapi kte lo!" 14Hiƞhaƞni he eċiyataƞhaƞ takuƞl slolyayahwo? Wiċoni niṫawa ki he hiƞhaƞni ki toketu kte ki he slolyakiya hwo? Wiċoni ki he pʹo iyeċel ṫaƞiƞ na enaḣc̄i tok̇aḣaƞ. 15Heuƞ iyeṡ leċel ehapi kte, "Wak̇aƞṫaƞka heċel ċiƞuƞkiyapi kihaƞ iċel iyayiƞ kte lo." 16Nasula waniċapi sʹe itaƞyaƞ waehapelo, na waḣaƞiċ'ilapi ki he heċetu ṡniyelo. 17Tuwa taku waƞ eċuƞpiċa ċa slolyapi kʹeyaṡ eċuƞpi ṡni haƞtaƞnaṡ, waḣtanipelo.

Currently Selected:

James 4: LKTNT20

Highlight

Copy

Compare