Ŵalawi 4
4
Mbopesi syakulechelesya sambi
1Ambuje Akunnungu ŵansalile che Musa, 2Ŵasalile Ŵaisilaeli, iŵaga mundu atesile sambi syangaŵa sya mele, ni atendaga chindu chachilichose chachikanyichikwe ni lilajisyo lya Ambuje Akunnungu.
3Iŵaga Jwambopesi Jwankulu atesile sambi ni kwatesya ŵandu aŵe ni ileŵo, nipele chantyochesye Ambuje Akunnungu ng'ombe jankambaku jangakomala jangalemala jiŵe mbopesi ja sambi jatesile. 4Chajiichisye ng'ombe jo ni kujiŵika pannango wa Lisakasa lya Kusimanilana, paujo pa Ambuje Akunnungu; nombejo chaŵiche nkono wakwe pa ntwe wa jele ngombe jo ni kujisikitila paujo pa Ambuje Akunnungu 5Jwele jwambopesi jwankulu jo chajigale miasi kanandi ni kwinjila najo mu Lisakasa lya Kusimanila. 6Chatoŵele chala chakwe mmiasi jo ni kunyuluchisya kasano ni kaŵili paujo pa Ambuje Akunnungu chammbujo mwa nguo ja lusasa jajikulekanganya peuto papaŵichikwe pajika kwaligongo lya Akunnungu ni peuto papaŵichikwe pajika nnope kwaligongo lya Akunnungu. 7Nipele jwambopesi chanyuluchisye miasi jine jo mu misengo jajili mundumba mwa chilisa chakututumichisya ubani wakununjila yambone, paujo pa Ambuje Akunnungu, jajili mu Lisakasa lya Kusimanilana. Miasi jajikusigalila jo chajijitile kuusi kwa chilisa chakutinichisya mbopesi, chachili chiŵandi ni nnango wakwinjilila mu lisakasa. 8Nipele chagatyosye mauta gose ga ng'ombe ja mbopesi ja sambi: mauta gose ga chinyama gagaunichile matuumbo pane gagasyungulile mmatuumbo, 9mbyo siŵili ni mauta gagakamulene nasyo, ni mauta gose gagasyungulile chiŵandi ni mauli ni agala gagaunichile litooga. Chaityosye yanayose mu chinyama cho. 10Yele yose chaityosye nti yakuti kutyosyekwa mu chinyama cha mbopesi ja chitendewele, nipele jwambopesi jo chaitinisye pa chilisa chakutinichisya mbopesi. 11Nambo lipende lya ng'ombe jo ni nyama ni ntwe ni makongolo pamo ni indu yamunkati ni manyi gakwe, 12malumbo gakwe indu yose yaisigalile ya ng'ombe jo chaipeleche paasa pa chigono ni kusipeleka pamalo papakundikwe ni Ambuje Akunnungu, pachitutu, nombejo chaitinisye ni mooto pa sasu syasili pachitutu po.
13Iŵaga Ŵaisilaeli wose kwapamo atesile sambi syangaŵa sya mele kwakupanganya chindu chachikanyichikwe ni makanyo ga Ambuje Akunnungu, nachiŵamuno ŵandu wo nganaimanyilila nkati chindu cho, akwete chileŵo, 14papopo pachisimanyiche sambi syo, mpingo wose chiutyosye ng'ombe jankambaku jangakomala jiŵe mbopesi jakutyosya sambi. Chajiiche nawo pa Lisakasa lya Kusimanilana. 15Ilongola ŵa ŵandu ŵa ku Isilaeli chaŵiche makono gao pantwe pa ng'ombe jajili paujo pa Ambuje Akunnungu, nipele chajisikitile paujo pa Ambuje Akunnungu. 16Ajula jwambopesi jwankulu chajigale miasi ja ng'ombe jankambaku jo ni kujiikanawo nkati mwa Lisakasa lya Kusimanilana, 17chatoŵele chala chakwe mmiasi mo ni kujinyuluchisya kasano ni kaŵili paujo pa Ambuje Akunnungu, paujo pa nguo ja lusasa jajikulekanganya peuto papaswela ni papaswela nnope. 18Ni miasi jine chajipakasye mmisengo jajili mundumba sya chilisa chakututumichisya ubani chachili mu Lisakasa lya Kusimanilana paujo pa Ambuje Akunnungu, ni miasi jajikusigalila chajijitile kuusi kwa chilisa chakutinichisya mbopesi chachili chiŵandi ni nnango wa Lisakasa lya Kusimanilana. 19Mauta gose ga chinyama cho chagajigale ni kugatinichisya pa chilisa. 20Kwapele chautende nkambaku wa ng'ombe wo mpela yatite kujitenda ajila jine ja mbopesi ja sambi jila. Kwakutenda yeleyi jwambopesi jo chiŵatendele ŵandu ujilanyo, nombewo chalecheleswe. 21Nipele chajigale nyama ja ng'ombe jankambaku jo ni kujijausya paasa pa chigono ni kujitinisya ni mooto mpela ila yatite kupanganya kwa jine jila. Jelejo jili mbopesi kwa ligongo lya sambi sya ŵandu wose wa ku Isilaeli.
22Iŵaga chilongola atesile sambi syangaŵa sya mele kwakuchipanganya chindu chachili chose chekanye ni Ambuje Akunnungu, Akunnungu ŵakwe, akwete chileŵo, 23aimanyililaga sambi syatesile syo chaichenawo mbopesi jakwe ja mbusi tonde jangalemala. 24Chaŵiche nkono wakwe pa ntwe wa tonde ja mbusi jo ni kujisikitila apala paakusikitilaga mbopesi sya kutinisya, paujo pa Ambuje Akunnungu. Jelejo jili mbopesi ja sambi. 25Jwambopesi chatoŵele chala chakwe mmiasi ja mbopesi ja sambi ni kujipakasya mmisengo jajili mundumba sya chilisa chakutinichisya mbopesi, ni miasi jajikusigalila chajijitile kuusi kwa chilisa. 26Mauta gose ga tonde ja mbusi jo chagatinichisye pa chilisa, mpela yatesile kwa chinyama cha mbopesi ja chitendewele. Kwa kutenda yeleyo jwambopesi chatende ujilanyo kwaligongo lya sambi ja chilongola jo, nombejo chalecheleswe. 27Ni iŵaga mundu jwalijose pasikati ja mpingo wa ŵandu, atesile sambi syangaŵa sya mele, kwakupanganya chindu chachilichose chekanye ni Ambuje Akunnungu, akwete chileŵo. 28Amanyililaga sambi jakwe, chaichenawo mbopesi ja mbusi jankolo jangalemala, kwaligongo lya sambi syatesile. 29Chaŵiche nkono wakwe pantwe wa mbusi ja mbopesi ja sambi, ni kujisikitila apala paakusikitilaga inyama ya mbopesi jakutinisya. 30Jwambopesi chatoŵele chala chakwe mmiasi ja mbopesi ja sambi ni kujipakasya mu misengo jajili mundumba mwa chilisa chakutinichisya mbopesi ni miasi jajisigalile chajijitile kuusi kwa chilisa cho. 31Nipele chagatyosye mauta gakwe gose nti yatesile kwa chinyama cha mbopesi ja chitendewele, ni jwambopesi chagatinisye pachanya chilisa, kuŵa ununjile wambone wakwanonyelesye Ambuje Akunnungu. Kwa kutenda yeleyo, jwambopesi champanganyichisye ujilanyo mundu jo, nombejo chalecheleswe.
32Iŵaga mundu jo chaichenawo ngondolo jangakomala kuŵa mbopesi ja sambi, chaichenawo jankolo jangalemala. 33Chaŵiche nkono wakwe pantwe wa ngondolo ja mbopesi ja sambi ni kujisikitila palapala paakusikitilaga inyama ya mbopesi sya kutinisya. 34Nipele jwambopesi chatoŵele chala chakwe mmiasi ja mbopesi ja sambi jo ni kujipakasya mu misengo jajili mundumba mwa chilisa chakutinichisya mbopesi, ni miasi jajisigalile chajijitile kuusi kwa chilisa cho. 35Nipele chagatyosye mauta gose nti yakutikugatyosya mauta ga ngondolo ja mbopesi ja chitendewele jila, ni jwambopesi chagatinichisye pa chilisa pachanya pa mbopesi syasikutyochekwa kwa Ambuje Akunnungu ni mooto. Kwa kutenda yeleyo, jwambopesi champanganyichisye mundu jo ujilanyo kwaligongo lya sambi syakwe, nombejo chalecheleswe.
Currently Selected:
Ŵalawi 4: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
