Ŵalawi 3
3
Mbopesi jakuŵa ni chitendewele ni Akunnungu
1Iŵaga mundu akusaka kutyosya mbopesi ja kuŵa ni chitendewele ni Akunnungu, nombejo atyosyaga ng'ombe jankambaku pane jankolo, kutyochela mu ilango yakwe, chele chinyama cho chiŵeje changalema, patachiichisye paujo pa Akunnungu. 2Chaŵiche nkono wakwe pantwe wa chinyama cho ni kuchisikitila pannango wa Lisakasa lya Kusimanilana. Nombe ŵambopesi ŵa uŵelesi u che Haluni chajinyuluchisye miasi jakwe mbande syosye sya chilisa. 3Kutyochela mu jele mbopesi jakuŵa ni chitendewele ni Akunnungu chaichenawo mbopesi jajityosekwe kwa Ambuje Akunnungu ni mooto; mauta gose ga chinyama gagaunichile matuumbo pane gagakamulene ni matuumbo, 4mbyo siŵili ni mauta gagakamulene nasyo, ni mauta gose gagasyungulile chiŵandi ni mauli ni agala gagaunichile litoga. Yele yose chaityosye mu chinyama cho. 5Uŵelesi u che Haluni chajitinisye mbopesi jo pa chilisa pamo ni mbopesi jakutinisya jajili pachanya sasu. Jelejo jili mbopesi jakutinisya jajikununjila yambone jajikwanonyela Ambuje Akunnungu.
6Iŵaga jele mbopesi jakuŵa ni chitendewele ni Akunnungu jinkwatyochesya Ambuje Akunnungu jikuumila mu ilango ya ngondolo pane mbusi, nipele, asagulikwe tonde pane jankolo jangalemala. 7Naga mundu chatyosye ngondolo jangakomala kuŵa mbopesi jakwe, nipele chatyochesye paujo pa Ambuje Akunnungu, 8nombejo chaŵiche nkono wakwe pantwe wa chinyama cho ni chachisikitile paujo pa Lisakasa lya Kusimanilana. Ŵambopesi ŵa uŵelesi u che Haluni chanyuluchisye miasi jakwe mbande syosye sya chilisa. 9Nipele mwa mbopesi jakuŵa ni chitendewele ni Akunnungu jakuntyochesya Ambuje Akunnungu pa mooto jo, chaichenawo indu yino: Mauta gakwe ni nchila wansima wauli ni mauta wekate chiŵandi ni mauli pampepe ni mauta gose gagakuunichila matuumbo ni mauta gose gagasyungwile mmatuumbo, 10mbyo siŵili ni mauta gagakamulene nasyo, ni mauta gose gagasyungulile chiŵandi ni mauli ni agala gagaunichile litooga. Yele yose chaityosye kwa chinyama cho. 11Jwambopesi chaitinisye yanayose yo pachanya pa chilisa jiŵe mbopesi jakwatyochesya Ambuje Akunnungu pa moto.
12Iŵaga mbopesi jakwe tijiŵe mbusi, nipele chatyosye paujo pa Ambuje Akunnungu, 13chaŵiche nkono wakwe pantwe pa mbusi jo ni kujisikitila paujo pa Lisakasa lya Kusimanilana. Uŵelesi u che Haluni chajinyuluchisye miasi jakwe mbande syosye sya chilisa. 14Kutyochela mu jele mbopesi jakuŵa ni chitendewele ni Akunnungu jo, chatyosye mbopesi jajityosekwe kwa Ambuje Akunnungu ni mooto; mauta gose ga chinyama gagaunichile mmatuumbo ni gagakamulene nasyo, 15mbyo siŵili ni mauta gagakamulene nasyo, ni mauta gose gagasyungulile chiŵandi ni mauli ni agala gagaunichile litooga. 16Jwambopesi chaitinisye pa chilisa jiŵe mbopesi ja chakulya jajili ni ununjile wambone wakunonyelesya. Mauta gose ga chinya cho gali ga Ambuje Akunnungu. 17Lyeleli chiliŵe lilamulo moŵa gose, pa uŵelesi wenu wose ni papalipose pachintame, yakuti ngasinlya ng'oo mauta gagali gose ga chinyama atamuno miasi.
Currently Selected:
Ŵalawi 3: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
