Kutyoka 2

Kupagwa kwa che Musa

1Pa moŵa go mundu jumo jwa nyuumba ji che Lawi, jwanlombile jwankongwe jwa lukosyo lwa Ŵalawi. 2Jwankongwe jula jwakwete chitumbo ni kuligopola mwanache jwannume. Paŵamweni kuti ali jwakusalala ŵansisile kwa miesi jitatu. 3Nambo, paŵaiweni kuti ngakukombola kunsisa sooni, ŵakajigele katundu kakaluchikwe ni matete, ŵakapachile lipula kakajinjisya meesi. Ŵammisile mwanache jo mu katundu, ni kukaŵika pa manyasi mungulugulu lusulo lwa Naili. 4Mlumbugwe mwanache jo ŵalisisile pakuŵandichila ni pepala, kuti aiwoneje ichiyasimane apwao.

5Nipele mwali jwa mwenye ŵajaŵile kulusulo kukoga, akuno ŵakutumichila ŵakwe ali nkwendajenda mungulugulu lusulo. Mwali jula ŵakaweni katundu mmanyasi, ŵantumile jumo jwa ŵakutumichila ŵakwe kuti akakajigale katundu kala. 6Paŵakaunukwile katundu kala ŵakaweni kanache kalinkulila, ŵakakolele chanasa, ŵatite, “Aka kanache kali kamo mwa ŵanache ŵa Chieblania.”

7Pelepo nlumbugwe kanache kala ŵalilosisye ni kunsalila mwali jula, “Uli, nyaule ngansosele jwankongwe jwa Chiebulania kuti akakalele ni kukajonjesya kanache ka?” 8Mwali jwa mwenye ŵansalile, “Ejaa, njaule.” Nipele nlumbugwe ŵajaŵile ni kunnyichisya achikulugwe kanache kala. 9Mwali jwa mwenye ŵaasalile achikulu ŵala, “Nkajigale kanache ka nkakajonjesye ni une chinjimpa mbote jenu.” Nipele, achikulu ŵala ŵakajigele kanache ni kukalela.

10Mwanache jula paŵakusile ni kukola lisusa, ŵanjawisye kwa mwali jwa mwenye, nombejo ŵanjigele ni kuntenda jwakwe ni kunkolanga liina a Musa, achitiji, “Naachuwile mmeesi.”

Che Musa akuutuchila ku Midiani

11Pa lyuŵa limo, che Musa paŵaliji jwanchanda ŵajaŵile kukwalola Ŵaebulania achinjakwe, ni ŵaiweni iŵatite pakulagaswa. Ŵansimene Mmisili jumo alinkumputa jumo jwa nlongo njakwe jwa Chiebulania. 12Che Musa ŵalolite aku nakuku, paŵaiweni pangali mundu jwakummona, ŵammuleje Mmisili jula ni kuusilila ntembo mu nsanga. 13Lyuŵa lyaaŵili lyakwe, che Musa ŵaaweni Ŵaebulania ŵaŵili ali nkuputana. Ŵammusisye juŵanleŵele njakwe jula, “Kwachichi nkumputa njenu?” 14Mundu jula ŵajanjile, “Ŵaani ammisile mwe mme jwankulu ni jwakutulamulila uŵeji? Uli nkusaka kumulaga une mpela imwammuleje Mmisili jula?” Nipele che Musa wajogwepe ni kuganisya, “Amati! Imanyiche inaitesile ila.” 15Nombe mwenye paŵapilikene nkati ngani jila, ŵasachile kummulaga che Musa. Nambo che Musa ŵantisile mwenye, ŵajawile kutama ku chilambo cha ku Midiani chiŵandi ni chisima.

16Nipele achiŵali saba ŵa jwambopesi jumo jwa ku Midiani, ŵaiche kukuteka meesi ni kugumbasya yombo iŵang'welelaga inyama, kuti aing'wesye inyama ya atati ŵao. 17Ŵakuchinga ŵane ŵaiche ni kwatopola achiŵali ŵala, nambo che Musa ŵaachenjele achiŵali ŵala, ni kuing'wesya inyama yao. 18Paŵausile kwa che Leuli atati ŵao, nombejo ŵausisye, “Iŵele uli lelo mbusile chitema?” 19Nombewo ŵanjanjile, “Mmisili jumo atukulupwisye kutyoka kwa ŵakuchinga ŵala, sooni ŵatutechele meesi ni kuing'wesya inyama yetu.” 20Atati ŵao ŵausisye achiŵali ŵala, “Ana alikwapi mundu jo? Kwachichi munnesile kukoko? Nkammilanje aiche kukulya.”

21Che Musa ŵakundile kulonjela kwa mundu jula, nombejo ŵampele mwali jwao juŵaŵilanjikwaga che Sipola kuti annombe. 22Che Sipola ŵammelechele mwanache jwannume. Che Musa ŵatite, “Ndili jwanlendo mu chilambo chi.” Kwayele ŵammilasile liina lyakwe Gelishomu.

23Gali gapite moŵa gamajinji, mwenye jwa ku Misili jwajasiche. Ŵaisilaeli ŵaliji nkudandaula ni kulila achisakaga ukamuchisyo, ligongo ŵaliji bado achikapolo, ni chililo chao chaaichilile Akunnungu kwinani. 24Akunnungu ŵachipikene chililo chao ni ŵachikumbuchile chilanga chiŵalangene ni che Ibulahimu ni che Isaka ni che Yakubu. 25Akunnungu ŵaalolite Ŵaisilaeli yaakuti pakulagaswa ni ŵaakolele chanasa.

Currently Selected:

Kutyoka 2: YBV

Highlight

Copy