Kutyoka 12
12
Chindimba cha Pasaka
1Ambuje Akunnungu ŵaasalile che Musa ni che Haluni mu chilambo cha ku Misili: 2“Au mwesi wu chiuŵe mwesi waandanda kukwenu kila pankuchitanda chaka. 3Mwasalile Ŵaisilaeli wose ŵa nnango wauli wose kuti, pa lyuŵa lya kumi lya mwesi wu, jwannume jwalijose chalisagulile ngondolo jamwana pane mbusi jamwana, jakuti ŵandu ŵa pannango wao alye. 4Naga ŵandu ŵa pannango nganatupa mwakuti ngajimala kulya nyama ja ngondolo jimo, nipele ŵandu ŵa minango jiŵili akamulangane pampepe ni agaŵane nyama mpela mwaŵelele ŵandu. Aŵalanjile chile winji ŵa ŵandu ŵatachilya nyama jo, ni winji wa nyama jitalye kila mundu. 5Ngondolo jamwana pane mbusi jichinsagule jo jiŵeje tonde jajili ni chaka chimo ni jangapungwana. 6Chinnyigose inyama yo mpaka pa lyuŵa lya kumi na nne lya mwesi ulaula. Pa lyuŵa lyo, Ŵaisilaeli wose kila nnango chasinje chinyama chakwe chiŵachigosile katema ka ligulo. 7Ni chajigale miasi ja chinyama cho ni kujipakasya penani ni mumbali mwa pakwinjilila mu nyuumba jitakalile nyama jo. 8Chilo chichocho chalye nyama jo jili jejoche, pamo ni liponda lyakuŵaŵa ni nkate wangataga amila. 9Ngasalya nyama jeŵisi pane jeteleche, nambo jiŵe jejochele kumo ni yose, pangakatanya ntwe namose ngongolo pane kuityosya ya munkati. 10Nkasigasya chachilichose mpaka kundaŵi. Naga jikusigala mpaka kundaŵi njitinisye. 11Yeleyi ni ichinkajile kulya nyama jo nli mmasile kuliŵika chile kwa ulendo, chimme nli ntakwile ni kutaŵa mpumbulu nchiunu, ni kuwala italawanda yenu mmakongolo ni kwigala ntindiso. Nlyeje kwa chitemachitema, chelecho chili chindimba cha Pasaka kwakwachimbichisya Ambuje Akunnungu.”
12“Pakuŵa chilo cho chinjipita mu chilambo chose cha Misili, chinjiulaga ŵanache achalume ŵa kwitiwo ni mikambaku jandanda kupagwa, ni une tinjijilamula minungu jose ja Misili. Une ndili Ambuje Akunnungu. 13Ni miasi jo chijiŵe chimanyisyo kuti mwele akutama Ŵaisilaeli. Pachinjijiwona miasi jo chinjipita pachanya nyuumba syo, kuti ngasiika kukummulasya katema pachiiche kukwalamula Ŵamisili. 14Lyuŵa nti ali, chintende chindimba chakukumbuchila indesile kukwenu, une Ambuje Akunnungu. Ntendeje yele mu iŵelesi yenu yose, lyele ni lilajisyo lya moŵa gose pangali mbesi.”
Chindimba cha mikate jangataga amila
15Ambuje Akunnungu ŵatite, “Kwa moŵa saba chinchilya mikate jangataga amila. Pa lyuŵa lyaandanda lya chindimba chintyosye amila jose jajili mu nyuumba syenu. Mmoŵa saba go, jwalijose jutalye nkate wetaje amila, tachintyosya pasikati ja Ŵaisilaeli. 16Pa lyuŵa lyaandanda ntende nsongangano wa kumbopelela une. Ntende yeleyo ni pa lyuŵa lya saba. Mmoŵa gaŵili go ŵandu akapanganya masengo gagali gose ikaŵe kuteleka chakulya pe kuti kila mundu alyeje. 17Ni ŵanyamwe chinjendelechele kutenda chindimba cho pa lyuŵa li kuti chiŵe chikumbuchisyo, pakuŵa pa lyuŵa nti ali nasikopwesye ngosyo sya Ŵaisilaeli mu chilambo cha Misili. Kwayele moŵa gose pangali mbesi ntendeje chindimba pa lyuŵa nti ali mu iŵelesi yenu yose. 18Kutandilila ligulo lya lyuŵa lya kumi na nne, mpaka ligulo lya lyuŵa lya ishilini na moja pa mwesi waandanda nkalya nkate wetaje amila. 19Mmoŵa saba go kukaoneka amila jilijose mmajumba mwenu. Pakuŵa kele katema ko, jwalijose aŵeje jwannendo pane Muisilaeli kwa chipago, jutachilya chakulya chetaje amila, mundu jo tachintyosya pasikati ja Ŵaisilaeli. 20Nkalya chachilichose chetaje amila mmoŵa saba go. Palipose pachintame chinlye mikate jangataga amila.”
Chindimba chaandanda cha Pasaka
21Nipele che Musa ŵaaŵilasile ilongola wose ŵa Ŵaisilaeli ni kwasalila, “Njaulangane nkasagule ngondolo ja mwana pane mbusi ja mwana jakukwana kwa ŵandu ŵapannango wenu ni kujisinga kuti nlye pa chindimba cha Pasaka. 22Njichinje miasi ja ngondolo mu mbale, njigale lujambi lwa chitela chachikuŵilanjikwa hisopo, nkachoye mmiasi. Nkajipache miasi jo mu mbali mose ni penani pa mwakwinjilila mu nyuumba. Mundu jwalijose akasakopoka mu nyuumba mpaka kundaŵi. 23Pakuŵa Ambuje Akunnungu tachipita pa chilambo chose kuti ŵaaulaje Ŵamisili. Nambo patachijiona miasi penani ni mumbali mwa mwakuinjilila mu nyuumba, Ambuje Akunnungu tachipita pachanya nyuumba jo ni ngasakunda ŵakutumichila ŵao ŵa kwinani ajinjile mu nyuumba jo ni kummulaga. 24Ŵanyamwe ni iŵelesi yenu, njendelechele kutenda chindimba cha Pasaka kila chaka moŵa gose pangali mbesi. 25Pachinchijinjila mu chilambo chalanjile Ambuje Akunnungu kumpa ŵanyamwe njendelechele kuchitenda chindimba chi. 26Ŵanache ŵenu patachimmusya, ‘Chindimba chi malumbo gakwe ichichi?’ 27Chimwajanje kuti, ‘Ajiji jili mbopesi ja chindimba cha Pasaka kwaligongo lya kwachimbichisya Ambuje Akunnungu, pakuŵa ŵapitile pachanya majumba ga Ŵaisilaeli mu chilambo cha ku Misili katema kaŵaulagaga Ŵamisili nambo uweji nganatuulaga.’ ” Pelepo Ŵaisilaeli ŵakoteme mpaka paasi ni kupopelela.
28Nipele Ŵaisilaeli ŵatesile mpela Ambuje Akunnungu iŵatite pakwasalila che Musa ni che Haluni.
Ŵanache ŵakwitiwo ŵa Ŵamisili akuulajikwa
29Pakati chilo, Ambuje Akunnungu ŵaauleje ŵanache ŵa chilume ŵa kwitiwo ŵa Ŵamisili. Kutandilila mwanache jwa kwitiwo jwa mwenye, jwachatawale pachawe atatigwe mpaka mwanache jwa kwitiwo jwa mundu jwataŵikwe mu nyuumba ja kutaŵilwa, namose ipago yaandanda yose ya ilango yawile. 30Chilo chila mwenye ni ŵakamusi ŵakwe ni Ŵamisili wose ŵajimwiche ni ŵatandite kulila malilo, pakuŵa nganijipagwa nyuumba jajilijose janganijipagwa mundu juŵaulajikwe. 31Chilo chichocho mwenye ŵaaŵilasile che Musa ni che Haluni ni kwasalila, “Njimuchanje, ntyokangane pasikati ja ŵandu ŵangu ŵanyamwe ni Ŵaisilaeli wose! Njaulangane nkaapopelele Ambuje Akunnungu mpela intite kusala! 32Njigale ngondolo syenu ni mbusi ni ng'ombe ntyokangane! Nkambopelele kuti Ambuje Akunnungu ambe upile.” 33Ŵamisili ŵaachisisye Ŵaisilaeli atyokangane kwakwanguya achitiji, “Chitumale wose naga ngantyoka.” 34Nipele Ŵaisilaeli ŵajigele utandi weunye chile ukanaŵe kutaga amila, ni yombo yakuunyila, ŵaitaŵilile mu nguo ni kujigala mmakoyo mwao. 35Ŵaisilaeli ŵatesile muŵaŵechetele che Musa, ŵaaŵendile Ŵamisili indu ya feza ni ya sahabu pamo ni nguo. 36Nombe Ambuje Akunnungu ŵaatesile Ŵamisili aŵe ni mitima jambone kwa Ŵaisilaeli ni kwapa chilichose chiŵaŵendile. Yeleyo ni iŵatite Ŵaisilaeli kujigala ipanje ya Ŵamisili.
Ŵaisilaeli akutyokangana ku Misili
37Ŵaisilaeli ŵatandite ulendo wa paasi kutyochela ku musi wa Lamasesi kwaula ku Sukoti. Ŵapali achalume laki sita pangaŵalanjila achakongwe ni ŵanache. 38Ŵapali ŵandu ŵane achajinji ŵangaŵa Ŵaisilaeli ŵaŵalongene nao, ni ngondolo ni mbusi pamo ni ng'ombe, ilango yaliji yejinji. 39Ŵajochile mikate jangataga amila kwa aula utandi weunye uŵaujigele kutyochela ku Misili. Utandi wo waliji wangataga amila pakuŵa ŵaŵinjikwe ku Misili kwa kwanguya, nganapatanga lipesa lyakukolosya chakulya.
40Ŵaisilaeli ŵatemi ku Misili yaka mia nne na selasini. 41Pa lyuŵa lya mbesi lya chaka cha mia nne na selasini, lyuŵa lilalila, ngosyo syose sya Ambuje Akunnungu syatyosile ku Misili. 42Chilo cho Ambuje Akunnungu ŵakwanilisye chilanga chao, paŵakopwesye ŵandu ŵakwe mu chilambo cha Misili. Chikuŵilanjikwa chilo cha Ambuje Akunnungu ni chikuŵajilwa kukumbuchilwa mu iŵelesi yose ya Ŵaisilaeli, pakuŵa Ambuje Akunnungu ŵaagosile achachekulu ŵetu.
Malajisyo gankati chindimba cha Pasaka
43Nipele Ambuje Akunnungu ŵasalile che Musa ni che Haluni, “Gelega gali malajisyo gankati chindimba cha Pasaka. Jwannendo jwalijose ngasalya chakulya cha chindimba cha Pasaka. 44Nambo kapolo jwasumikwe kwa mbiya naga ŵaumbale chalye chakulya cha Pasaka. 45Nkaalechelela jwannendo jwakutama pasikati jenu pane jwakutumichila kulya chakulya cha Pasaka. 46Chiligwe mu nyuumba jijojo jatelechele chakulya cho. Ngasinkoposya paasa nyuumba chakulya chilichose. Nkapokosola liupa lyalililyose lya chinyama cho. 47Ŵaisilaeli wose atendeje chele chindimba cha Pasaka cho. 48Nambo naga jwannendo akutama pasikati jenu, nombejo asakaga kutenda chindimba cha Pasaka kwaligongo lya kwachimbichisya Ambuje Akunnungu, mwaumbasye achalume wose ŵaali mu nyuumba jao. Nipele akukombola kulya chakulya cha Pasaka pakuŵa akuŵalanjikwa yalumo ni Ŵaisilaeli. Nambo mundu jwangaumbala akalya chakulya cha Pasaka. 49Malajisyo go chigaŵe kwa wose, ŵaali Ŵaisilaeli kwa kupagwa ni achalendo ŵakutama pasikati jenu.” 50Ŵaisilaeli wose ŵatesile mpela Ambuje Akunnungu iŵatite pakwalajisya che Musa ni che Haluni. 51Pa lyuŵa lila Ambuje Akunnungu ŵaakopwesye Ŵaisilaeli kutyoka ku Misili mipingo kwa mipingo.
Currently Selected:
Kutyoka 12: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
