Esita (Hebrew) 3
3
Malindi ga che Hamani ga kwajonanga Wayahudi
1Payamasile kutendekwa yeleyo, mwenye che Ahusuelo ŵanchimbichisye che Hamani ni ŵatendekasisye aŵe chilongola ŵakulu ŵa ilongola ŵane. Che Hamani ŵaliji mwanache jwa che Hamedata, juŵatyochele ku uŵelesi wa che Agagi. 2Mwenye ŵalajisye achakulu wose kuti ŵachimbichisye che Hamani kwa kwakotamila ni kwatindiŵalila. Nambo che Modekai ŵakanile. 3Ŵakutumichila ŵane ŵa mwenye uŵaliji pannango wa likome lya mwenye, ŵauusisye che Modekai, “Kwachichi ngankwitichisya malajisyo ga mwenye?” 4Moŵa gose ŵansalile kuti aleche ungajitichisya, nambo che Modekai nganakunda. Nipele, ŵaasalile che Hamani kuti alole yakuipanganya che Modekai, pakuŵa ŵatite ali Myahudi ngakukombola kwatindiŵalila che Hamani. 5Che Hamani yachimile paŵamanyilile kuti che Modekai ngakwakotamila namose ngakwatindiŵalila. 6Soni paŵaimanyilile kuti che Modekai ali Myahudi, ŵalamwile kuti ngaikwana kwajamuka pe. Nipele ŵatesile malindi ga kwajonanga Ŵayahudi wose, yaani ŵandu ŵakwe che Modekai, uŵaliji mu umwenye u che Ahasuelo.
7Pa chaka cha kumi na mbili cha umwenye wa che Ahasuelo, pa mwesi waandanda ŵaukuŵilanjikwa Nisani, che Hamani ŵalajisye atende pulimu yaani gudugudu kuti asagule mwesi ni lyuŵa lichapanganye malindi gao. Nipele, gudugudu jagwilile pa mwesi wa kumi na mbili pa lyuŵa lya kumi na nne yaani mwesi wa Adali.
8Nipele, che Hamani ŵaansalile mwenye, “Apali ŵandu kutyochela chilambo chimpepe ŵajenelenje kose kose paumwenye wenu, ni ŵanyao ajenele pachilambo pose. Wanduwo ŵana masyoŵelo gangagakwilana ni ŵandu ŵane. Niŵanyawo ngakugajitichisya malamusi genu, kwa yele ngasimwapililila. 9Alakwe mwenye naga chinsache, nipele nlamule, ŵandu ŵa aulajikwe. Noneji ngulumbila, iŵaga chinlamule yeleyo, chimbeleche madini ga feza kilo elufu kumi mungokwe ja mwenye kwa ligongo lya aŵala ŵatapanganye masengo go.”
10Mwenye ŵausile pete jakwe ja chimanyisyo ni ŵampele jwammagongo jwa Ŵayahudi che Hamani mwanagwao che Hamedata, jwa uŵelesi wa che Agagi. 11Nipele mwenye ŵansaalile che Hamani, “Nsigale ni mbiya syenu nambo ŵandu wo mwatende yankuisaka.”
12Nipele, lyuŵa lya kumi na tatu lya mwesi waandanda, che Hamani ŵaaŵilasile ŵakulemba wose ŵa mwenye, ŵalembile ikalata kwa ilambo yose ni iŵecheto yose mpela iŵatite che Hamani kwa malajisyo ga mwenye, ni kuijausya iwilili ya ikalata yo kwa achakulu wose ni ilongola ŵa ilambo yose, ni ilongola ŵa ngosyo syose malinga ni iŵecheto iŵaŵechetaga ŵandu wo, ikalata yo yalembekwe kwa lina lya asyene mwenye che Ahusuelo ni ŵaŵisile chimanyisyo cha pete jakwe. 13Ŵantenga ŵapeleche ikalata yo kwa chilambo chachilichose mu umwenye wo, yaili ni utenga waukuti pa lyuŵa lya kumi na tatu lya mwesi ŵa kumi na mbili, yaani mwesi wa Adali, Ŵayaudi wose achalume ni achakongwe, achakulungwa ni wanache, aulajikwe wose ngasinsigasya namose jumo, ni kwigala indu yao. 14Chiwilili cha malamulo chaasachilwe kwausya nti lilamulo kwa kila chilambo ni kwamanyisya ŵandu ŵa ilambo yose kuti aliŵiche chile kwa lyele lyuŵa lyo.
15Kwa malamusi ga mwenye, ntengawo ŵaujawisye ku musi wekulu waukuŵilanjikwa Shushani, nombe ŵantenga ŵalalichile muilambo yose. Mwenye ni che Hamani ŵatemi pasi ni kung'wa nambo ŵandu ŵakutama mmusi wa ku Shushani ŵasongoneche.
Yao Bible Versiont © The Word for the World Southern Africa and Pioneer Bible Translators, 2018.