Esita (Hebrew) 2
2
Che Esita akusagulikwa kuŵa mwenye jwankongwe
1Kaanyuma, Mwenye che Ahusuelo pachapwele chisongolo, ŵaaganisisye aila yaŵatendele che Vashiti ni iŵatite kwalamula. 2Nipele, uŵatumichilaga mwenye wo ŵansalile, “Tusosesose ŵaali ŵakusalala; kwa ligongo lyenu. 3Pelepo nsagule ilongola ŵali mu umwenye ŵenu mwalajisye ŵaaiche nawo achiŵaali ŵasalele wose mu nyumba ja achakongwe mu likome lya musi wa ku Shushani. Mwapeleche ku che Hagai jwaakwimilila nyumba ja mwenye ni jwakwagosa achakongwe, mwelemo apegwe mauta ni indu ine kuti apunde kulikwatula nnope. 4Ajula juchannonyele nnope, munsagule aŵe mwenye jwankongwe pamalo pa che Vashiti.”
Maloŵe go gaanonyele Mwenye, nipele ŵatesile mpela iŵatite kusalilwa.
5Paliji ni Myahudi jumo pamusi wa Shushani, lina lyakwe che Modekai, chisukulu cha mmauja chi che Kishi, mwanagwao che Yaili juŵaliji wisukulu wao che Shimei, kutyochela nlukosyo lwa Benyamini. 6Che Modekai ŵaliji pasikati ja aŵala ŵandu uŵajigalikwe kuukapolo katema mwenye che Yekonia ŵa ku Yuda kaŵajigalikwe kuukapolo ni mwenye che Nebukadineza ŵa kubabeli.
7Che Modekai ŵaakwete mwipagwe mwali lina lakwe che Hadasa, juŵannelite pakuŵa ŵaaliji jwa wina. Mwali ju ŵamanyiche kwa lina che Esita, ŵaliji ni chilu cha kutindigala ni ŵasalele, paŵawile achinangolo ŵakwe mwali jo che Modekai ŵannelite nti jwakummeleka asyene.
8Nipele Malamulo ga mwenye pagalalichilwe kose, achiŵaali achajinji ŵaapeleche ku Shushani, musi wekulu, kweleko ŵatemi alikunkulindililwa ni che Hegai. Nombe che Esita ŵaajaŵisye ku likome lya mwenye ŵaŵichikwe ku che Hagai juŵalindililaga achakongwe jula. 9Che Hegai ŵanonyelwe ni che Esita, pangakaŵila, ŵaapele mauta ni chakulya cha uŵele wa jika, soni ŵansamisisye pamalo pambone munyuumba ja achakongwe jila, ŵansagulile ŵakutumichila achiŵali saba kutyochela mulikome lya mwenye, kuti ŵaatumichileje.
10Che Esita nganalimanyukusya ntundu namose lukosyo lwakutyochela, pakuŵa che Modekai ŵaakanyisye. 11Moŵa gose che Modekai ŵajendagajendaga mumbali lutenje lwa nyumba jiŵaugalilwe achakongwe kuti aimanye che Esita ali uli ni ichiyaapate.
12Moŵa ga kulikwatula ni kulisalalisya kwa achiŵaali galiji chaka chimo: Miesi sita jandanda ŵapakele mauta gagakuŵilanjikwa manemane, ni miesi sita ja mbesi ŵapakele mauta gakununjila ni mauta gane gane. Pakumala yele, kila mwali, kwa jikajika ŵampeleche kwa mwenye che Ahasuelo. 13Pakwaula kwa mwenye, kila mwali ŵapegwilwe chindu chachilichose chaŵachisakaga kwigala kutyochela munyumba ja achakongwe ni kwaula nacho ku likome. 14Katema kakwaula kweleko kaliji ligulo, ni kundaŵi kwakwe mwali jo ŵampeleche ku nyumba jine ja kugosela achakongwe, jajikwimililwa ni che Shaashigazi, juŵaliji ŵakwimilila ilanga ya mwenye. Nganiikomboleka mwali kuuja kwa mwenye, ikaŵe mwenye annonyele mwalijo ni kulajisya kuti aŵilanjikwe kwa kunkolanga lina.
15Pakaiche katema ka che Esita mwali jwa che Abihaili juŵalelitwe ni che Modekai kwaula kwa mwenye, nganaŵenda chachili chose kupunda achila chaŵasalilwe ni che Hegai, juŵagosaga achakongwe ŵa mwenye. Kila mundu juŵammweni che Esita ŵannonyele. 16Nipele, che Esita ŵaajawisye kwa mwenye kulikome pachaka cha saba cha utawala wa mwenye che Ahusuelo, pa mwesi wa kumi ŵaukuŵilanjikwa Tebeti. 17Mwenye ŵanonyelwe nnope ni che Esita kwapunda achakongwe ŵane wose, ŵannonyele nnope kwapunda achiŵaali ŵane. Nipele, mwenye ŵawasisye chindu mpela singwa ja umwenye, ŵankamwile umwenye wa chikongwe pamalo pa che Vashiti. 18Mwenye ŵatesile chindimba chekulungwa cha yakulya kwa kwachimbikasya che Esita, Ŵaalaliche ilongola ni ŵakutumichila wose ŵa muumwenye wakwe. Ŵalalichile kuti ŵandu wose ŵa mu umwenye ŵakwe apumulile ni kwapa mituka jejinji malinga ni ukoto ntima wakwete.
Che Modekai akwakulupusya mwenye nchiwa.
19Katema achiŵali paŵasongangene kaaŵili, che Modekai ŵaatemi panlango wa likome lya mwenye. 20Che Esta ŵaliji chiŵela kulimanyukusya ntundu wao ni lukosyo lwakutyochela mpela che Modekai iŵatite kwakanya; nombe che Esita ŵajitichisye nti iŵatiji pakwajitichisya kutandulila kuuwanache ŵakwe.
21Che Modekai ali atemi pannango wa likome lya mwenye, che Bigitana ni che Teleshi uŵakulindililaga pa nlango wa chumba cha mwenye, yaachimilenje nnope mpaka ŵataŵile malindi ga kwaulaga mwenye che Ahusuelo. 22Che Modekai ŵagamanyilile malindi go, ŵasalile mwenye jwankongwe che Esita, nombe che Esita ŵaasalile mwenye ngani jo. 23Paŵauchilichisye, ŵaimanyilile kuti ili isyene; nipele ŵele ŵandu ŵaŵili wo ŵaŵanikwe mu luŵani lwa chitela cha kuulajila. Ngani ja yele iyatendekwe yo jalembekwe nchitabu chachikumbuchisyo cha mwenye.
Yao Bible Versiont © The Word for the World Southern Africa and Pioneer Bible Translators, 2018.