2 Mamwenye 13
13
Che Yehoahasi akutendekwa mwenye jwa ku Isilaeli
1Pachaka cha ishilini na tatu cha kutawala ku che Yoashi mwana jwa che Ahasia mwenye jwa ku Yuda, che Yehoahasi mwana jwa che Yehu ŵatandite kutawala ku Isilaeli, ŵatawele Isilaeli kwa yaka kumi na saba achitamaga ku Samalia. 2Ŵatesile ugongomalo paujo pa Ambuje Akunnungu kwa kusyasya sambi siŵatesile mwenye che Yeloboamu mwana jwa che Nebati ni kwatendekasisya Ŵaisilaeli atende sambi. Nombe che Yehoahasi nganauleka ugongomalo wo. 3Ambuje Akunnungu ŵatumbilile kwannope Ŵaisilaeli, ŵaatesile mwenye che Hasaeli jwa ku Alamu ni che Beni Hadadi mwanagwe ŵaapunde Ŵaisilaeli katema kose kungondo. 4Che Yehoahasi ŵanchondolele Ambuje Akunnungu, nombe Ambuje Akunnungu ŵapikeni kupopela kwao, pakuŵa ŵaiweni yatite mwenye jwa ku Alamu kwalagasya ŵandu Ŵaisilaeli. 5Ambuje Akunnungu ŵapele Ŵaisilaeli mundu jwakwawombola, juŵawombwele kutyochela kwa ŵandu ŵa ku Shamu, pelepo ŵatemi kwa chitendewele mpela iŵatiji kutama kundanda. 6Namose yeleyo nganaleka kusitenda sambi syati mwenye che Yeloboamu ŵatendekasisye Ŵaisilaeli atende sambi. Nambo ŵajendelechele ni sambi syao, ni sooni chinyago ya nnungu jwankongwe Ashela chasigalile ku Samalia.
7Che Yehoahasi nganasigalila ni chilichose ikaŵe ŵangondo ŵakukwela falasi hansini ni mutuka kumi ni ŵangondo ŵakwenda wammakongolo elufu kumi. Pakuŵa mwenye jwa ku Alamu ŵaliji ŵajonasile ŵangondo ŵa ku Isilaeli ni kwakanyatakanyata nti luundu.
8Indu ine iyatendekwe pa katema ka utawala wa che Yehoahasi ni indu iŵaitesile ni indu iyaajendele chenene, yose ilembekwe mu chitabu cha chikumbuchisyo cha mamwenye ŵa ku Isilaeli. 9Che Yehoahasi ŵajasiche ni kusichikwa pa malembe ga achatatigwe kwele ku Samalia. Ni che Yehoashi mwanagwe ŵatawele pamalo pakwe.
Che Yehoashi akutendekwa mwenye jwa ku Isilaeli
10Pa chaka cha selasini na saba cha kutawala kwa mwenye che Yoashi jwa ku Yuda, che Yehoashi mwana jwa che Yehoahasi ŵatandite kutawala ku Isilaeli achitamaga ku Samalia, nombejo ŵatawele kwa yaka kumi na sita. 11Che Yehoashi nombe ŵatesile ugongomalo paujo pa Ambuje Akunnungu, kwa kukuya chisyasyo cha mwenye che Yeloboamu mwana jwa che Nebati juŵalyungesye Ŵaisilaeli, nombejo ŵajendelechele kutenda ugongomalo uwowo. 12Indu ine iyatendekwe pa katema ka utawala wa che Yehoashi ni indu iŵaitesile ni indu iyaajendele chenene, pamo ni iŵatite kuputana ngondo ni che Amasia mwenye jwa ku Yuda, yose ilembekwe mu chitabu cha chikumbuchisyo cha mamwenye ŵa ku Isilaeli. 13Che Yehoashi ŵajasiche ni kusichikwa pa malembe ga achambujegwe gachimwenye gagaliji kwele ku Samalia ko, ni che Yeloboamu jwaaŵili mwanagwe ŵatendekwe mwenye pamalo pakwe.
Che Elisha akwasika
14Jwakulondola che Elisha ŵalwasile chilwele chati kanyuma chaauleje. Alinkuŵandichila kuwa, mwenye che Yehoashi jwa ku Isilaeli ŵapite kukunnola ni paŵaiche ku che Elisha, ŵalisile, achitiji, “Mmwejo mmele jwakulindilila jwali ni machili jwa ku Isilaeli! Mmwejo mmele jwakulindilila jwali ni machili jwa ku Isilaeli!” 15Che Elisha ŵaalamwile, “Nnyiche nao nkunje ni imaje!” Che Yehoashi ŵaiche nayo. 16Che Elisha ŵaasalile che Yehoashi mwenye jwa ku Isilaeli “Njigale nkunje mmakono mwenu.” Paŵajigele, che Elisha ŵaŵisile makono gao pachanya makono ga mwenye. 17Che Elisha ŵansalile, “Mbugule lidilisha lya chakungopochelo lyuŵa,” nombe mwenye ŵaugwile. Nipele che Elisha ŵansalile “Nkute nkunje ni kugulusya chimaje!” Mwenye ŵakutile nkunje ni kugulusya chimanye. Che Elisha ŵatite “Chimaje chi chili cha kupunda kwa Ambuje Akunnungu, tinchajonanga kusyene Ŵalamu kwele ku Afeki ko.”
18Pele che Elisha ŵaasalile mwenye “Njigale imaje ine,” nombe mwenye ŵajigele. Che Elisha ŵansalile, “Nsome paasi ni imaje yo.” Mwenye ŵasomile paasi imaje yo katatu, nipele ŵalesile. 19Che Elisha ŵantumbilile kwa nnope, ŵansalile mwenye, “Kwa chichi nganinsoma paasi kasano pane mala sita? Kwakutenda yele nkaajonasile ŵandu ŵa ku Alamu kusyene. Nambo sano chimwapunde katatu pe.”
20Che Elisha ŵawile ni ŵansichile.
Katema ko mipingo ja ŵandu ŵawiyi kutyochela ku Moabu ŵaikaga kukuchigungumuchila chilambo cha ku Isilaeli kila kuundanda kwa chaka. 21Ni yaliji Ŵaisilaeli ŵampepe paŵaliji nkusika, chisisimuchile ŵauweni mpingo wa ŵakugungumuchila ali nkwika kwagungumuchila, nipele ŵagajasile malilo gala mu lilembe li che Elisha. Malilo gala pagakwaiye maupa ga che Elisha, ajula mundu jwawile jula jwasyuchile ni kwima.
Ŵaisilaeli ni Ŵaalamu akuputana ngondo
22Mwenye che Hasaeli jwa ku Alamu ŵaalagasyaga kwannope ŵandu ŵa ku Isilaeli katema kose ka utawala wa mwenye che Yehoahasi. 23Nambo Ambuje Akunnungu ŵaakolela chanasa ni kwapanganyichisya yambone Ŵaisilaeli kulosya chinonyelo chakwe kukwawo kwa ligongo lya lilangano lyakwe ni che Ablahamu, che Isaka ni che Yakobo. Mpaka lelojino Ambuje Akunnungu ngaikwanonyela kwajonanga Ŵaisilaeli namose kwajasile kwakutalichila ni paali.
24Che Hasaeli mwenye jwa ku Alamu ŵawile, ni che Beni Hadadi mwanagwe ŵatawele pamalo pakwe. 25Nipele mwenye che Yehoashi mwana ju che Yehoahasi ŵampundile mwenye che Beni Hadadi katatu ni kujiwombola misi jose jijajigalikwe ni che Beni Hadadi katema ka utawala wa che Yehoahasi atati ŵao che Yehoashi.
Currently Selected:
2 Mamwenye 13: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
