2 Mamwenye 12
12
Che Yoashi akutendekwa mwenye jwa ku Yuda
(2 Indu ya katema 24:1-16)
1Che Yoashi ŵatendekwe mwenye jwa ku Yuda katema che Yehu ali atawele ku Isilaeli kwa yaka saba. Che Yoashi ŵatawele ku Yuda kwa yaka alobaini ali nkutama ku Yelusalemu. Achikulugwe ŵaŵilanjikwe che Sibia jwakutyochela musi wa ku Beli Sheba. 2Che Yoashi, ŵatesile yaili yambone paujo pa Ambuje Akunnungu kwa yaka yose yati jwambopesi che Yehoyada ŵaliji nkwajiganya yakuti kulongosya. 3Nambo peuto pa mwinani paŵapopelelaga nganipatyosyekwa, ni ŵandu ŵajendelechele kutyosya mbopesi sya kutinisya ni kututumisya ubani kweleko.
4Che Yoashi ŵaaŵilasile ŵambopesi ni kwalamula achitiji, “Njigale madini ga feza gose gagakuichiswa kuŵa sada pa nyuumba ja Ambuje Akunnungu, ni madini ga feza gagaichiswe nti nsongo, ni madini ga feza gaakoposye ŵandu kukwanilisya nasili syao, ni madini ga feza gati ŵandu akugaichisya pa nyuumba ja Ambuje Akunnungu kwa kusaka kwawo achinsyene. 5Kila jwambopesi apochele madini ga feza kutyochela kwa jumo mwa ŵakugosa mbiko, nombego gatumiche kukolochesya papalipose papakuoneka pakusachilwa kukolosya pa nyuumba ja Akunnungu.”
6Nambo pa chaka cha ishilini na tatu cha kutawala kwa mwenye che Yoashi, ŵambopesi ŵaliji akanaŵe kukolosya papalipose papaoneche pakusachilwa kukolosya sooni pa nyuumba ja Ambuje Akunnungu. 7Kwayele mwenye che Yoashi ŵammilasile jwambopesi che Yehoyada ni ŵambopesi ŵane ni kwausya, “Ana kwachichi ngankujikolosya nyuumba ja Ambuje Akunnungu? Nkajigala sooni madini ga feza kutyoka kwa ŵakugosa mbiko, nambo gankwete go ngapeleche kwaligongo lya kukolochesya papalipose papakuone pakusachilwa kukolosya panyuumba ja Ambuje Akunnungu.” 8Ŵambopesi ŵakundile kuti ngaapochela sooni madini ga feza kutyochela kwa ŵandu, namose ŵanyawo ngaakolosya papalipose pakuone pakusachilwa kukolosya pa nyuumba ja Ambuje Akunnungu.
9Nipele jwambopesi che Yehoyada ŵajigele lisanduku ni kupowola pachanya chiunichilo chakwe, ŵachiŵisile chakunlyo kwa chilisa, pamalo pankwinjila ŵandu pa nyuumba ja Ambuje Akunnungu. Nombe ŵambopesi ŵaŵaliji ni samu ja ulinda pa nnango ŵakwinjilila pa nyuumba ja Akunnungu ŵaŵisile mu lisanduku mo madini ga feza gose gaŵaichisye ŵandu pa nyuumba ja Ambuje Akunnungu. 10Ndaŵi jose paŵagaweni kuti madini ga feza gali gamajinji mu lisanduku mo, jwakulemba jwa mwenye ni jwambopesi jwankulu ŵajinjilaga kugaŵalanga ni kugataŵilila mu itutule madini ga feza gose gagapatikanaga pa nyuumba ja Ambuje Akunnungu. 11Pakumala kwiwona kuti akwete madini ga feza gakukwanila, ŵaapaga ŵamasengo uŵajimililaga pa nyuumba ja Ambuje Akunnungu, nombe ŵanyawo ŵaalipaga maselemala ni ŵandu ŵaŵakolosya sooni papalipose papaone pakusachilwa kukolosya pa nyuumba ja Ambuje Akunnungu, 12nombe ŵaapaga ŵakutaŵa ni ŵakukatanya maganga. Ŵasumaga mbao ni maganga gagasepekwe kwa ligogo lya kukolochesya nyuumba ja Ambuje Akunnungu. Iyoyopeyo ŵalipilaga yaikusachilwa ine yose kwa kukolochesya papalipose papaoneche kuti pakusachilwa kukolosya pa nyuumba jo. 13Nambo madini ga feza go nganatumiaga kwa kulipila ukolosye wa masinia ga feza ni mikasi ja kukatila utambi wa mishumaa pane mabakuli ni mapenenga. Atamuno yoombo yose ine ya sahabu pane ya feza, kwaligongo lya mu nyuumba ja Ambuje Akunnungu. 14Syosye syatumiche kwalipa ŵamasengo ŵaŵakolosyaga nyuumba ja Ambuje Akunnungu. 15Ŵandu ŵaŵaliji nkwimilila masengo ŵaliji ŵakukulupichika kwannope, kwayele ŵamasengo nganakola ligongo lyakuti aimanyilile madini ga feza gagatyosekwe kwaligongo lya masengo galiji ni winji chi. 16Madini ga feza gaŵatyosyekwe kwaligongo lya sadaka sya kutyosya ileŵo ni mbopesi sya kuswejesya sambi, nganagajinjisyaga mu lisanduku lya pa nyuumba ja Ambuje Akunnungu, gelego galiji kwaligongo lya ŵambopesi.
17Katema ko che Hasaeli mwenye jwa ku Alamu ŵaugungumuchile musi wa ku Gadi ni kuutenda wao. Ni sooni che Hasaeli ŵapite kuti akaugunguluchile musi wa Yelusalemu. 18Ni che Yoashi mwenye jwa ku Yuda ŵaijigele indu yose iyatyosekwe kwa ligongo lya Ambuje Akunnungu ni mamwenye ŵa ku Yuda ŵaŵannongolele, yaani mwenye che Yehoshafati ni mwenye che Yeholamu ni mwenye che Ahasia, ni aila iŵaityosisye nsyene jo, ni sooni sahabu jose jijaliji mu mbiko ja pa nyuumba ja Ambuje Akunnungu ni mu nyuumba ja chimwenye, ŵaipeleche kwa che Hasaeli mwenye jwa ku Alamu. Nipele mwenye che Hasaeli ŵajityosisye mipingo jakwe ja ŵangondo ku Yelusalemu.
19Ipanganyo ine ya mwenye che Yoashi yose ilembekwe mu chitabu cha chikumbuchisyo cha mamwenye ŵa ku Yuda.
20Achakamusi ŵakwe ŵatesile malindi, ni ŵammuleje ku nyuumba ja ku Milo ku litala lyalikutuluka kwaula ku Sila. 21Ŵaŵammuleje ali che Yosakali mwana jwa che Shimeati ni che Yehosabadi mwana jwa che Shomeli ŵaŵaliji ŵakamusi ŵakwe. Che Yoashi ŵansichile ku malembe ga chimwenye ku musi u che Daudi. Ni che Amasia mwanagwe ŵatawele pamalo pakwe.
Currently Selected:
2 Mamwenye 12: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
