उत्पत्ती 9
9
बोगवान नुह हेऱ्यो वायदो केरने
1उवतो बोगवान नुह एने तान सोराह बोरकेत आप्यो, एने ताह केयो, “फुलो फोलो, एने देरती माय बोराय जावो।#उत्पत्ती 1:28 2देरती पोर वाला आखा जेनवार, एने चिड़ा एने देरिया वाला मासा तुमूह बिते, एने ता आखा तुमरा ताबा माय केराय जातेह हे। 3एवी सोब देरती पोर लोलनारे जेन्तु तुमरो खाणेन केरता आपेल हे, एने इह केरीन निल्लागार आतल्या जाड़े आपेल इतो; तिहेच केरीन तुमूह आखो काय आपथु। 4पुण माहाह जीव हेऱ्या मतलब लुय हेऱ्या तुमू मा खाहो।#लेव्यवस्था 19:26; व्यवस्था 12:16-23; 15:23; उत्पत्ती 17:10-14 5एने जोरूड़ मी तुमरी लुय मतलब जीवान बुदलो लेह। आखा जेनवेराह एने माणहाह, दुयाह पोर मी ताह लेह एने माणहान जीवान बुदलो मी एक एक माणहा फाय रेन लेह। 6जो कुण माणहान लुय वोयाड़ी, तान लुय माणहाच ने उगे रेन वोयाड़ाय जाय, काहाकाय बोगवान माणहाह ताच ने वेह्या माय बाणायेल हे।#उत्पत्ती 1:26; निर्गमन 20:13
7“एने तुमू ते फुलो फोलो एने वुदो एने देरती पोर जुलूम सोरा पायदा केरीन ता माय बोराय जावो।”#उत्पत्ती 1:28
8उवतो बोगवान नुह एने तान सोराह केयो, 9“हुमलो, मी तुमू हिऱ्यो एने तुमरी पासाण ज्यी तुमरी वोस रेय, ती हिऱ्यो बी मी वाचा बांदथु, 10एने सोब जीवताला जेनवेराह हिऱ्यो बी जा तुमरी हेऱ्या हेते, काय चिड़ा काय पालन्या जेनवारे, एने जेंगली जेनवारे, काय देरती पोर वाला आखा जीवजेन्तु जा डोंडह्याम रेन निकलेल हेते। 11एने मी तुमरी हिऱ्यो मारी ज्यी वाचा बांदथु काय आखा जीव पोशा मुहोल दाऱ्या पाण्या केरीन खेतेम नाय एती; एने देरतीह खेतेम केरनेन केरता पुशो मुहोल दाऱ्यो पाणी नाय पोड़ी।” 12पुशो बोगवान केयो, “जो वाचा मी तुमरी हिऱ्यो एने जोला जेनवारे तुमरी आरही हेते, ता आखा हिऱ्यो बी काला कालान पिढ्युन केरता बांदथु, ज्यान ज्यी निसाणी हे। 13काय मी वादला माय मारो बाण मिलेल हे, तो मारी एने देरतीन विची माय वाचान निसाणी रेय। 14एने जेदिह मी जुगाम वादेल पोसरावुह, तेवी वादलाम बाण देखाय। 15तेवी मी जी वाचा तुमरी हिऱ्यो एने आखा जीवताला जेनवारा हिऱ्यो बांदेल हे; तिह एर केरूह, तेवी उहलो मुहोलदाऱ्यो पाणी पुशो नाय पोड़ी जा केरीन आखा जीवान नुकसान नाय एय। 16वादलाम जो बाण रेय, मी ताह देखीन ज्यी कायेम ने वाचा एर केरूह, जो मारा एने देरती पोर वाला आखा जीवताला जीवान विचीम बांदायेल हे।” 17उवतो बोगवान नुहाह केयो, “ज्यी वाचा मी देरती पोर वाला आखा जीवा हिऱ्यो बांदिल हे, तान निसाणी ज्यीच हे।”
नुह एने तान सोरा
18नुहान जा सोरा डोंडह्याम रेन निकेलना, ता शेम, हाम, एने येपेत एता। एने हाम कनान ने आबोख इतो। 19ज्या नुहान तीन सोरा एता; न्यान वोस आखी देरती पोर पोसरी गीयो।
20नुह जो किरसाण इतो, अंगुरान वाड़ी लागाड़नार पिल्लो माणुह बुणनो। 21एने तो अंगुरान रूह पिन साकवालो एय गीयो, एने तान तोम्बु माय जाईन नांगेरलो एय गीयो। 22तेवी कनान ने आबोख हाम, तान आबाख नांगरलोच देख्यो, एने बाहेर आवीन तान दुयू बायाख केय दिनो।#लेव्यवस्था 22:13 23तेवी शेम एने येपेत दुय जाणे फाड़को लावीन तान खांदा पोर मेल्या, एने पासाणली उगे उलटा फिरीन तान आबाख ने उगाड़ला सेरीराह पांगराव देना, एने ता तान मुया पासाण फिरावेल एता, ता माय ता तान आबाख नांगरलो नाह देख्या। 24जेवी नुहान नेशा उतरी गियी, तेवी, तो सोमजी लिदो काय तान आतल्यो बिटोख ता हिऱ्यो काय किरेल हे। 25केरीन तो केयो,
“कनानाह हाराप लागे!
तो तान बाय बोन्दान पावोर रेय।”
26पुशो तो केयो, “शेमान बोगवान यहोवा बोरकेत वालो हे!
एने कनान शेमान पावोर रेय।
27बोगवान येपेत ने वोसीह पोसरावे;
एने तो शेमान तोम्बु माय वुहे, एने कनान तान पावोर रेय।”
28मुहोल दाऱ्या पाण्यान पासाण नुह साड़े तीन होव वोरह्या जीवनो। 29इह केरीन नुह आखोच साड़े नोव होव वोरह्या वोर जीवनो; उवतो तो मोर गीयो।
Currently Selected:
उत्पत्ती 9: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
Videos for उत्पत्ती 9
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show