उत्पत्ती 10
10
नुहान सोरान वोस
(1 इतिहास 1:5-23)
1नुहान सोरा शेम, हाम, एने येपेत एता। मुहोल दाऱ्या पाण्यान पासाण तान सोरा पायदा एना, तान वोस ज्यी हे।
2येपेत ने सोरा, गोमेर, मागोग, मादे, यावान, तुबल, मेशेक एने तीरास ज्या एता। 3एने गोमेर ने सोरा, अश्कनज, रीपत, एने तोगर्मा, ज्या एता। 4एने यावान ने सोरा : एलीशा, तर्शिश, कित्तीम एने दोदानी माणहे एना। 5न्यान वोस दिहरी जातीन खेन्डान देसाम ओहला वाटाय गीया काय ता अलेग अलेग बाषा, गेराणे एने जात्युन इसाब माय आंगे आंगे एय गीया।
6हाम ने सोरा ज्या एता, कुश, मिस्र, फूत, एने कनान एना। 7एने कुशान सोरा सबा, हवीला, सबता, एने सब्तका एना। एने रामान सोरा शेबा एने ददान ज्या एता। 8कुशान वोसी माय निमरोद नावान सुरो बी एतो; तो देरती पेल्लो बाहदुर तोच इतो। 9तोच बोगवानान नेजरीम ताकेतवोर सिकार खेलनार बुणनो, ता माय ज्यी वात चालेल हे; “निमरोद ने गेत बोगवानान नेजरी माय ताकेतवान सिकार खेलनार!” 10एने तान राज ने सुरवात शिनार देसाम बाबिलोन, एरेख, अक्काद एने कलने रेन एनो। 11ता देसाम रेन निकलीन तो अश्शुर माय गीयो, एने ता तो निनवे रहोबोत, कालह ज्या हियोर वोहाड्यो, 12एने निनवे एने कालह ने विची माय रेसेन नावान हेयराह वोहाड्यो, एने मुठलो हियोर ज्योच हे।
13मिस्रीन वोसी माय लूदी, अनामी, लहाबी, नाप्तुही, 14पत्रुस कसलूही एने कप्तोरी माणहे एना, कसलूही माय रेन ते पलिश्ती माणहे निकेलना। 15कनान ने वोसी माय पेल्लो सुरो सीदोन इतो, तेवी हित्त, 16यबूसी, एमोरी, गिर्गाशी, 17हिब्बी, अरकी, सीनी, 18अरवदी, सामरी, एने हमाती माणहे बी एना, इह केरीन कनानीन गेराणान माणहे बी पोसरी गीया। 19एने कनानी माणहान हिल सीदोन रेन ते गरार ने वाटे लागतो गाजा वोर एने पोशो सदोम, अमोरा एने अदमा एने सबोयीम वाटे लागतो लाशा वोर पोसरनो। 20हाम ने वोसी माय ज्याच एना; एने ज्या अलेग अलेग गेराणा, बाषा, देसे एने, एने जात्युन गेत आंग आंगे एय गीया।
21पुशो शेम, जो आखा एबेर वोसीन डावालो आबोख बुणनो, जो येपेत ने डावालो बाहख इतो, तान बी सोरा पायदा एना। 22शेमान सोरा : एलाम, अश्शुर, अर्पक्षद, लुद एने अराम ज्या एता। 23अराम ने सोरा : ऊब, हूल, गेतेर, एने मश ज्या एता। 24अर्पक्षद ने शेलह एने एबेर ज्या सोरा पायदा एना। 25एने एबेर ने दुय सोरा पायदा एना, एकान नाव पेलेग तान केरता मेलाय गीयो काय तान कालामाय देरती वाटाय जायेल एती, एने तान बायाख ने नाव योक्तान एतो। 26योक्तान ने सोरा : अलमोदाद, शेलेम हसर्मावेत, येरह, 27हदोराम, ऊजाल, दिक्ला, 28ओबाल, अबीमाएल, शेबा, 29ओपीर, हवीला, एने योबाबाह जेल्मो दिनो : ज्या आखा योक्तान ने सोरा एता। 30तान रेणेन जागो मेशा लागतो सपारा, जो पुर्व माय बोयड़ा माय गाव हे, तान वाटे वोर इतो। 31शेमान सोरा ज्याच एता; एने ता अलेग अलेग, गेराणा, बाषा, एने देसे एने जातीन गेत आंग आंगे एय गीया।
32नुहान सोरान गेराणे ज्याच हेते; एने जात्युन गेत तान वोस ज्याच हेते; मुहोल दाऱ्या पाण्यान पासाण देरती बोरीन जात्यु न्याच माय रेन लागत्यु वाटाय गीयु।
Currently Selected:
उत्पत्ती 10: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
