उत्पत्ती 20
20
अब्राहम एने अबीमेलेक
1ओवतो अब्राहाम ता रेन निकलीन कनान ने देक्षिण देसाम कादेश एने शुरान विची माय आवीन थुबनो, एने गरार माय रेणे बाज गीयो, 2एने अब्राहाम तान बायकु सारान बाराम केयो, “ज्यी मारी बोणीख हे।” केरीन गरार ने राजा अबीमेलेक तान दुताह मोकलीन साराह हादाड़ लिदो।#उत्पत्ती 12:13; 26:7 3पुण राती बोगवान अबीमेलेक ने होपना माय आवीन केयो, “हुमेल जी बायकुह तु राख लियेल हे, तीन कारेण तु मोर जाहे, काहाकाय ती एदम्या वाली हे।”
4पुण अबीमेलेक तीन आहने ना जायेल इतो, केरीन तो केयो, “एय मालीक काय तु निर्दोस माणहाह बी मार टाकेह?” 5काय तोच सोता माहु नाह केयो, “ज्यी मारी बोणीख हे? एने ती बायकु बी सोताच केयी, ‘ज्यो मारो बाहख हे;’ मी ते मारा मोनान खेराय एने मारा वेवारान खेराय माय ज्य काम किऱ्यो।”
6बोगवान ताह होपना माय केयो, “होव मी जाणथु काय तारा मोनान खेराय माय तु ज्य काम किरेल, एने मी तुवाह रोकीन बी मिल्यो काय तु मार विरूद पाप नाय केरी, केरीन मी तुवाह तिह आथेलने नाह दिनो। 7केरीन एवी ता एदम्यान बायकुह ताह फिराव दे; काहाकाय तो मारो जाणकार हे, एने तार केरता विन्ता केरी, एने तु जीवती रिहे; पुण केदी तु तिह नाय फिरावे ताहार तु एर मेल, काय तु एने तारा जोला माणहे हेते, सोब जोरूड़ मोर जाती।”
8उठ्यान अबीमेलेक उतवाल्योच उठीन तान सोब काम केरनाराह हादाड़ीन त्यु सोब वातु होमलाड्यो; एने ता माणहे जुलूम बिय गीया। 9तेवी अबीमेलेक अब्राहामाह हादाड़ीन केयो, “तु आमरी हिऱ्यो ज्य काय किरेल हे? मी तारो काय बिगाड़ेल इतो, काय तु मारो एने मारा राज्या पोर ओहलो मोटलो पाप टाक दियेल हे? तु मार हिऱ्यो तो काम किरेल हे जो हाजो नाह एतो।” 10पुशो अबीमेलेक अब्राहामाह फुशो, “तु काय सोमजीन ओहलो काम किऱ्यो?”
11अब्राहाम जापाप आप्यो, “मी ज्य सुचेल इतो काय ज्यी जागे बोगवानान कायच बी बिय निह एय; केरीन ज्या माणहे मारी बायकुन केरता माहु मार देती। 12ज्यान सवाय खेरीच ती मारी बोणीख हे, ती मारा आबाख ने बेटीख ते हे, पुण मारी आईख ने बेटीख नाय मिले; ओवती मारी बायकु बोण गियी। 13एने ओहलो एनो काय जेवी बोगवान माहु मारा आबाख ने गेर सोड़ीन निकेलनेन उकुम आप्यो, तेवी मी तीह केयो, ‘ओलीक गीण तुवाह मार पोर केरने पोड़ी काय आमु दुयू जा-जा जाय ताहरी-ताहरी तु मारा बाराम किज्ये काय ज्यो मारो बाहख हे।’ ”
14तेवी अबीमेलेक मेंड्रा बोकड्या, डोरे, पावोर पावेरन्यु लावीन अब्राहामाह आप्यो, एने तान बायकु साराह बी ताह फिराव दिनो। 15एने अबीमेलेक केयो, “देख, मारो देस तार सामने हे; जाहरी तुवाह पोटी ताहरी रे।” 16एने साराह तो केयो, “देख मी तारा बायाख एक एजार चांदीन पोयशा आपेल हे। देख, जा माणहे तार हेऱ्या हेते ता आखा माणहान नेजरी माय तु निर्दोस हे, एने आखा माणहाह मालुम पोड़ जाय काय तु कायच गेलेत काम नाह किरेल सोती।”
17तेवी अब्राहाम बोगवानाह विन्ता किऱ्यो, एने बोगवान अबीमेलेक, एने तान बायकु, एने पावेरन्युह हुदाऱ्यो एने त्यु जेन्ने बाज गीयु। 18काहाकाय बोगवान अब्राहाम ने बायकु सारान केरता अबीमेलेक ने गेरान आखी बायकुन खोलाह पुरो बोंद केर दियेल इतो।
Currently Selected:
उत्पत्ती 20: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
