गिनती 9
9
दूसरी बार फसह को त्यौहार मनायो जानो
1जब इस्राएली मिस्र देश सी निकल ख आयो तब दूसरो साल को पहिलो महीना म परमेश्वर न सीनै को जंगल म मूसा सी कह्यो, 2“इस्राएली फसह त्यौहार ख निर्धारित समय पर मनायो करे। 3मतलब योच महीना को चौदावों दिन ख शाम को समय तुम लोग ओख सब विधियों अऊर नियमों को अनुसार मनावो।” 4तब मूसा न फसह को त्यौहार मनावन लायी इस्राएलियों सी कह्य दियो। 5अऊर उन लोगों न पहिलो महीना को चौदावों दिन को शाम को समय सीनै को जंगल म फसह को त्यौहार मनायो; अऊर जो जो आज्ञाये परमेश्वर न मूसा ख दी होती उन्कोच अनुसार इस्राएलियों न करयो।
6पर कुछ लोग आदमी को शव ख छुवन को द्वारा अशुद्ध भय गयो होतो येकोलायी ऊ दिन फसह को त्यौहार नहीं मनाय सक्यो; हि उच दिन मूसा अऊर हारून को जवर गयो, 7“मूसा सी कहन लग्यो, हम लोग आदमी को शव ख छुवन को वजह अशुद्ध भय गयो हंय; पर हम कहाली रुक्यो रह्यबो, अऊर इस्राएलियों को संग परमेश्वर को चढ़ावा निर्धारित समय पर कहाली नहीं चढ़ायबो?”
8मूसा न उन्को सी कह्यो, “रुक्यो रहो, मय सुन लेऊं कि परमेश्वर तुम्हरो बारे म का आज्ञा देवय हय।”
9परमेश्वर न मूसा सी कह्यो, 10“इस्राएलियों सी कह्य कि चाहे तुम लोग चाहे तुम्हरो कुल म सी कोयी भी कोयी शव को वजह अशुद्ध होना, यां दूर की यात्रा पर होना, तब भी हि परमेश्वर लायी फसह को त्यौहार मनाये। 11हि लोग दूसरो महीना को चौदावों दिन ख शाम को समय मनाये; अऊर फसह को बलिपशु को मांस ख अखमीरी रोटी अऊर कड़ु सागपात को संग खाये। 12#निर्गमन १२:४६; यूहन्ना १९:३६अऊर ओको म सी कुछ भी सुबेरे तक नहीं रखे, अऊर नहीं बलिपशु की कोयी हड्डी तोड़े; हि ऊ फसह को त्यौहार की पूरी विधियों को अनुसार मनाये। 13पर जो आदमी शुद्ध हो अऊर ऊ यात्रा पर नहीं होना, पर फसह को त्यौहार ख नहीं मानय त ऊ मनुष्य अपनो लोगों म सी अलग करयो जायेंन, ऊ आदमी ख परमेश्वर को चढ़ावा निर्धारित समय पर नहीं लावन को वजह अपनो पाप को बोझ उठानो पड़ेंन। 14यदि कोयी परदेशी तुम्हरो संग रह्य क चाहे परमेश्वर लायी फसह को त्यौहार मनाये त ऊ वाच विधि अऊर नियम को अनुसार ओख माने; देशी अऊर परदेशी दोयी लायी तुम्हरी एकच विधि होयेंन।”
निवास स्थान पर अग्निमय बादर
(निर्गमन ४०:३४-३८)
15जो दिन निवास स्थान जो वाचा को तम्बू भी कहलावय हय खड़ो करयो गयो, ऊ दिन बादर ओको पर छाय गयो; अऊर शाम को समय निवास स्थान को ऊपर आगी को जसो दिखायी दियो अऊर सुबेरे तक दिखायी देतो रह्यो। 16असो हमेशा होतो रह्यो; मतलब दिन ख बादर छायो रहत होतो, अऊर रात ख आगी दिखायी देत होती। 17अऊर जब जब ऊ बादर तम्बू पर सी उठ जातो तब इस्राएली निकल जात होतो; अऊर जो जागा पर बादर रुक जात होतो वहांच इस्राएली अपनो डेरा खड़ो करत होतो। 18परमेश्वर की आज्ञा सी इस्राएली वहां सी निकलत होतो, अऊर परमेश्वरच की आज्ञा सी हि डेरा डालत होतो; अऊर जितनो दिन तक ऊ बादर निवास स्थान पर रुक्यो रहतो उतनो दिन तक हि डेरा डाल्यो रहत होतो। 19जब बादर बहुत दिन तक निवास स्थान पर छायो रहतो होतो तब भी इस्राएली परमेश्वर की आज्ञा मानत होतो, अऊर निकलत नहीं होतो। 20कभी कभी ऊ बादर थोड़ोच दिन तक निवास स्थान पर रहत होतो, अऊर तब भी हि परमेश्वर की आज्ञा सी डेरा डाल क रहत होतो; अऊर फिर परमेश्वर की आज्ञा सीच हि निकलत होतो। 21अऊर कभी कभी बादर केवल शाम सी सुबेरे तक रहत होतो; अऊर जब ऊ सुबेरे ऊपर उठ जात होतो, तब इस्राएली निकलत होतो, अऊर यदि ऊ रात दिन छायो रहतो त जब बादर ऊपर उठ जातो तबच हि निकलत होतो। 22ऊ बादर चाहे दोय दिन, चाहे एक महीना, चाहे साल भर, जब तक निवास स्थान पर रुक्यो रहत होतो तब तक इस्राएली अपनो डेरा म रहतो अऊर निकलत नहीं होतो; पर जब बादर उठ जात होतो तब हि निकलत होतो। 23परमेश्वर की आज्ञा सी हि अपनो डेरा खड़ो करत होतो, अऊर परमेश्वर कीच आज्ञा सी हि निकलत होतो; जो आज्ञा परमेश्वर मूसा को द्वारा देत होतो ओख हि मानत होतो।
The Lodhi Bible © The Word for the World International and Lodhi Translation Samithi, Gondia, Maharashtra 2025