गिनती 8
8
दीयावों ख जलानो
1फिर परमेश्वर न मूसा सी कह्यो, 2“हारून ख समझाय क यो कह्यजो कि जब तय दीया जलायजो तब सातयी दीया को उजाड़ो दीवट को सामने पड़े।” 3येकोलायी हारून न वसोच करयो, मतलब जो आज्ञा परमेश्वर न मूसा ख दी होती ओकोच अनुसार ओन दीयावों ख दीवट को सामने रख्यो कि ऊ उजारो दे। 4#निर्गमन २५:३१-४०अऊर दीवट की बनावट असी होती , मतलब ऊपर सी ले क खल्लो तक सोना ढाल क बनायो गयो होतो; जो नमूना परमेश्वर न मूसा ख दिखायो होतो ओकोच अनुसार ओन दीवट ख बनायो।
लेवियों को शुद्धिकरन अऊर अर्पन
5फिर परमेश्वर न मूसा सी कह्यो, 6तय इस्राएलियों को बीच म सी लेवियों ख अलग ले क शुद्ध कर। 7उन्ख शुद्ध करन लायी तय असो कर कि शुद्धिकरन को पानी उन पर छिड़क दे, तब हि अपनो पूरो शरीर को बाल मुण्डवाये, अऊर अपनो कपड़ा धोये, अऊर हि खुद ख शुद्ध करे। 8तब हि तेल सी सान्यो हुयो अच्छो चुन को अन्नभेट सहीत एक गोरा ले, अऊर तय पापबलि लायी एक दूसरो गोरा लेजो। 9अऊर तय लेवियों ख मिलाप वालो तम्बू को सामने पहुंचायजो, अऊर इस्राएलियों की पूरी मण्डली जमा करजो। 10तब तय लेवियों ख जवर परमेश्वर को सामने लायजो, तब इस्राएली लोग अपनो हाथ उन पर रखेंन, 11तब हारून लेवियों ख परमेश्वर को सामने इस्राएलियों को तरफ सी हिलायी हुयी भेंट कर क् अर्पन करे कि हि परमेश्वर की सेवा करन वालो ठहरे। 12तब लेवीय अपनो हाथ उन बछड़ा को मुंड पर रखे; अऊर तय लेवियों को पाप झाकन लायी एक बछड़ा पापबलि अऊर दूसरो होमबलि कर क् परमेश्वर लायी चढ़ायजो। 13अऊर लेवियों ख हारून अऊर ओको टुरावों को सामने खड़ो करजो, अऊर उन्ख हिलावन की भेंट लायी परमेश्वर ख अर्पन करजो। 14“यो तरह तय लेवियों ख इस्राएलियों म सी अलग करजो, अऊर हि मोरोच ठहरेंन। 15अऊर जब तय लेवियों ख शुद्ध कर क् हिलायी हुयी भेंट लायी अर्पन कर चुक्यो, ओको बाद हि मिलाप वालो तम्बू की सेवा करन लायी अन्दर आयो करेंन। 16कहालीकि हि इस्राएलियों म सी मोख पूरो रीति सी अर्पन करयो हुयो हय; मय न इस्राएल को सब बड़ो टुरावों की जागा पर उन्ख मय न अपनो लायी स्वीकार कर लियो हय। 17इस्राएलियों को पहिलौठा, चाहे आदमी को होना चाहे जनावर को, सब मोरोच आय; कहालीकि मय न उन्ख ऊ समय अपनो लायी पवित्र ठहरायो जब मय न मिस्र देश को सब पहिलौठा ख मार डाल्यो होतो। 18#गिनती ३:११-१३अऊर मय न इस्राएलियों को सब पहिलौठों को बदला लेवियों ख लियो हय। 19लेवियों ख मय न हारून अऊर ओको टुरावों ख इस्राएलियों म सी दान कर क् दे दियो हय, कि हि मिलाप वालो तम्बू म इस्राएलियों को पाप झाक्यो करे, कहीं असो नहीं होय कि ऊ इस्राएली पवित्र स्थान को जवर आये तब उन पर कोयी महासंकट आय पड़े।”
20मूसा, हारून अऊर सब इस्राएली मण्डली न लेवियों को संग असोच करयो, लेवियों सी जो आज्ञा परमेश्वर न मूसा ख दी होती ओकोच अनुसार इस्राएलियों न लेवियों को संग व्यवहार करयो। 21लेवियों न त अपनो आप ख पाप सी शुद्ध करयो, अऊर अपनो कपड़ा ख धोय डाल्यो; अऊर हारून न उन्ख परमेश्वर को सामने हिलायी हुयी भेंट को लायी अर्पन करयो अऊर उन्ख शुद्ध करन ख उन्को पाप ख झाक दियो। 22अऊर ओको बाद लेवीय हारून अऊर ओको टुरावों को सामने मिलाप वालो तम्बू म अपनो अपनो सेवा कार्य करन गयो; अऊर जो आज्ञा परमेश्वर न मूसा ख लेवियों को बारे म दी होती ओकोच अनुसार करयो।
23फिर परमेश्वर न मूसा सी कह्यो, 24“जो लेवियों ख करनो हय ऊ हि आय, कि पच्चीस साल की उमर सी ले क ओको सी जादा उमर म हि मिलाप वालो तम्बू म काम करन लायी अन्दर मौजूद होये; 25अऊर जब पचास साल को हय त फिर वा सेवा को लायी नहीं आये अऊर नहीं काम करे; 26पर हि अपनो भाऊ-बन्धुवों को संग मिलाप वालो तम्बू को जवर देखभाल को काम खुद न करे, अऊर कोयी तरह को सेवा कार्य नहीं करे। लेवियों ख जो जो काम सौंप्यो जाये उन्को बारे म तय उन्को सी असोच करजो।”
The Lodhi Bible © The Word for the World International and Lodhi Translation Samithi, Gondia, Maharashtra 2025